Bosoom Bosoom Liahona Amandzɛɛbɔ, Ayɛwoho 2022

Kyerɛwsɛm: Nyankopɔn Asɛm

Ahyɛmu Dadaw nkɔnhyɛnyi bi a ɔrekyerɛw

Ahyɛmu Dadaw Nkɔnhyɛnyi, Judith A. Mehr yɛɛ nsaano mfonyin no

Kyerɛwsɛm no yɛ nwoma krɔnkrɔn a nkɔnhyɛfo kyerɛɛw ne fã kɛse. Kyerɛwsɛm no gye Jesus Christ ho dase na ɔkyerɛkyerɛ N’asɛmpa ho asɛm. Kyerɛwsɛm a Asɔr no agye ato mu no nye Bible (a Ahyɛmu Dadaw na Ahyɛmu Fofor no kã ho), Mormon Nwoma no, Nkyerɛkyerɛ na Ahyɛmudzi, na Bota a Ɔsom Bo Mapã no.

Ahyɛmu Dadaw

Ahyɛmu Dadaw no yɛ kwan a Nyankopɔn nye tsetse N’ahyɛmu nkorɔfo no nam do ho nkyerɛwee nsɛm. Nkɔnhyɛfo dɛ Moses, Joshua, Isaiah, Jeremiah, na Daniel hɔn nkyerɛkyerɛ kã ho. Wɔkyerɛɛw no mfe ɔha ɔha pii ansaana wɔrowo Jesus Christ dze, naaso Ahyɛmu Dadaw nkɔnhyɛfo no mu pii kyerɛɛw No ho asɛm.

Ahyɛmu Fofor

Ahyɛmu Fofor no kyerɛw Jesus Christ N’awoo, honandua mu somdwuma, nkyerɛkyerɛ, na Werdambɔ ho nsɛm. Christ Asomafo na esuafo binom so hɔn nkyerɛkyerɛ kã ho. Ahyɛmu Fofor no boa hɛn ma yɛtse ase mbrɛ yebesi dze Jesus Christ asɛmpa no abɔ bra ndɛ.

Jesus Christ a Ɔrekã Bepɔw no do Nkyerɛkyerɛ no

Mormon Nwoma no: Jesus Christ Ahyɛmu Kor so

Mormon Nwoma no yɛ nkorɔfo a wɔtsenaa tsetse America asaase tɔw no mu binom hɔn nkyerɛwee nsɛm. Nkɔnhyɛfo hɔn nkyerɛkyerɛ kã ho, na no botae tsitsir ara nye dɛ ɔbɛma nyimpa nyina aagye eedzi dɛ Jesus nye Christ no. Nkɔnhyɛnyi Joseph Smith dze akyɛdze na Nyankopɔn no tum kyerɛɛ ase fi sika mprɛtse do.

Joseph Smith rinya nyikyerɛ

Joseph Smith Kakraba Rinya Nyikyerɛ, Daniel A. Lewis yɛɛ nsaano mfonyin no

Nkyerɛkyerɛ na Ahyɛmudzi

Nyikyerɛ a wɔdze maa Joseph Smith na nda a odzi ekyir nkɔnhyɛfo mu binom wɔ Nkyerɛkyerɛ na Ahyɛmudzi nwoma no mu. Nyikyerɛ no da mbrɛ wobesi bɛkyekyer Christ N’Asɔr no edzi. Asɛmpa nkyerɛkyerɛ a ohia tsitsir a ɔfa asɔfodzi, asɛmpa ayɛdze horow, na dza osi abrabɔ ekyir no so wɔ mu.

Bota a Ɔsom Bo Mapã

Moses na Abraham nwoma, Joseph Smith ne dasegye, na Asɔr no ne Gyedzi ho Nsɛmpɔw no wɔ Bota a Ɔsom Bo Mapã nwoma no mu. Joseph Smith—Matthew, na Joseph Smith ne Ahyɛmu Fofor nkyerɛasee no mu bi wɔ mu.

Kyerɛwsɛm Adzesũa

Nkɔnhyɛfo akyerɛkyerɛ hɛn dɛ yensũa kyerɛwsɛm no daa daa. Yɛreyɛ dɛm no so boa hɛn ma yɛto hɛn gyedzi mu na yɛbɛn Ɔsor Egya na Jesus Christ ara yie. Ber a yesũa kyerɛwsɛm no mpaabɔ mu ara no, Sunsum Krɔnkrɔn no bɔboa hɛn ma yenya hɛn nsɛmbisa ho nyiano.

Ndɛ Mber Nkɔnhyɛfo

Sɛ ndɛ nkɔnhyɛfo na asomafo dze Sunsum Krɔnkrɔn no tum no kasa a, hɔn nsɛm no tse dɛ kyerɛwsɛm. Mfatoho kor nye wiadze mfɛndzanan ehyiadzi yi. Yebotum esũa ehyiadzi mu nkyerɛkyerɛ no efi Liahona Esusow Aketseaba na Ɔberɛfɛw dze no mu.

Dɛn Ntsi na Yɛkenkan Kyerɛwsɛm no?

Kyerɛwsɛm no gye Jesus Christ ho dase (hwɛ Jacob 7:10–11).

Kyerɛwsɛm biara fi Nyankopɔn nkenyan do na wɔdze mae (hwɛ 2 Timothy 3:15–16).

Yebotum yɛdze kyerɛwsɛm no ato hɛn abrabɔ ho (hwɛ 1 Nephi 19:23).

Moses ridzi Satan do konyim

Moses Dzi Satan do Konyim, Joseph Brickey yɛɛ nsaano mfonyin no

Bota a Ɔsom Bo Mapã no mu nsɛm binom so

Moses Nwoma: Nkɔnhyɛnyi Joseph Smith no ne Genesis nwoma no etsir kakra ara a odzi kan no ne nkenyan nkyerɛasee. Moses nwoma no tsir 1 yɛ soronko; etsir nkaa no gyina Genesis 1:1–6:13 do.

Abraham Nwoma: Nkɔnhyɛnyi Joseph Smith ne nkenyan nkyerɛasee wɔ Abraham nkyerɛwee ho a, ɔwɔ papyrus nwoma a wohun no wɔ Egypt do.

Gyedzi ho Nsɛmpɔw: Nsɛntɔw duebiasa a Joseph Smith kyerɛwee, a ɔkyerɛɛw dza yɛgye dzi tsitsir dɛ Ewuradze N’Asɔr mu asɔrmba no nkorkor.

© 2022 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, July 2022 ne nkyerɛasee. Fante. 18298 502