Mesaj Mansyèl Liahona , Avril 2022

Sentsèn nan: Yon Fason Pou Sonje Sovè a

Dènye Soupe a, pa Simon Dewey.

Nan jou swa avan yo te kloure L sou kwa, Jezikri te rankontre ak Apot Li yo nan Dènye Soupe a. La a, Li te ba yo sentsèn nan pou lapremyè fwa. Li te eksplike yo ke se te yon fason pou yo sonje Li. Sentsèn se yon òdonans kote nou pataje pen ak dlo pou nou sonje Ekspyasyon Jezikri a. Pen an reprezante kò Jezi epi dlo a reprezante san Li.

Nou pran sentsèn chak Dimanch pandan reyinyon sentsèn nan. Nou chante yon kantik pandan detantè prètriz yo kase pen an an plizyè ti moso.

Detantè prètriz yo ki kase pen an di priyè ki espesyal. Nou jwenn priyè sa yo nan Doktrin ak Alyans 20:77, 79. Priyè yo fè nou sonje kisa nou pwomèt Pè Selès la ak kisa Li pwomèt nou.

Lòt detantè prètriz distribye sentsèn nan bay manm pawas la oswa bay manm nan branch lan. Pandan n ap pran sentsèn nan, nou sonje Sovè a ak sakrifis Li fè pou nou an. Nou repran angajman pou nou respekte alyans (pwomès) nou te fè avèk Pè Selès la tou.

Nou dwe gen reverans pandan y ap beni ak distribye sentsèn nan. Se yon moman pou nou reflechi sou lavi Jezikri, sou ansèyman L yo ak Ekspyasyon an. Nou ka reflechi sou fason nou ka suiv egzanp Li tou.

Mo pou nou konnen

Òdonans: Se yon aksyon fòmèl e sakre ki akonpli pa otorite prètriz la.

Detantè prètriz: Gason ak jènjan diy ki resevwa otorite pou yo aji nan non Jezikri.

Ekpyasyon Jezikri a: Soufrans Li pou peche nou yo, lanmò L sou lakwa, ak Rezirèksyon Li, ki rann posib pou nou retounen al viv avèk Bondye.

Dekouvri Plis

Si w gen kesyon sou sentsèn nan, ou ka pale avèk frè ak sè sèvis pastoral ou yo, ak dirijan pawas oswa branch ou yo, oswa misyonè yo.

© 2022 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, April 2022. Haitian Creole. 18314 036