Ọ̀rọ̀ Oṣoòṣù Làìhónà , Oṣù Kẹta 2022

Sísìn nínú Àwọn Ìpè Ìjọ

Àwọn olórí Ìjọ máa nsọ fún àwọn ọmọ ìjọ láti sìn ní àwọn ìpò ìfiṣẹ́rán pàtó tí a mọ̀ sí “àwọn ìpè.” Àwọn ìpè nfún àwọn ọmọ ìjọ ní ààyè láti sin àwọn ẹlòmíràn kí wọn ó sì súnmọ́ Ọlọ́run síi.

ọkùnrin lórí àga-ìfirìn kan nkọ́ni ní kíláàsì Ìjọ kan

Àwòrán láti ọwọ́ David Bowen Newton

Nígbàtí a bá sìn nínú àwọn ìpè wa, a nṣe ìrànwọ́ láti mú iṣẹ́ Ọlọ́run di síṣe. A nkọ́ àwọn ẹlòmíràn nípa Baba Ọrun àti Jésù Krístì a sì nran àwọn tí a nkọ́ lọ́wọ́ lati súnmọ́ Wọn. Àwa bákannáà ngba ìbùkún bí a ti nsìn pẹ̀lú òtítọ́.

Gbígba Àwọn Ìpè

Ọ̀dọ́mọkùnrin ndúró níwájú ìpéjọpọ̀ Ijọ kan

Àwọn tí wọ́n njọ́sìn nínú Ìjọ ni a pè láti ọwọ́ Ọlọ́run Àwọn olùdarí Ijọ máa ngbàdúrà fún ìmísí láti mọ ẹnití wọn le sọ fún láti sìn nínú ìpè kọ̀ọ̀kan. Olórí kan nígbànáà á sọ fún ọmọ ìjọ kan láti sìn yío sì ṣe àlàyé àwọn ojúṣe ti ìpè náà Àwọn ọmọ ìjọ ni a máa nmúdúró nínú ipàdé Ìjọ kan níbití àwọn ọmọ ijọ ní wọ́ọ̀dù tàbí ẹka yío ti fi ìbò ìmúdúró lélẹ̀. Èyí túmọ̀ sí pé wọ́n ṣetán láti ṣe àtìlẹ́hìn fún ẹni náà tí a pè. Lẹ́hìnnáà ni a ó fún ọmọ ijọ náà ní ìbùkún láti ọwọ́ olùdarí olóyè àlùfáà kan. Èyí ni a pè ní jíjẹ́ yíyà sọ́tọ̀. Ọmọ ijọ náà ni a ó fún ní àṣẹ láti ṣiṣẹ́ nínú ìpè náà àti àwọn ìbùkún míràn láti ran ọkùnrin tàbí obìnrin náà lọ́wọ́ lati sìn.

Àwọn bíṣọ́ọ̀pù

Bíṣọ́ọ̀pù ni olórí wọ́ọ̀dù kan. (Ní ẹ̀ka kan, ààrẹ ẹ̀ka dàbíi bíṣọ́ọ̀pù) Ààrẹ èèkàn ni ó máa ndábàá olùdìmúi oyè àlùfáà yíyẹ kan láti jẹ́ pípè bíi bíṣọ́ọ̀pù. Àjọ Ààrẹ Kínní máa nfi ọwọ́ sí ìpè náà. Lẹ́hìnnáà à nṣe ìmúdúró Bíṣọ́ọ̀pù náà àti yíyà á sọ́tọ̀ láti sìn. Òun bákannáà yío gba àwọn kọ́kọ́rọ́ oyè àlùfáà, èyítí ó túmọ̀ sí pé ó ní àṣẹ láti darí wọ́ọ̀dù náà. Bíi bíṣọ́ọ̀pù, ó nsìn ó sì ndarí gbogbo àwọn ọmọ ijọ ti wọ́ọ̀dù náà.

Àwọn Àjọ Ààrẹ

Àwọn ìkójọ iyejú Oyè Àlùfáà ati Ẹgbẹ́ Ìrànlọ́wọ́, Àwọn Ọdọ́mọbìnrin, Alákọ́bẹ̀rẹ̀, àti Ilé Ẹ̀kọ́ Ọjọ́ Ìsinmi ni a ndarí nípasẹ̀ àwọn àjọ ààrẹ, bí àtẹ̀hìnwá ààrẹ kan àti olùdámọ̀ràn méjì. Àwọn àjọ ààrẹ iyejú àwọn alàgbà ni a npè tí a sì nyasọ́tọ̀ láti ọwọ́ ajọ ààrẹ èèkàn. Àjọ bíṣọ́ọ̀pù nsọ fún àwọn ọmọ ijọ láti sìn nínú àwọn àjọ ààrẹ míràn nínú wọ́ọ̀dù wọn á sì yà wọ́n sọ́tọ̀. Gbogbo àwọn olórí nsin àwọn ọmọ ijọ nínú àwọn iyejú tàbí àwọn ìkójọ wọn. Wọ́n nṣe iṣẹ́ ìránṣẹ́ sí àìní àwọn ọmọ ijọ wọ́n sì nràn wọ́n lọ́wọ́ láti ní ìmọ̀lára ìfẹ́ Ọlọ́run.

obìnrin ngbé oúnjẹ wá fún ìyá kan tí ó gbé ọmọ lọ́wọ́

Àwọn Ìpè Míràn

Nínú àwọn ìpè Ìjọ míràn ni ìkọ́ni, ṣíṣe ìrànlọ́wọ́ pẹ̀lú orin, ìpamọ́ àwọn àkọsílẹ̀, ṣíṣe ètò àwọn ìṣe ìdárayá fún àwọn ọ̀dọ́ àti àwọn ọmọdé, àti sísìn ní àwọn ọ̀nà míràn. Ìpè kọ̀ọ̀kan nínú Ìjọ ṣe pàtàkì ó sì nfún àwọn ọmọ ìjọ ní ààyè láti sin àwọn ẹlòmíràn àti láti sin Ọlọ́run. Bí gbogbo wa ti nṣiṣẹ́ papọ̀ láti mú àwọn ìpè wa ṣẹ, a nfún àwọn ẹlòmíràn lókun a sì nran Ìjọ lọ́wọ́ láti dàgbà.

Láti inú àwọn Ìwé-mímọ

Àwọn ìpè láti sìn nínú Ijọ nwa láti ọ̀dọ̀ Ọlọ́run (wo Àwọn Nkan Ìgbàgbọ́ 1:5).

A njẹ́ pípè àti yíyàsọ́tọ̀ kí a to le sìn nínú ìpè kan (wo Ẹ̀kọ́ àti àwọn Májẹ̀mú 42:11).

Bí a ṣe nsìn nínú àwọn ìpè wa, a nṣe ìrànwọ́ láti gbé Ìjọ sókè (wo Ẹ̀kọ́ àti àwọn Májẹ̀mú 84:109–10).

Kíkọ́ Bí Ẹ Ó ti Ṣe Ìpè Yín

Níní ìpè kan jẹ́ ànfààní pàtàkì láti sin àwọn ẹlòmíràn. Ìpè kọ̀ọ̀kan ní àwọn ọ̀wọ́ ojúṣe tirẹ̀, nítorínáà ó ṣe pàtàkì láti kọ́ wọn bí ẹ ti bẹ̀rẹ̀ láti sìn. Nihin ni díẹ̀ lára àwọn ohun èlò láti ràn yín lọ́wọ́:

• Bá olórí tí ó fún ọ ní ìpè náà sọ̀rọ̀. Bèrè ìdánilẹ́kọ̀ọ́ tí o le gbà.

• Wá ìpè rẹ wò nínu Ìwé Ìléwọ́ Gbogbogboti Ìjọ, ó wà lórí ChurchofJesusChrist.org. Ó ní àwọn orí nípa Ẹgbẹ́ Ìrànlọ́wọ́, iyejú àwọn alàgbà, Alákọ̀ọ́bẹ̀rẹ̀, àti bẹ́ẹ̀ bẹ́ẹ̀ lọ.

• Ẹ gbàdúrà fún ìmísí, kí ẹ sì ṣe àṣàrò àwọn ìwé mímọ́ pẹ̀lú ìpè yín nínú ọ̀kàn. Baba Ọrun yío bùkún yín láti sin àwọn ọmọ Rẹ̀ dáradára.

© 2022 láti ọwọ́ Intellectual Reserve, Inc. Gbogbo àwọn ẹ̀tọ́ ni a fi pamọ́. A tẹ̀ẹ́ ní USA. Àṣẹ Èdè Gẹẹsì: 6/19. Àṣẹ Ìyírọ̀padà-èdè: 6/19. Ìyírọ̀padà-èdè ti Ọrọ Oṣoòṣù Lìàhónà, Oṣù Kẹta 2022. Yoruba. 18296 779