Porous ren Liahona Iteiten Maram, March 2022

Angang non Wis seni Mwichefen

Sou emwenin Mwichefen ra tingorei chon mwichefen ar repwe angang non ekkoch kinikin ra iteni “wis.” Wis ra ngeni chon mwichefen ewe tufichin ar repwe angang ngeni ekkoch me repwe feito arap ngeni Kot.

Sasing seni David Bowen Newton

Nupwen sia angang non wisach kewe, sia aninis ne apwonueta an Kot angang. Sia aiti ekkoch usun Samach non Nang me Jises Kraist me anisi ekkewe sia aitir ar repwe feito arap ngeni Ir. Sia pwan angei feioch nupwen sia tupen ne angang.

Angei ekkewe Wis

Ekkewe ir ra angang non ewe Mwichefen ra kokko me ren Kot. Sou emwenin Mwichefen ra iotek ren ourour ar repwe sinei ion repwe tingorei an epwe angang non ew me ew wis. Mwirin emon sou emwen a tingorei emon chon mwichefen an epwe angang me awewei angangen ewe wis. Chon Mwichefen ra ketiw me non ew mwichen Mwichefen ikewe chon ewe wart ika pranch ra awora ew ketiwen vote. Ei wewen pwa ra mochen repwe anisi ewe aramas a kokko ngeni ewe wis. Iwe mwirin ewe chon mwichefen epwe angei ew efeioch me ren emon sou emwenin pristut. Ei a iteni ewisa ngeni. Ewe chon mwichefen epwe kawor ngeni mumuta an epwe fori angangen non ewe wis me ekkoch pwan efeioch an epwe anisi i ne angang.

Pisop

Emon pisop i ewe sou emwenin ew wart. (Non ew pranch, emon presetenin pranch mi wewe ngeni emon pisop.) Ewe presetenin steik a pesei iten emon mi nimenimoch mi wor ren ewe pristut an epwe kokko ngeni an epwe emon pisop. Ewe Aewin Presetensi a etiwa ewe wis. Iwe mwirin ewe pisop a ketiw me ewis ngeni ewe wis an epwe angang. I a pwan angei kiien pristut, minne wewen i a wor ren ewe mumuta an epwe emweni ewe wart. Ren wisan pisop, i a angang me emweni meinisin chon ewe wart.

Presetensi

Mwichen Pristut me Relief Society, Young Women, Primary, me mwichen Sukunen Raninfel ra emwen me ren ekkewe presetensi, napengeni emon preseten me ruemon chon aninis. Presetensin mwichen Elter ra kokko me ewis me ren ewe prestensin steik. Ewe mwichen pisop a tingorei chon mwichefen ar repwe angang non ekkewe ekkoch presetensi non ewe wart me ra ewisa ngenir ekkewe wis. Meinisin sou emwen ra angang ngeni chon ar kewe mwich ika kewe mwichen aramas. Ra iamwiri ekkewe mettoch mi auchea ngeni ekkewe chon mwichefen me anisir ar repwe mefi an Kot tong.

Ekkoch Wis

Ekkoch pwan wis non Mwichefen mi pachenong asukun, aninis ren keen, tumunu rekot, ota pekin urumot fan iten sarafo ika semirit, me angang non pwan ekkoch napanap. Ew me ew wis non ewe Mwichefen mi auchea me a awora ngeni chon mwichefen ew tufichin ar repwe angang ngeni ekkoch me angang ngeni Kot. Nupwen kich meinisin sia angang fengen ne apwonueta wisach, sia apochokuna ekkoch me anisi ewe Mwichefen epwe marita.

Seni ekkewe Pukefel

Wis ne angang non ewe Mwichefen ra feito seni Kot (nengeni Nongonongen Achifouwa 1:5).

Sia kokko me ewis ngeni ew wis me mwen sia angang non ew wis (nengeni Doctrine and Covenants 42:11).

Nupwen sia angang non wisach kewe, sia aninis ne aueta ewe Mwichefen (nengeni Doctrine and Covenants 84:109–10).

Kaeo Ifa Usun om Kopwe Fori Wisom we

An wor wisom ina ew watten tufich om kopwe angang ngeni ekkoch. Ew me ew wis mi pwisin wor tettenin angangan, iwe mi auchea om kopwe kaeo usur nupwen ka poputa ne angang. Ikkei ekkoch pekin aninis epwe anisuk:

• Porous ngeni ewe sou emwen ewe a ngonuk ewe wis. Eis met sokkun pekin kaeo ka tongeni angei.

• Kutta usun wisom we me non noun Mwichefen we Pukenapen Emwen, a wor won ChurchofJesusChrist.org. Mi wok sopwun won Relief Society, mwichen elter, Primary, me pwan ekkoch.

• Iotek fan iten ourour, me kaeo ekkewe pukefel me afanafenen mwichenap ren wisom we non om ekiek. Samach non Nang epwe efeiochuk ne angangoch ngeni Noun semirit.

© 2022 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porouse ren Liahona Iteiten Maram, March 2022. Chuukese. 18296 901