Diosnon nga Gugma sa Plano sang Amay

Mga Sinambit (Excerpts)

Ni Pangulong Dallin H. Oaks

Unang Manuglaygay sa Unang Pangulohan

kabukiran nga nagapangibabaw sa tunga sang mga panganod

Sa ginpanumbalik nga Simbahan ni Jesucristo sang mga Santos sa Ulihing mga Adlaw, may pinasahi kita nga paghangop sang plano sang aton Amay nga Langitnon. Nagahatag ini sa aton sang lain nga paagi sa pagtan-aw sang katuyuan sang kabuhi sa duta, sang diosnon nga paghukom nga magasunod sini, kag sang mahimayaon nga kadangatan sang tanan nga mga anak sang Dios sa ulihi. …

… Ang ginpahayag nga doktrina sang ginpanumbalik nga Simbahan ni Jesucristo nagatudlo nga ang tanan nga anak sang Dios—luwas lang gid sang tama kadiutay nga makabig diri—sa ulihi magatupa sa isa ka ginharian sang himaya. …

… Ang pinakamataas sini amo ang pangkahitaasan sa selestiyal nga ginharian, kon sa diin sarang kita nga mangin pareho sa aton Amay kag sa Iya Anak, nga si Jesucristo. …

… Ang misyon sang ginpanumbalik nga Simbahan amo nga buligan ang tanan nga anak sang Dios nga mangin kalipikado sa ginahandum sang Dios nga ila mangin katapusan nga kadangatan. …

Pundasyon para sa aton amo ang rebelasyon sang Dios nga ang pangkahitaasan malab-ot lamang paagi sa katampad sa mga kasugtanan sang wala katapusan nga pag-asawahay sa tunga sang isa ka lalaki kag isa ka babayi. Ina nga diosnon nga doktrina amo ang rason nga nagatudlo kita nga “Ang gender [sahi] isa ka kinahanglanon nga kinaiya sang indibidwal para sa wala pa mabun-ag, mortal, kag wala’y katapusan nga palatandaan kag katuyuan” [“Ang Panimalay: Isa ka Proklamasyon sa Kalibutan,” ChurchofJesusChrist.org]. …

… Ginapabakod naton nga ang proklamasyon parte sa pamilya, nga natukod sa indi mabag-o nga doktrina, nagapahamtang sang klase sang mga relasyon sa pamilya kon sa diin nagakatabo ang pinakaimportante nga bahin sang aton pag-uswag sa wala katapusan. …

… Kinahanglan naton himulatan nga ipaambit ining mga kamatuoran sang wala katapusan sa iban. Pero upod ang pagpalangga nga dapat naton ihatag sa tanan naton nga isigkatawo, ginabaton naton pirme ang ila mga desisyon. Sa gintudlo sang isa ka propeta sa Libro ni Mormon, dapat kita nga magdutdot pasulong, nga may “gugma sang Dios kag sang tanan nga mga tawo” [2 Nefi 31:20].

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, May 2022. Hiligaynon. 18351 861