Etop Liahona eke ofuri Ɔfiɔŋ, July 2021

Mme Ŋwed Abasi: Ikɔ Abasi

ubɔk-ŋwet eke prophet Akani Testament kiet

Prophet Akani Testament, otode Judith A. Mehr

Ŋwed Abasi edi ndisana ŋwed emi mme prophet ekenehede ewet. Ŋwed Abasi etiŋ ikɔ ntiense abaŋa Jesus Christ onyuŋ ekpep-ŋkpɔ abaŋa ikɔ Abasi Esie. Ata mme ŋwed Abasi eke Ufɔk Abasi edi Bible (emi esinede Akani Testament ye Obufa Testament), Ŋwed Mormon, Ŋwed Ukpep-ŋkpɔ ye Ediomi, ye Ediye-ŋkpɔ eke Akwa Ekɔm-urua.

Akani Testament

Akani Testament edi ŋwed edinam eke Abasi ye mbon ediomo Esie ke eyo eset. Enye esine mme ukpep-ŋkpɔ eke mme prophet nte Moses, Joshua, Isaiah, Jeremiah, ye Daniel. Okposuk nte ekewetde mmɔ ke ata ediwak isua mbemiso emana Jesus Christ, ediwak mme prophet eke Akani Testament ema ewet ŋkpɔ ebaŋa Enye.

Obufa Testament

Obufa Testament ediwet abaŋa emana, uwem isɔŋ, ukpep-ŋkpɔ, ye Erisio-isop eke Jesus Christ. Enye esine mme ukpep-ŋkpɔ eke mme Apostle Christ ye eke mme mbet efen. Obufa Testament anwam nnyin ndifiɔk nte idinamde ikɔ Abasi Jesus Christ mfin emi.

Jesus Christ ɔkwɔrɔde Ikɔ Abasi ke Obot

Ŋwed Mormon: Udiana Testament Jesus Christ

Ŋwed Mormon edi ŋwed abaŋade ubak mbon emi ekeduŋde ke America eke eset. Enye esine mme ukpep-ŋkpɔ otode mme prophet, ndien akpan ntak esie edi ndinam kpukpru owo efiɔk ete ke Jesus edi Christ. Prophet Joseph Smith akakabare enye oto mme usan-itiat gold oto ke enɔ ye odudu Abasi.

Joseph Smith ɔbɔde eriyarare

Joseph Smith Jr, Ɔbɔde Eriyarare, otode Daniel A. Lewis

Ŋwed Ukpep-ŋkpɔ ye Ediomi

Ŋwed Ukpep-ŋkpɔ ye Ediomi esine mme eriyarare emi ekenɔde Joseph Smith ye mme prophet ekpere edem usen efen. Mme eriyarare oro emen owut nte enamde ŋkpɔ ke Ufɔk Abasi Christ. Mmɔ nko esine mme akpan ukpep-ŋkpɔ ikɔ Abasi kabaŋa itie-oku, mme edinam ikɔ Abasi, ye se iditibede ke uwem emi okurede.

Ediye-ŋkpɔ eke Akwa Ekɔm-urua

Ediye-ŋkpɔ eke Akwa Ekɔm-urua esine ŋwed Moses ye eke Abraham, ikɔ ntiense eke Joseph Smith, ye Ikɔ Mbuɔtidem eke Ufɔk Abasi. Enye nko esine Joseph Smith—Matthew, ubak se Joseph Smith akakabare oto ke Obufa Testament.

Ndikot Ŋwed Abasi

Mme prophet ema ekpep nnyin ete ikoot ŋwed Abasi kpukpru usen. Ndinam ntre anwam nnyin ndikɔri mbuɔtidem nnyin nyuŋ nsaŋa mkpere Ete Heaven ye Jesus Christ. Nte nnyin inehede ikoot ŋwed Abasi, Edisana Spirit eyenwam nnyinndikut mme ibɔrɔ nnɔ mbume nnyin.

Mme Prophet Eyo emi

Iniemi mme prophet ye apostle etiŋde ikɔ ke odudu Edisana Spirit, ikɔ mmɔ etie nte ŋwed Abasi. Uwut-ŋkpɔ kiet ntem edi akwa mbono. Nnyin imikeme ndikot mme ukpep-ŋkpɔ otode akwa mbono ke ŋwed Ɔfiɔŋ May ye November eke Liahona.

Nsidi ntak Okotde Ŋwed Abasi?

Ŋwed Abasi etiŋ ikɔ ntiense abaŋa Jesus Christ (se Jacob 7:10–11).

Enɔ ŋwed Abasi oto ke odudu-spirit Abasi (se 2 Timothy 3:15–16).

Nnyin imikeme ndida ŋwed Abasi nam-ŋkpɔ nsin ke uwem nnyin (se 1 Nephi 19:23).

Moses akande Satan

Moses Akan Satan, otode Joseph Brickey

Ediwak Mbuk kabaŋa Ediye-ŋkpɔ eke Akwa Ekɔm-urua

Ŋwed Moses: Edikabare Prophet Joseph Smith eke mme esisit akpa ibuot ŋwed Genesis. Akpa Ibuot ŋwed Moses edi isio-isio; mme ibuot ŋwed eken abaŋa Genesis 1:1–6:13.

Ŋwed Abraham: Edikabare Prophet Joseph Smith eke se Abraham ekewetde, otode mme nwawaŋa papyrus emi ekekutde ke Egypt.

Ikɔ Mbuɔtidem: Mme udim-ikɔ Duopeta emi Joseph Smith ekewetde emi owutde ɔsɔŋɔ mbuɔtidem nnyin nte mbon Ufɔk Abasi Ɔbɔŋ.

© 2022 otode Intellectual Reserve, Inc. Ekpeme kpukpru unen ndiming. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Etop Liahona eke Ofuri Ɔfiɔŋ, July 2022. Efik. 18298 553