“Dagiti Nasantuan a Kasuratan: Ti Balikas ti Dios,” Liahona, Hulio 2022.
Binulan a Mensahe ti Liahona , Hulio 2022
Dagiti Nasantuan a Kasuratan: Ti Balikas ti Dios
Propeta iti Daan a Tulag, ni Judith A. Mehr
Dagiti nasantuan a kasuratan isu dagiti nasantuan a libro a kangrunaan nga insurat dagiti propeta. Paneknekan dagiti nasantuan a kasuratan ni Jesucristo ken isuroda maipapan iti ebangheliona. Dagiti opisial a nasantuan a kasuratan ti Simbaan isu ti Biblia (agraman ti Daan a Tulag ken ti Baro a Tulag), ti Libro ni Mormon, ti Doktrina ken Katulagan, ken ti Perlas a Kapatgan.
Daan a Tulag
Ti Daan a Tulag ket maysa a kasuratan maipanggep kadagiti pannakipulapol ti Dios kadagiti natulagan a tattaona iti nagkauna a panawen. Iramanna dagiti pannursuro dagiti propeta a kas kada Moises, Josue, Isaias, Jeremias, ken Daniel. Nupay naisurat daytoy iti ginasgasut a tawen sakbay ti pannakayanak ni Jesucristo, insurat dagiti propeta iti Daan a Tulag ti maipapan Kenkuana.
Baro a Tulag
Naisurat iti Baro a Tulag ti pannakayanak, biag iti daga, pannursuro, ken Pannubbot ni Jesucristo. Iramanna pay dagiti pannursuro dagiti Apostol ni Cristo ken dadduma pay a disipulo. Tulongannatayo pay ti Baro a Tulag a makaawat no kasano ti agbiag iti ebanghelio ni Jesucristo iti agdama.
Ti Libro ni Mormon: Mainayon a Pammaneknek ni Jesucristo
Ti Libro ni Mormon ket maysa a kasuratan ti sumagmamano kadagiti tao a nagbiag kadagiti nagkauna a kontinente ti America. Iramanna dagiti pannursuro manipud kadagiti propeta, ken kangrunaan a panggepna ti mangkombinsi iti amin a tao a ni Jesus isu ti Cristo. Impatarus ni Propeta Joseph Smith daytoy manipud kadagiti balitok a pinanid babaen ti sagut ken bileg ti Dios.
Ni Joseph Smith Jr. Nga Umaw-awat iti Paltiing, ni Daniel A. Lewis
Doktrina ken Katulagan
Aglaon ti Doktrina ken Katulagan kadagiti paltiing a naited ken ni Propeta Joseph Smith ken iti dadduma pay a propeta iti ud-udina nga aldaw. Iladawan dagiti paltiing no kasano ti pannakabukel ti Simbaan ni Cristo. Nagramanda pay kadagiti napapateg a pannursuro ti ebanghelio maipapan iti priesthood, dagiti ordinansa ti ebanghelio, ken no ania ti mapasamak kalpasan daytoy a biag.
Perlas a Kapatgan
Iraman ti Perlas a Kapatgan dagiti libro ni Moises ken ni Abraham, ti pammaneknek ni Joseph Smith, ken ti Pagannurotan ti Pammati ti Simbaan. Iramanna pay ti Joseph Smith—Mateo, paset ti patarus ni Joseph Smith ti Baro a Tulag.
Panagadal kadagiti Nasantuan a Kasuratan
Insurodatayo dagiti propeta nga agadal kadagiti nasantuan a kasuratan iti inaldaw. Ti panangaramid iti kastoy ket matulongannatayo a mangpapigsa iti pammatitayo ken mangyas-asideg kadatayo iti Nailangitan nga Ama ken ni Jesucristo. No sikakararag nga adalentayo dagiti nasantuan a kasuratan, tulongannatayto ti Espiritu Santo a mangsapul kadagiti sungbat dagiti saludsodtayo.
Dagiti Moderno a Propeta
No agsao dagiti propeta ken apostol ita babaen iti bileg ti Espiritu Santo, maipada dagiti balikasda iti nasantuan a kasuratan. Maysa a pagarigan daytoy ti sapasap a komperesia. Mabalin nga adalentayo dagiti pannursuro manipud iti komperensia iti Mayo ken Nobiembre nga isyu ti Liahona.
Parmeken ni Moises ni Satanas, ni Joseph Brickey
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, July 2022. Ilokano. 18298 864