“Iminqophiso Isiqhagamshelisana noThixo,” Liyahona, EyoMdumba 2022
UMyalezo wangeNyanga weLiyahona, EyoMdumba 2022
Iminqophiso Isiqhagamshelisana noThixo
Ukwenza nokugcina iminqophiso kuzisa iintsikelelo.
Umnqophiso sisithembiso phakathi kukaThixo kunye nabantwana baKhe. Yena ubeka imiqathango yeminqophiso esiyenza naYe. Xa sisenza oko Yena akucelayo, siye sifumane iintsikelelo ezininzi. Kwaye asifumani nje iintsikelelo emhlabeni—xa sisenza kwaye sigcine iminqophiso, siya kubuyela siphile noThixo kunye neentsapho zethu ezulwini ngenye imini.
Iminqophiso kunye neMimiselo
Senza iminqophiso ngelixa lemimiselo ethile. Kufuneka sifumane loo mimiselo kwaye sithobele loo minqophiso khon’ ukuze sibuyele siphile noThixo. Imimiselo yenziwa ngegunya lobubingeleli. Loo mimiselo iquka ubhaptizo nokuqinisekiswa, ukufumana uBubingeleli bukaMelkitsedeke (emadodeni), nemimiselo esiyifumana etempileni. Ngelixa lomthendeleko, amalungu eBandla ahlaziya izithembiso awazenze kuThixo (bona IMfundiso neMinqophiso 20: 77, 79).
Iminqophiso Isinceda Siphile Ngobulungisa
Ngelixa lobhaptizo, sithembisa ukulandela uYesu Krestu, nokusoloko simkhumbula Yena, nokugcina imithetho (bona IMfundiso neMinqophiso 20: 37). UThixo uthembisa ukuba uMoya oyiNgcwele uya kuhlala unathi.
Xa amadoda efumana ububingeleli, wona athembisa ukuphila ngokufanelekele amandla obubingeleli bukaThixo. UThixo uthembisa ukuwasikelela. (Bona IMfundiso neMinqophiso 84:33–40.)
Imizobo yeTempile yaseBrazil Recife iziswa nguJames Porter
Iminqophiso Esiyenza eTempileni
Xa amalungu eBandla efumana isipho esisesawo etempileni, aye athembise ukuphila ngobulungisa kwakunye nokwenzela ivangeli idini. Aye athenjiswe amandla awavela kuThixo (bona IMfundiso neMinqophiso 38:32; 109:22).
Ngelixa lokutywinwa etempileni, umyeni nenkosikazi bayatshata ngonaphakade kwaye bathembise ukunyaniseka komnye nomnye nakuThixo. UThixo uthembisa ukuba bangabuyela kuYe kwaye baphile njengeentsapho ngonaphakade. (Bona IMfundiso neMinqophiso 132:19–20.)
Thina Singabantu boMnqophiso
Abo bazibandakanya neBandla likaYesu Krestu labaNgcwele beMihla yokuGqibela baye babengabantu bomnqophiso bakaThixo. Baye badle ilifa leentsikelelo noxanduva lomnqophiso ka-Abraham (bona AmaGalati 3:27–29). Ukuba yinxalenye yabantu bomnqophiso bakaThixo kuthetha ukuba siyancedana njengoko sisondela ngakumbi kuKrestu. Kukwathetha ukuba sisebenzela ukomeleza iBandla likaThixo emhlabeni. Xa sigcina iminqophiso yethu, singafumana amandla nolomelezo oluvela kuThixo.
© 2022 yi-Intellectual Reserve, Inc. All rights reserved. Ishicilelwe e-USA. Isivumelo sesiNgesi: 6/19. Isivumelo senguqulelo: 6/19. Inguqulelo yeMonthly Liahona Message, February 2022. Xhosa. 18313 774