“Met Pwinin Famini?” Liahona, Aug. 2022.
Porous ren Liahona Iteiten maram, August 2022
Met Pwinin Famini?
Pwinin Famini ew fansoun a keimuno non ewe wik ren ami famini ar repwe chufengen. Non ei fansoun, oua tongeni “kaeo ewe kapas allim, apochokuna ami kapasen pwarata, apochokunata nefin, me pwapwa fengen” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Pwinin famini ese nonno fengen non ekkewe pwan ekkoch famini. Nge ewe auchean mettoch ach sipwe aea ei fansoun ach sipwe apochokuna nefinach fengen me nefinach ngeni ewe Chon Amanau.
Ammoneta
Ekieki ew urumot om ewe famini epwe sani me ew itenap non ewe kapas allim oupwe sani ne porous won me kaeo fengen ussun. Pwan, fini ew ran me kunok ew me ew wik nupwen meinisin ika napengeni chon ewe famini mi tongeni chufengen. Ewe Mwichefen a apochokuna chon Mwichefen ar repwe fori ar pwinin famini non pwinin Sarinfan. Nge ekkewe famini ra tongeni chufengen nupwen a tufich ngenir.
Iotek
Chommong famini ra poputani me osopono pwinin famini ren iotek. Ei a korato ewe Ngun mi Fel ngeni non imwer ewe. Pwinin famini ew mwirinon fansoun ren ekkewe semirit me mi mukono ar repwe kaeo ar repwe iotek non ew kukkun mwich.
tikin kon
Chommong famini ra pwan awora konun nepoputan me nesoponon. Napngeni ra kan fini echo kon seni ewe puken kon ika ewe Puken kon noun kinter. A wor noun ewe Mwichefen rekotun piano ren ekkewe kon ren music.ChurchofJesusChrist.org. Ouwa pwan tongeni katon vidion ewe Tabernacle Choir ren ewe Temple Square. Kon fansoun pwinin famini a anisi chon ewe famini ar repwe kaeo ekkewe kon ra kan konu non fan.
Nesen
A chommong an ewe Mwichefen pekin aninis a tongeni aninis ren pwinin famini. Meni kopwe awora ekkoch minich ne annea me porous won ew mettoch seni ewe Liahona, ewe Friend, ika Ren ewe Pochokunen Sarafo. Ei a pwan tongeni ew fansoun ne katon me porous won ekkewe vidion Mwichefen. Ika ouwa pwan tongeni anneani ew afanafan seni mwichenap, annea pukefen, ika porous won ena annean non wik non Feitto, Tapweto Mwiri.
Sasingin semirit ar fori cookies seni Michelle Loynes
An Famini Pachenong
A pwan tongeni wor met semirit repwe fori non pwinin famini. Ra tongeni aninis ne ota ekkewe urumot, iotek ika fini me emweni ekkewe kon. Ra pwan tongeni osukuna ekkewe nesen. Mwen pwinin famini, oua tongeni anisi noumi ewe semirit ne annea ew tutunap non ewe Friend magazine ika tutunap non ewe pukefen ra sani. Ewe semirit a tongeni aporousa ewe tutunap ngeni ewe famini ussun nge ita ewe nesen. Chommong semirit ra pwan sani ar repwe fori pomwen ekkewe porousen non ewe pukefel ren pwinin famini. Mut ngeni ekkewe semirit ra watte repwe wisen ota ewe nesen ika fini ew afanafanen ew mwichenap ra sani ar repwe anneani. Mwirin urenir repwe emweni ewe poporous.
Ekkewe urumot.
Chommong famini ra sani ar repwe fori urumot ussun pwan kinikinin pwinin famini. Urumoten non imw ra tongeni apachanong ekkewe games, anapanapa mettoch, ika kuk fengen.
Ren urumoten nukun ouwa tongeni chok fetan, fori ew hike an famini, ika chufengen ne fori kunoun ekkewe sokkun urumotun nukun. Kutta ew urumot meinisin chon ewe famini ra tongeni fori, me awora pwapwa ngenir. Ousap awora fansoun okkuf fengen pwe ete osuono ewe Ngun.
Angang
Pwinin famini ew auchean fansoun ren ekkewe famini ar repwe anisi fengenir. Ouwa tongeni anisi ekkoch mi mukono non neniemi kewe, aninis non ewe nenien ekkewe ese wor nenier ne amongonir, mak ngeni ekkewe misineri, ika ioi pipi, ren chok awewe.
© 2022 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun ren Monthly Liahona Message, August 2021. Chuukese.18316 901