Kajjojo Allōn̄ N̄an Kōkajoorļo̧k Jodikdik ro Ennaan, Eprōļ 2022

En̄taan eo an Rilo̧mo̧o̧r eo

Jibukwi iiō ko m̧okta jān an Jisōs Kraist kar itok, Aiseia ekar lo An en̄taan kōn jerawiwi ko ad.

Aiseia 53:3–5

3 E ej juon armej kar kajōkdo̧o̧ne im joļo̧k E; E juon armej in būrom̧ōj, im Eaar jeļā liaajlo̧ļ: im jaar pinej mejād jān E; kar kōjekdo̧o̧n E, im jaar jab kaorōk E.

4 E m̧ool Ear ineek liaajlo̧ļ ko ad, im bōkļo̧k būrom̧ōj ko ad: a jaar ļōmņak Anij Eaar m̧an E, im den̄ļo̧ke E, im kaen̄taan E.

5 Ak Ekar kinejnej kōn bōd ko ad, Ekar mao kōn nana ko ad: kaje eo an adwōj aenōm̧m̧an eaar pād Ioon; im kāājmour kōj kōn depetpet ko An.

kajekdo̧o̧ne im joļo̧ke

Ke Jisōs Kraist ekar itok n̄an laļ in, jet armej raar tōmak E, ak jet rekar jab. Rekar kajejtokjeņ E, ak elōn̄ raar dike E. Ilo jem̧ļo̧kin, armej ro rekar pepe n̄an kakkure im m̧an E. (Lale 1 Nipai 19:9.)

Eaar ineek būrom̧ōj ko ad

Jisōs Kraist ekar bōk Ioon make metak ko ad, nan̄inmej, im m̧ōjņo̧. E ekar kōm̧m̧an āindein bwe E en tūriam̧o kake kōj im jeļā jipan̄ kōj. (Lale Alma 7:11–13.)

eaar kinejnej kōn bōd ko ad

Jisōs Kraist eaar en̄taan kōn jerawiwi ko ad. E ekar kōm̧m̧an āindein bwe jen maron̄ bōk jeo̧rļo̧k in bōd n̄e jej ukweļo̧k. (Lale Katak im Bujen Ko 18:11; 19:15–19.)

im kōn jenkwan den̄den̄ ko An jej bōk kōmour

“Jenkwan den̄den̄ ko An” rej kinej ko An. Aolep men kein rej jutak kōn en̄taan eo An n̄an kōj, ekoba toorļo̧k in Bōtōktōkin im mej eo An. Kōnke Jisōs Kraist ekar en̄taan kōn kōj, jemaron̄ in bar mour. An en̄taan ekkōm̧m̧an bwe jen maron̄ bōk jeo̧rļo̧kin bōd. Ilo ad ukweļo̧k im kajjieon̄ in kōjparok bujen ko ad, Ej kōmour kōj im ukōt kōj. (Lale Mosaia 3:7–11; Laajrak in Tōmak ko 1:3.)

© 2022 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin pelle: 6/19. Kōmālim ukook eo: 6/19. Ukook eo an Monthly For the Strength of Youth Message, April 2022. Marshallese. 18314 874