Bulanan nga Mensahe sa Liahona, Marso 2022

Pagserbisyo sa mga Calling sa Simbahan

Ang mga lider sang Simbahan nagapangabay sa mga miyembro nga magserbisyo sa partikular nga mga buluhaton nga ginatawag “mga calling.” Ang mga calling nagahatag sa mga miyembro sang kahigayunan nga magserbisyo sa iban kag mangin mas malapit sa Dios.

tawo nga nagapungko sa wheelchair nga nagatudlo sa klase sa Simbahan

Litrato ni David Bowen Newton

Kon magserbisyo kita sa aton mga calling, nagabulig kita nga matuman ang buluhaton sang Dios. Ginatudloan naton ang iban parte sa Amay nga Langitnon kag kay Jesucristo kag ginabuligan ang aton mga ginatudloan nga mas magpalapit pa gid sa Ila. Makabaton man kita sang mga bugay kon magserbisyo kita sing matutom.

Pagbaton sang mga Calling

pamatan-on nga nagatindog sa atubang sang kongregasyon sa Simbahan

Ang mga nagaserbisyo sa Simbahan gintawag sang Dios. Nagapangamuyo ang mga lider sang Simbahan para sa inspirasyon agud mahibal-an kon sin-o ang tawgon nga magserbisyo sa tagsa ka calling. Dayon ginapangabay sang lider ang miyembro nga magserbisyo kag ginapaathag ang mga tulumanon sang sina nga calling. Ang mga miyembro ginasakdag sa isa ka miting sang Simbahan kon sa diin ang mga miyembro sang ward ukon branch nagahatag sang nagasakdag nga boto. Buot silingon handa sila nga suportahan ang tawo nga ginatawag. Dayon ang miyembro pagahatagan sang bendisyon sang lider sang priesthood. Ginatawag ini nga pagset-apart. Pagahatagan ang miyembro sang awtoridad nga maggiho sa calling niya kag iban pa nga mga bugay para buligan sia nga magserbisyo.

Mga Bishop

Ang bishop amo ang lider sang isa ka ward. (Sa isa ka branch, ang branch president daw pareho man sang bishop.) Ang pangulo sang stake nagarekomenda sang kaangay-angay nga nagakapot sang priesthood para tawgon nga bishop. Ginaaprubahan sang Unang Pangulohan ina nga calling. Dayon ginasakdag ang bishop kag ginaset-apart para magserbisyo. Nagabaton man sia sang mga yabi sang priesthood, nga buot silingon may awtoridad sia nga magdumala sang ward. Bilang bishop, nagaserbisyo sia kag nagapamuno sa tanan nga mga miyembro sang ward.

Mga Pangulohan

Ang mga korum sang priesthood kag ang mga organisasyon sang Relief Society, Young Women, Primary, kag Sunday School ginapangunahan sang mga pangulohan, masami sang presidente kag duha ka manuglaygay. Ang mga pangulohan sang korum sang mga elder ginatawag kag ginaset-apart sang pangulohan sang stake. Ginapangabay sang bishopric ang mga miyembro nga magserbisyo sa iban pa nga mga pangulohan sa ward kag ginaset-apart sila. Ang tanan nga mga lider nagaserbisyo sa mga miyembro sa ila mga korum ukon mga organisasyon. Ginaatipan nila ang mga panginahanglan sang mga miyembro kag ginabuligan sila nga mabatyagan ang pagpalangga sang Dios.

babayi nga nagadala sang pagkaon sa nanay nga nagakugos sang bata

Iban pa nga mga Calling

Ang iban nga mga calling sa Simbahan nagalakip sang pagtudlo, pagbulig sa musika, pagtago sang mga rekord, pagplano sang aktibidades para sa mga lamharon ukon kabataan, kag pagserbisyo sa iban pa nga mga paagi. Ang tagsa ka calling sa Simbahan importante kag nagahatag sa mga miyembro sang kahigayunan nga magserbisyo sa iban kag magserbisyo sa Dios. Samtang nagagiho kita sing ululupod sa pagtuman sang aton mga calling, ginapabakod naton ang iban kag ginabuligan nga magdako ang Simbahan.

Gikan sa Balaan nga mga Kasulatan

Ang mga tawag sa pagserbisyo sa Simbahan nagahalin sa Dios (tan-awa sa Mga Artikulo sang Pagtuo 1:5).

Ginatawag kita kag ginaset-apart antes kita magserbisyo sa isa ka calling (tan-awa sa Doktrina kag mga Kasugtanan 42:11).

Samtang nagaserbisyo kita sa aton mga calling, nagabulig kita sa pagpasad sang Simbahan (tan-awa sa Doktrina kag mga Kasugtanan 84:109–10).

Paghibalo Kon Paano Obrahon ang Imo Calling

Ang pag-angkon sang calling isa ka maayo nga oportunidad sa pag-alagad sa iban. Ang tagsa ka calling may kaupod nga mga tulumanon, gani importante nga matun-an ang mga ini sa imo pagsugod sa pagserbisyo. Ari ang pila sa mga makabulig sa imo:

• Istoryaha ang lider nga naghatag sa imo sang calling. Magpamangkot kon ano nga paghanas ang pwede mo mabaton.

• Pangitaa ang imo calling sa General Handbook sang Simbahan, nga makita sa ChurchofJesusChrist.org. May mga kapitulo ini para sa Relief Society, korum sang mga elder, Primary, kag madamo pa.

• Magpangamuyo para sa inspirasyon, kag tun-i ang balaan nga mga kasulatan kag mga pamulong-pulong sa pangkabilogan nga komperensya nga ginapamensar ang imo calling. Bugayan ka sang Amay nga Langitnon para maserbisyuhan ang Iya mga anak sing maayo.

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, March 2022. Hiligaynon. 18296 861