“Nadiosan nga Ayat iti Plano ti Ama,” Liahona, Mayo 2022.
Binulan a Mensahe ti Liahona , Mayo 2022
Nadiosan nga Ayat iti Plano ti Ama
Dagiti Adaw
Iti naisubli a Simbaan ni Jesucristo dagiti Santo iti Ud-udina nga Aldaw, addaantayo iti naidumduma a pannakaawat iti plano ti Nailangitan nga Amatayo. Mangted daytoy kadatayo iti naiduma a wagas a panangkita iti panggep ti mortal a biag, ti nadiosan a panangukom a sumaruno iti daytoy, ken ti ultimo a nadayag a pagtungpalan dagiti amin nga annak ti Dios. …
… Isuro ti naipalgak a doktrina ti naisubli a Simbaan ni Jesucristo nga amin nga annak ti Dios—malaksid kadagiti limitado unay tapno maibilang ditoy—ket agtungpalto iti kamaudiananna iti pagarian ti gloria. …
… Ti kangatuan kadagitoy ket ti pannakaitan-ok iti celestial a pagarian, a mabalintayo nga agbalin a kas iti Amatayo ken ti Anakna, ni Jesucristo. …
… Ti mision ti naisubli a Simbaan ket mangtulong kadagiti amin nga annak ti Dios a maikari para iti tarigagayan ti Dios kas ultimo a pagtungpalanda …
Napateg kadatayo ti paltiing ti Dios a ti pannakaitan-ok ket magun-od laeng babaen ti kinapudno kadagiti katulagan ti agnanayon a kallaysa iti nagbaetan ti maysa a lalaki ken maysa a babai. Dayta a nadiosan a doktrina ti gapu no apay nga isurotayo a “ti katatao ket maysa a kasapulan a pakabigbigan ti tao iti premortal, mortal, ken agnanayon a kinasiasino ken panggep” [“Ti Kaamaan: Maysa a Waragawag iti Lubong,” ChurchofJesusChrist.org]. …
… Pasingkedanmi a ti waragawag ti pamilia, a nabuangay iti saan a mabaliwan a doktrina, ket mangikeddeng iti kita dagiti relasion ti pamilia a mabalin a mapasamak ti kapatgan a paset ti agnanayon a panagdur-astayo. …
… Nasken a kalikagumantayo nga ibinglay dagitoy a kinapudno ti agnanayon kadagiti dadduma. Ngem gapu iti ayat nga utangtayo kadagiti amin a kaarrubatayo, kanayon nga awatentayo dagiti pangngeddengda. Kas insuro ti maysa a propeta ti Libro ni Mormon, nasken nga agtultuloytayo a sitatalingenngen, nga addaan iti “ayat ti Dios ken ti amin a tattao” [2 Nephi 31:20].
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, May 2022. Ilokano. 18351 864