Mesaj Mansyèl Liahona, Jiyè 2022

Ekriti yo: Pawòl Bondye

Pwofèt Ansyen Testaman, tablo Judith A. Mehr

Ekriti yo se liv sakre ki ekri patikilyèman pa pwofèt. Ekriti yo temwaye konsènan Jezikri epi yo anseyye nou sou levanjil Li a. Ekriti ofisyèl yo nan Legliz la se Bib la (ki gen ladan Ansyen Testaman ak Nouvo Testaman an), Liv Mòmon an, Doktrin ak Alyans yo ak Pèl Gran Pri a.

Ansyen Testaman

Ansyen Testaman an se yon rejis sou rapò Bondye te genyen avèk pèp alyans Li a nan ansyen tan yo. Li gen ladan ansèyman pwofèt tankou Moyiz, Jozye, Izaak, Jeremi ak Danyèl. Menmsi li te ekri dèmilye ane avan nesans Jezikri, anpil pwofèt nan Ansyen Testaman an te ekri konsènan Li.

Nouvo Testaman

Nouvo Testaman an rapòte nesans, lavi mòtèl, ansèyman ak Ekspyasyon Jezikri. Li gen ansèyman Apot Kris yo ladan l ak pa lòt disip tou. Nouvo Testaman ede nou konprann kijan pou nou viv levanjil Jezikri a jounen jodiya.

Liv Mòmon an: Yon lòt temwayaj konsènan Jezikri

Liv Mòmon an se yon rejis sou moun ki te viv nan ansyen Amerik yo. Li gen ladan ansèyman anpil pwofèt, epi objektif prensipal li se konvenk tout pèp ke Jezi se Kris la. Pwofèt Joseph Smith te tradui l apati plak lò, grasa don ak pouvwa Bondye.

Joseph Smith Jr. K ap Resevwa Revelasyon, tablo Daniel A. Lewis

Doktrin ak Alyans

Doktrin ak Alyans genyen revelasyon yo te bay Joseph Smith ak pwofèt dènye jou yo. Revelasyon yo dekri kijan Legliz Jezi a òganize. Yon genyen ansèyman levanjil enpòtan sou prètriz la, òdonans levanjil yo ak sa ki rive apre lavi sa a.

Pèl Gran Pri

Pèl Gran Pri a gen ladan liv Moyiz ak Abraram yo, temwanyaj Joseph Smith ak Atik Lafwa Legliz la. Li genyen tou Joseph Smith—Matye, yon pati nan tradikyon Joseph Smith la sou Nouvo Testaman an.

Etidye ekriti yo

Pwofèt yo anseye nou pou nou etidye ekriti yo chak jou. Lè nou fè sa, sa ogmante lafwa nou epi nou vin pi pre Papa nou ki nan Syèl ak Jezikri. Pandan n ap etidye ekriti yo nan lapriyè, Sentespri a ap ede nou jwenn repons pou kesyon nou yo.

Pwofèt Modèn yo

Lè pwofèt yo ak apot yo pale jounen jodiya pa pouvwa Sentespri a, pawòl yo se tankou ekriti. Yon egzanp sou sa se konferans jeneral. Nou ka etidye ansèyman yo bay nan konferans yo nan revi mwa Me ak Novanm Liahona a.

Poukisa nou Li Ekriti yo?

Tout ekriti yo temwaye konsènan Jezikri (gade Jakòb 07:10–11).

Se enspirasyon Bondye ki bay ekriti yo (gade 2 Timote 3:15–16).

Nou ka mete ekriti yo ann aplikasyon nan lavi nou (gade 1 Nefi 19:23).

Moyiz Gen Viktwa Sou Satan, tablo Joseph Brickey

Plis Detay sou Pèl Gran Pri a

Liv Moyiz la: Tradiksyon enspire Pwofèt Joseph Smith sou kèk premye chapit nan liv Jenèz la. Chapit 1 liv Moyiz la san parèy; rès chapit la baze sou Jenèz 1:1–6:13.

Liv Abraram: Se tradiksyon enspire Pwofèt Joseph Smith sou ekri Abraram yo, apati woulo papiris yo jwenn nan peyi Lejip.

Atik Lafwa: Trèz deklarasyon Joseph Smith ekri ki bay lis kwayans prensipal nou antanke manm Legliz Senyè a.

© 2022 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, July 2022. Haitian Creole. 18298 036