“Izibhalo: ILizwi likaThixo,” Liyahona, EyeKhala 2022.
UMyalezo Wenyanga we Liyahona, EyeKhala 2022
Izibhalo: ILizwi likaThixo
Old Testament Prophet [UMprofeti weTestamente eNdala], nguJudith A. Mehr
Izibhalo ziincwadi ezingcwele ezabhalwa ingakumbi ngabaprofeti. Izibhalo zingqina ngoYesu Krestu kwaye zifundisa ngevangeli yaKhe. Izibhalo ezisesikweni zeBandla yiBhayibhile (equka iTestamente eNdala kunye neTestemante eNtsha), iNcwadi kaMormoni, iMfundiso neMinqophiso, kunye nePerile yeXabiso eliKhulu.
ITestamente eNdala
ITestamente eNdala yimbali kaThixo ngokusebenzisana kwakhe nabantu baKhe bomnqophiso kumaxesha amandulo. Iquka iimfundiso zabaprofetii abafana noMoses, uYoshuwa, uIsaya, uYeremiya, kunye noDaniyeli. Nangona yabhalwa kwiminyaka engamakhulu phambi kokuzalwa kukaYesu Krestu, abaprofeti abaninzi beTestamente eNdala babhala ngaYe.
ITestamente eNtsha
ITestamente eNtsha ibhala ngokuzalwa, ubomi basemhlabeni, iimfundiso, kunye neNtlawulelo kaYesu Krestu. Iquka kananjalo neemfundiso zabaPostile kunye nabanye abalandeli bakaKrestu. ITestamente eNtsha isinceda siqonde indlela yokuphila ivangeli kaYesu Krestu namhlanje.
INcwadi kaMormoni: Enye iTestamente kaYesu Krestu
INcwadi kaMormoni yingxelo yabanye babantu ababephila kwiMelika yamandulo. Iquka iimfundiso ezivela kubaprofeti, kwaye injongo yayo engakumbi kukuqinisekisa bonke abantu ukuba uYesu unguye uKrestu. UmProfeti uJoseph Smith wayiguqulela ivela kumacwecwe egolide ngesipho nangamandla kaThixo.
Joseph Smith Jr. Receiving Revelation [UJoseph Smith Jr. eFumana Isityhilelo], nguDaniel A. Lewis
IMfundiso neMinqophiso
IMfundiso neMinqophiso iqulathe izityhilelo ezinikwe uJoseph Smith nabanye abaprofeti bemihla yokugqibela. Izityhilelo zicacisa indlela iBandla likaKrestu elilungiselelwe ngayo. Ziqulathe kananjalo iimfundiso zevangali ezibalulekileyo ngobubingeleli, imimiselo yevangeli, kunye nokwenzekayo emveni kobu ubomi.
IPerile yeXabiso eliKhulu
IPerile yeXabiso eliKhulu iquka iincwadi zikaMoses kunye noAbraham, ubungqina bukaJoseph Smith, kunye neziVumo zoKholo zeBandla. Iquka kananjalo uJoseph Smith—uMateyu, inxalenye yenguqulelo kaJoseph Smith yeTestamente eNtsha.
Ukufunda iziBhalo
Abaprofeti basifundisile ukuba sifunde izibhalo yonke imihla. Ukwenza njalo kusinceda sandise ukholo lwethu kwaye sisondele kufuphi kuBawo oseZulwini kunye noYesu Krestu. Njengokuba sifunda izibhalo ngomthandazo, uMoya oyiNgcwele uyakusinceda sifumane iimpendulo kwimibuzo yethu.
Abaprofeti beziMini
Xa abaprofeti nabapostile namhlanje bethetha ngamandla oMoya oyiNgcwele, amazwi abo afana nesibhalo. Umzekelo omnye woku yinkomfa yajikelele. Singafunda iimfundiso zenkomfa kukhutsho lwe LiyahonalukaCanzibe nolweNkanga.
Moses Overcomes Satan [Moses esoyisa uSathana], nguJoseph Brickey
© 2022 yi Intellectual Reserve, Inc. All rights reserved. Ishicilelwe eMelika. Isivumelo sesiNgesi: 6/19. Isivumelo senguqulelo: 6/19. Inguqulelo ye Monthly Liahona Message, July 2022. Xhosa. 18298 774