“Cov Vaj Lug Kub: Vajtswv txoj Lus,” Liyahaunas, Xya Hli Ntuj 2022.
Zaj Lus hauv phau Liyahaunas Txhua Hli, Xya Hli Ntuj 2022
Cov Vaj Lug Kub: Vajtswv txoj Lus
Tus Yaj Saub hauv Phau Qub, los ntawm Judith A. Mehr
Cov ntawv vaj lug kub yog cov ntawv dawb huv uas feem ntau yog cov yaj saub sau. Cov vaj lug kub ua tim khawv txog Yexus Khetos thiab qhia txog Nws txoj moo zoo. Cov vaj lug kub hauv lub Koom Txoos yog Phau Npaivnpaum (uas muaj Phau Qub thiab Phau Tshiab), Phau Ntawv Maumoos, phau Lus Qhuab Qhia thiab Kev Khi Lus, thiab phau Lub Hlaws uas Muaj Nqis Heev.
Phau Qub
Phau Qub qhia txog Vajtswv tej hauj lwm nrog Nws cov neeg khi lus nyob puag thaum ub. Phau no muaj cov yaj saub tej lus qhia xws li Mauxes, Yausuas, Yaxayas, Yelemis, thiab Daniyees. Txawm tau sau ntau pua xyoo ua ntej Yexus Khetos tau yug los hauv ntiaj teb no los, ntau cov yaj saub hauv Phau Qub sau txog Nws.
Phau Tshiab
Phau Tshiab qhia txog Yexus Khetos txoj kev yug los, nws lub neej hauv ntiaj teb no, nws tej lus qhia, thiab nws txoj Kev Theej Txhoj. Kuj muaj Khetos cov Thwj Tim thiab lwm cov thwj tim tej kev qhia nyob haud. Phau Tshiab pab peb to taub ua neej raws li Yexus Khetos txoj moo zoo niaj hnub nim no.
Phau Ntawv Maumoos: Ib Zaj Lus Tim Khawv Ntxiv txog Yexus Khetos
Phau Ntawv Maumoos yog ib phau ceev xwm txheej txog cov neeg thaum ub uas nyob sab ntuj Amelikas puag thaum ub. Kuj muaj cov yaj saub tej lus qhia, thiab lub hom phiaj yog ua kom txhua haiv neeg ntseeg tias Yexus yog tus Khetos. Tus Yaj Saub Joseph Smith tau txhais los ntawm cov phiaj kub nrog Vajtswv lub txiaj ntsim thiab lub hwj chim.
Joseph Smith tus Hluas Txais Kev Tshwm Sim, los ntawm Daniel A. Lewis
Lus Qhuab Qhia thiab Kev Khi Lus
Phau Lus Qhuab Qhia thiab Kev Khi Lus muaj tej kev tshwm sim uas muab rau Joseph Smith thiab lwm cov yaj saub hauv hnub nyoog kawg. Tej kev tshwm sim ntawd qhia txog thaum txhim tsa Yexus Khetos lub Koom Txoos. Kuj muaj txoj moo zoo tej lus qhia tseem ceeb txog lub pov thawj hwj, cov kab ke ntawm txoj moo zoo, thiab yuav muaj li cas tom qab lub neej no tas.
Phau lub Hlaws uas Muaj Nqis Heev
Phau lub Hlaws uas Muaj Nqis Heev muaj phau Mauxes thiab phau Anplaham, Joseph Smith zaj lus tim khawv, thiab lub Koom Txoos tej Nqe Kev Ntseeg. Kuj muaj Phau Joseph Smith—Mathais, thiab ib feem ntawm Joseph Smith kev txhais Phau Tshiab.
Kev Kawm Vaj Lug Kub
Cov yaj saub tau qhia peb kom peb kawm vaj lug kub txhua hnub. Peb ua li ntawd kom pab peb muaj kev ntseeg ntxiv thiab los nyob ze dua rau Leej Txiv Saum Ntuj Ceeb Tsheej thiab Yexus Khetos. Thaum peb ua tib zoo thov thiab kawm cov vaj lug kub, tus Vaj Ntsuj Plig Dawb Huv yuav pab peb nrhiav tau lus teb peb cov lus nug.
Cov Yaj Saub Niaj Hnub No
Thaum cov yaj saub thiab cov thwj tim hnub no hais lus los ntawm tus Vaj Ntsuj Plig Dawb Huv lub hwj chim, lawv cov lus zoo ib yam li vaj lug kub. Ib qho piv txwv ntawm no yog lub tuam rooj sab laj. Peb kawm cov lus qhia ntawm lub rooj sab laj hauv ob phau ntawv Liyahaunas uas tawm hauv lub Tsib Hlis Ntuj thiab lub Kaum Ib Hlis Ntuj.
Mauxes Kov Yeej Dab Ntxwg Nyoog, los ntawm Joseph Brickey
© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, July 2022. Hmong. 18298 295