Molaetsa wa Liahona wa Kgwedi le kgwedi, Tlhakole 2022

Dikgolagano di re Golaganya le Modimo

Go dira le go tshegetsa dikgolagano go tlisa ditshegofatso.

Kgolagano ke tsholofetso fa gare ga Rara wa Legodimo le bana ba Gagwe. O re beela melawana ya dikgolagano tse re di dirang le Ene. Fa re dira se A re se lopang, re amogela ditshegofatso. Ga re bone ditshegofatso fela mo lefatsheng—fa re dira le go tshegetsa dikgolagano, re tlaa boa go ya go tshela le Modimo le ba malwapa a rona kwa legodimong letsatsi lengwe.

Dikgolagano le Ditao

Re dira dikgolagano ka nako ya ditao dingwe Re tshwanetse ra amogela ditao tseo le go obamela dikgolagano tseo gore re boe go tshela le Modimo. Ditao di dirwa ka taolo ya boperesiti. Ditao tseo di akaretsa kolobetso le tlhomamiso, go amogela Boperesiti jwa Melekiseteke (go banna), le ditao tse re di amogelang mo tempeleng. Ka nako ya sakaramente, maloko a Kereke a ntšhafatsa ditsholofetso tse ba di dirileng le Modimo (bona Dithuto le Dikgolagano 20:77, 79).

Dikgolagano di re Thusa go Tshela ka Tshiamo

Ka nako ya kolobetso, re solofetsa go sala Jeso Keresete morago, go Mo gakologelwa ka metlha, le go tshegetsa ditaelo (bona Dithuto le Dikgolagano 20:37). Modimo o solofeditse gore Mowa o o Boitshepo o tlaa nna le rona ka metlha.

Fa banna ba amogela boperesiti, ba solofetsa go tshela ba tshwanela thata ya boperesiti jwa Modimo. Modimo o ba solofetsa go ba segofatsa. (Bona Dithuto le Dikgolagano 84:33–40.)

Setshwantsho sa Tempele ya Recife Brazil ka James Porter

Dikgolagano Tse Re di Dirang mo Tempeleng

Fa maloko a Kereke a a amogela endaomente ya bone mo tempeleng, ba solofetsa go tshela ka tshiamo le go intsha setlhabelo sa efangele. Ba solofediwa thata go tswa kwa Modimong (bona Dithuto le Dikgolagano 38:32; 109:22).

Ka nako ya kano ya tempele, monna le mosadi ba nyadisiwa ka bosakhutleng mme ba solofetsa go nna boikanyego mongwe go yo mongwe le mo Modimong. Modimo o solofetsa gore ba ka boa ba tshela le Ene e le malwapa ka bosaengkae. (Bona Dithuto le Dikgolagano 132:19-20.)

Re Batho ba Kgolagano

Bao ba lomaganang le Kereke ya ga Jeso Keresete ya Baitshepi ba Malatsi a Bofelo ba nna batho ba kgolagano ba Modimo. Le gone ba rua boswa jwa ditshegofatso le boikarabelo jwa kgolagano ya ga Aberahame (bona Bagalatia 3:27–29). Go nna karolo ya batho ba kgolagano le Modimo go raya gore re a thusana jaaka re atamela Keresete. Le gone go raya gore re dira go thatafatsa Kereke ya Modimo mo lefatsheng. Fa re tshegetsa dikgolagano tsa rona, re ka bona maatla le nonofo go tswa kwa Modimong.

Go tswa mo Dikwalong tse di boitshepo

Fa ba ne ba kolobediwa, Alema le batho ba gagwe ba dira kgolagano go thusana le go obamela ditaelo tsa Modimo (bona Mosia 18:8–11).

Fa ba sena go sokologa, Baga-Nefi-Lehi ba dira kgolagano ya gore ga ba kitla ba dirisa dibetsa tsa bone gape (bona Alema 24:17–19).

Modimo o dirile kgolagano le Aberahame (bona Aberahame 2:9–11).

© 2022 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Liahona wa Kgwedi le kgwedi, Tlhakole 2022. Setswana.18313 763