“Balaan nga mga Kasulatan: Ang Pulong sang Dios,” Liahona, Hulyo 2022.
Bulanan nga Mensahe sa Liahona, Hulyo 2022
Balaan nga mga Kasulatan: Ang Pulong sang Dios
Old Testament Prophet [Propeta sa Daan nga Katipan], ni Judith A. Mehr
Ang balaan nga mga kasulatan mga balaan nga libro nga ginsulat sang mga propeta. Ang balaan nga mga kasulatan nagapamatuod parte kay Jesucristo kag nagatudlo parte sa Iya ebanghelyo. Ang aprobado nga balaan nga mga kasulatan sang Simbahan amo ang Biblia (nga nagalakip sang Daan nga Katipan kag Bag-ong Katipan), ang Libro ni Mormon, ang Doktrina kag mga Kasugtanan, kag ang Perlas nga Bilidhon.
Daan nga Katipan
Ang Daan nga Katipan isa ka rekord parte sa mga pagpakig-angot sang Dios sa Iya katawhan sa kasugtanan sang dumaan nga panahon. Nagalakip ini sang mga pinanudlo sang mga propeta pareho nanday Moises, Josue, Isaias, Jeremias, kag Daniel. Bisan pa nga ginsulat ini ginatos na katuig antes sang pagkabata kay Jesucristo, madamo nga mga propeta sa Daan nga Katipan ang nagsulat parte sa Iya.
Bag-ong Katipan
Ang Bag-ong Katipan nagarekord sang pagkabun-ag, mortal nga kabuhi, mga pinanudlo, kag Pagbayad-Sala ni Jesucristo. Nagalakip man ini sang mga pinanudlo sang mga Apostoles ni Cristo kag sang iban pa nga mga propeta. Ang Bag-ong Katipan nagabulig sa aton nga maintiendihan kon paano ipangabuhi ang ebanghelyo ni Jesucristo sa karon nga panahon.
Libro ni Mormon: Isa Pa Ka Katipan Nahanungod kay Jesucristo
Ang Libro ni Mormon isa ka rekord parte sa pila ka mga tawo nga nagpuyo sa dumaan nga kadutaan sang Amerika. Nagalakip ini sang mga pinanudlo sang mga propeta, kag ang mayor nga katuyuan sini amo ang kumbinsihon ang tanan nga katawhan nga si Jesus amo ang Cristo. Ang Propeta nga si Joseph Smith ang naglubad sini halin sa bulawan nga mga lamina paagi sa dulot kag gahum sang Dios.
Joseph Smith Jr. Receiving Revelation [Si Joseph Smith Jr. nga Nagabaton sang Rebelasyon], ni Daniel A. Lewis
Doktrina kag mga Kasugtanan
Ang Doktrina kag mga Kasugtanan nagaunod sang mga rebelasyon nga ginhatag kay Joseph Smith kag sa iban pa nga mga propeta sa ulihing adlaw. Ang mga rebelasyon nagalaragway kon paano gin-organisar ang Simbahan ni Cristo. Nagaunod man ini sang importante nga mga pinanudlo sang ebanghelyo parte sa priesthood, sa mga ordinansa sang ebanghelyo, kag kon ano ang matabo pagkatapos sining kabuhi.
Perlas nga Bilidhon
Ang Perlas nga Bilidhon nagalakip sang mga libro ni Moises kag ni Abraham, sang testimonya ni Joseph Smith, kag sang Mga Artikulo sang Pagtuo sang Simbahan. Nagalakip man ini sang Joseph Smith—Mateo, kabahin sang paglubad ni Joseph Smith sang Bag-ong Katipan.
Pagtuon sang Balaan nga mga Kasulatan
Ang mga propeta nagatudlo sa aton nga tun-an ang balaan nga mga kasulatan adlaw-adlaw. Ang paghimo sini nagapatubo sang aton pagtuo kag mas magalapit sa aton sa aton Amay nga Langitnon kag kay Jesucristo. Samtang aton ginatun-an ang balaan nga mga kasulatan sing mainampuon, ang Balaan nga Espiritu magabulig sa aton nga makita ang mga sabat sa aton mga pamangkot.
Moderno nga mga Propeta
Kon nagahambal ang mga propeta kag apostoles sa karon nga panahon upod ang gahum sang Balaan nga Espiritu, ang ila mga pulong daw pareho sang balaan nga kasulatan. Isa ka halimbawa sini amo ang pangkabilogan nga komperensya. Mahimo naton nga tun-an ang mga pinanudlo sa komperensya sa Mayo kag Nobyembre nga mga isyu sang Liahona.
Moses Overcomes Satan [Gindaog ni Moises si Satanas], ni Joseph Brickey
© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, July 2022. Hiligaynon. 18298 861