Padahk en Sounpwong kan en Liahona, Padahk, Pepuweri 2021

Inou Sarawi kan kin Kadokei Kitail ong Koht

Wiahda oh kolokol inou sarawi kan kin wahdo kapai kan.

Inou sarawi wewehki inou ehu nan pwungen Sahm Nanleng oh Sapwellime seri kan. E ketin koasonehdi dahme pahn kin wiawi ong ni inou sarawi kan me kitail pahn kin wiahiong Ih. Ni ahnsou me kitail kin kapwaiada dahme E kin ketin kupwuriki, kitail kin alehdi kapai tohto. Oh kitail sohte kin alehte kapai kan pohn sampah—ni ahnsou me kitail kin wiahda oh kolokol inou sarawi kan, kitail pahn pwurala kousoanla rehn Koht oh atail peneinei kan nanleng ehu rahn.

Inou Kan oh Tiahk Sarawi Kan

Kitail kin wiahda inou sarawi kan nan ahnsou en ekei tiahk sarawi kan ah kin wiawi. Kitail anahne alehda tiahk sarawi ko oh peikiong inou sarawi ko pwe kitail en kak pwurala kousoanla rehn Koht. Tiahk sarawi kan kin wiawi sang ni mweimwei en prihsduhd. Tiahk sarawi pwukat iei me iangahki pepdais oh alehdahn Ngehn Sarawi, alahldien Melkesidik Prihsduhd (ong ohl), oh tiahk sarawi kan me kitail alehdi sang nan tehnpas sarawi. Ni ahnsou en kamadipw sarawi, irail tohn Mwomwohdiso kin pwurehng kakehlaka de kataman arail inou kan me irail wiahda ong Koht (kilang Doctrine and Covenants 20:77, 79.).

Inou Sarawi Kan Kin Sewese Kitail en Momour ni Pwung

Ni ahnsou en pepdais, kitail kin inoukihda me kitail pahn kin idawehn Sises Krais, tamataman Ih ahnsou koaros, oh kapwaiada kosonned akan (kilang Doctrine and Covenants 20:37). Koht ketin inouki me Ngehn Sarawi pahn kin kalapw ieiang kitail.

Ni ahnsou me ohl akan kin alehdi prihsduhd, irail kin inoukihda me irail pahn kin momourki ni arail pahn warohng sapwellimen Koht manaman en prihsduhd. Koht ketin inouki me e pahn ketin kapai irail. (Kilang Doctrine and Covenants 84:33–40.)

Kasansal en Tehnpas Sarawi en Brazil Recife sang James Porter

Inou Sarawih kan Me Kitail Wiahda Nan Tehnpas Sarawi

Ni ansou me tohn Mwomwohdiso men alehdi arail endaumen nan tehnpas sarawi, irail inoukihdi me irail pahn momourki mehlel oh ahniki tohnmetei ong rongamwahuo. Irail wia inou manaman sang Kauno (kilang Doctrine and Covanants 38:32; 109:22).

Ni ansou en katengtengpene nan tehnpas sarawi, ohl oh lih pwoupwoud men kapwopwoudlahr ong mour soutuk oh inoukihda me ira pahn mehlelpene oh mehleliong Koht. Koht ketin inoukihdi me irail pahn kak pwurala oh kousonla Reh oh ong arail peneinei kan kokohlahte. (Kilang Doctrine and Covenants 132:19–20.)

Kitail Wia Aramas en Inou

Irail kan me iangala Mwomwohdiso en Sises Krais en Souleng en Imwin-rahn akan wiahlahr Sapwellimen Koht aramas en inou. Irail pil sohsohki kapai kan oh pwukoah kan me sansal nan inou kan en Abraham (kilang Kalesia 3:27-29). Pwehn wia kisehn Sapwellimen Koht aramas en inou kan, met me wewehki me kitail en sawaspene nanpwungetail ni atail pahn karkaraniala Krais. E pil wewehki me kitail en wia pwukoah doadoahk en kakehlaka Sapwellimen Koht Mwomwohdiso pohn sampah. Ni ansou me kitail kin kolokol atail inou sarawih kan, kitail kak diar manaman oh kehlail sang Koth.

Sang Pwuhk Sarawi kan

Ni ansou me irail pepdaisla, Alma oh sapwellime aramas akan wiahda inou ehu me irail pahn sewese mehteikan oh kapawaiada Sapwellimen Koht kosonned akan (kilang Mosiah 18:8-11).

Mwurin arail iangalahr, Mehn Anti-Nephi-Lehies wiahda inou ehu me irail solahr pahn pwurehng doadoahngki neirail mehn mahwin kan (kilang Alma 24:17-19).

Koht ketin wiahda inou ong Abraham (kilang Abraham 2:9-11).

© 2022 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Translation of Monthly Liahona Message, February 2022. Pohnpeian 18313 885.