Umyalezo Wanyanga Zonke weLiyahona, ngoJulayi 2022

Imibhalo Engcwele: Izwi likaNkulunkulu

umprofethi weTestamente eliDala ebhala

Old Testament Prophet [UmProfethi weTestamente eliDala], nguJudith A. Mehr

Imibhalo engcwele iyizincwadi ezingcwele ezabhalwa ikakhulukazi ngabaprofethi. Imibhalo engcwele ifakaza ngoJesu Kristu futhi ifundisa ngevangeli Lakhe. Imibhalo engcwele esemthethweni yeBandla yiBhayibheli (ekubalwa kulo iTestamente eliDala kanye neTestamente eliSha), iNcwadi kaMormoni, IMfundiso neziVumelwano, kanye neGugu leNani eliKhulu.

ITestamente eliDala

ITestamente eliDala lingumbhalo wezenzo zikaNkulunkulu kubantu Bakhe besivumelwano ezikhathini zasendulo. Lihlanganisa izimfundiso zabaprofethi abanjengoMose, uJoshuwa, u-Isaya, uJeremiya, kanye noDaniyeli. Nakuba lalibhalwe eminyakeni eyizikhulu edlule ngaphambi kokuzalwa kukaJesu Kristu, abaprofethi abaningi beTestamente eliDala babhala Ngaye.

ITestamente eliSha

ITestamente eliSha lilanda ukuzalwa, ukuphila ngokwasenyameni, izimfundiso, kanye neNhlawulo kaJesu Kristu. Liqukethe futhi izimfundiso zabaPostoli baKristu nabanye abafundi. ITestamente eliSha liyasisiza ukuba siqonde indlela yokuphila ivangeli likaJesu Kristu namuhla.

UJesu Kristu eshumayela iNtshumayelo yaseNtabeni

INcwadi kaMormoni: Elinye iTestamente likaJesu Kristu

INcwadi kaMormoni ingumbhalo wabanye abantu ababephila eMelika yasendulo. Iqukethe izimfundiso zabaprofethi, futhi inhloso yayo enkulu ukwenza bonke abantu bakholwe ukuthi uJesu unguKristu. UmProfethi uJoseph Smith wayihumusha eyisusa ezingcwepheni zegolide ngesipho nangamandla kaNkulunkulu.

UJoseph Smith emukela isambulo

Joseph Smith Jr. Receiving Revelation [UJoseph Smith Jr. Emukela Isambulo], nguDaniel A. Lewis

IMfundiso neziVumelwano

IMfundiso neziVumelwano iqukethe izambulo ezanikezwa uJoseph Smith nabanye abaprofethi bezinsuku zokugcina. Lezi zambulo zichaza ukuthi kumele lihlelwe kanjani iBandla likaKristu. Ziqukethe futhi izimfundiso zevangeli ezimqoka mayelana nobupristi, izimiso zevangeli, kanye nanokuthi kwenzekalani emva kwalempilo.

IGugu leNani eliKhulu

IGugu leNani eliKhulu lihlanganise izincwadi zikaMose no-Abrahama, ubufakazi bukaJoseph Smith, kanye nemiBhalo yoKholo yeBandla. Liqukethe futhi uJoseph Smith—Mathewu, ingxenye yesihumusho sikaJoseph Smith seTestamente eliSha.

Ukufunda Imibhalo Engcwele

Abaprofethi basifundise ukuthi sifunde imibhalo engcwele mihla namalanga. Ukwenza lokhu kusisiza ukuthi sikhulise ukholo lwethu futhi sizisondeze kuBaba oseZulwini kanye noJesu Kristu. Ngesikhathi sifunda imibhalo engcwele ngomkhuleko, uMoya oNgcwele uzosisiza ukuthi sithole izimpendulo zemibuzo yethu.

Abaprofethi Bezinsuku Zamanje

Ngesikhathi abaprofethi nabapostoli ezinsukwini zamanje bekhuluma ngamandla kaMoya oNgcwele, amazwi abo abanjengemibhalo engcwele. Isibonelo esisodwa salokhu yingqungquthela yebandla lonke. Singazifunda izimfundiso zengqungquthela ezincwadini zangoMeyi noNovemba zeLiyahona.

Kungani Ufunda Imibhalo Engcwele na?

Imibhalo engcwele ifakaza ngoJesu Kristu (bheka uJakobe 7:10–11).

Imibhalo engcwele iphefumulelwe nguNkulunkulu (bheka 2 KuThimothewu 3:15–16).

Singayibhekisa kithi imibhalo engcwele (bheka 1 Nefi 19:23).

UMose enqoba uSathane

Moses Overcomes Satan [UMose Unqoba uSathane], nguJoseph Brickey

Imininingwane Eyengeziwe ngeGugu leNani eliKhulu

Incwadi kaMose: Ukuhumusha okuphefumulelwe kwamProfethi uJoseph Smith kwezahluko ezimbalwa zokuqala kuGenesisi. Isahluko 1 sikaMose sihlukile; izahluko ezilandelayo zisekelwe ku-Genesisi 1:1–6:13.

INcwadi ka-Abrahama: Ukuhumusha okuphefumulelwe kwamProfethi uJoseph Smith kwemibhalo ka-Abrahama, esuswe kwimiqulu yohlobo lotshani obabusetshenziswa ekwenziweni kwephepha eyatholakala eGibithe.

ImiBhalo yoKholo: Izitatimende eziyishumi nantathu ezabhalwa nguJoseph Smith ezibala izinkolelo zethu ezimqoka njengamalungu eBandla leNkosi.

© 2022 ngabakwa Intellectual Reserve, Inc. All rights reserved. Ishicilelwe eMelika Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, July 2022. isiZulu. 18298 783