Ano ang Home Evening?

Litrato

nanay, tatay, kag bata nga babayi nga nagapungko sa kahilamunan

Ang home evening isa ka tion nga ginpain sa sulod sang semana para magtipon ang inyo pamilya. Sa sini nga tion, mahimo ninyo nga “tun-an ang ebanghelyo, pabakuron ang mga testimonya, magpabakod sang pag-isa, kag magkalipay upod ang kada isa” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Ang home evening mahimo nga lainlain sa tagsa ka pamilya. Pero ang tuyo amo nga gamiton ini nga tiyempo para mangin mas malapit sa kada isa kag mas magpalapit sa Manluluwas.

Pagpanghanda

Magpamensar sang kahiwatan nga nanamian sang inyo pamilya kag sang topiko sang ebanghelyo nga gusto ninyo hambalan kag tun-an nga ululupod. Dugang pa, magpili sang adlaw kag oras kada semana kon sa diin ang kalabanan ukon tanan nga mga miyembro sang pamilya mahimo nga magtililipon. Ginapaisog sang Simbahan ang mga miyembro nga hiwaton ang home evening kada Lunes sang gab-i. Pero pwede man ang pamilya magtililipon kon san-o pinakamaayo para sa ila.

Litrato

pamilya nga nagapangamuyo

Pangamuyo

Madamo nga pamilya ang nagasugod kag nagatapos sang home evening sa pangamuyo. Ginaagda sini ang Balaan nga Espiritu sa ila puluy-an. Ang home evening maayo gid nga tiyempo para sa mga bata kag mga dalagko na nga magtuon sa pagpangamuyo sa gamay nga grupo.

Musika

Madamo man nga pamilya ang may pangbukas kag pangtakop nga kanta. Masami nila ginapili ang kanta halin sa libro sang mga himno ukon sa libro sang mga kanta sang Primary. Ang Simbahan may mga ginrekord sa piano sang mga himno sa music.ChurchofJesusChrist.org. Pwede man kamo magtan-aw sang mga video sang Tabernacle Choir at Temple Square. Ang pagkanta sa home evening nagabulig sa mga miyembro nga matun-an ang mga himno nga ginakanta sa simbahan.

Leksyon

Ang Simbahan madamo kaayo sang mga balasahon nga makabulig sa inyo nga home evening. Pwede kamo maghatag sang pila ka minuto para basahon kag hambalan ang artikulo halin sa Liahona, ang Abyan, ukon Para sa Kusog sang mga Lamharon. Pwede man ini mangin tiyempo para magtan-aw kag hambalan ang mga video sang Simbahan. Ukon pwede man kamo magbasa sang pamulong-pulong sa pangkabilogan nga komperensya, magbasa sang balaan nga mga kasulatan, ukon maghambalanay parte sa balasahon sina nga semana sa Dali, Magsunod sa Akon.

Litrato

kabataan nga nagahimo sang mga biskwit

Litrato sang mga kabataan nga nagahimo sang biskwit ni Michelle Loynes

Partisipasyon sang Pamilya

Ang mga bata pwede nga magpartisipar sa home evening. Pwede sila magbulig sa pagplano sang mga aktibidades, pagpangamuyo, ukon pagpili kag pagpamuno sang mga kanta. Pwede man gani sila magtudlo sang mga leksyon. Antes sang home evening, pwede ninyo buligan ang inyo bata nga basahon ang istorya sa Abyan nga magasin ukon sang ila paborito nga istorya sa balaan nga kasulatan. Dayon pwede ina iistorya sang bata sa pamilya bilang leksyon. Madamo man nga kabataan ang nanamian sa pagdrama-drama sang mga istorya halin sa balaan nga kasulatan sa home evening. Tugoti ang mas dalagko na nga kabataan sa pagplano kag pagpili sang pamulong-pulong nga gusto nila basahon. Dayon tugoti sila nga magpanguna sa diskusyon.

Mga Aktibidades

Madamo nga pamilya ang nasadyahan sa paghiwat sang mga aktibidades bilang bahin sang home evening. Ang mga aktibidades nga pwede himuon sa sulod sang balay mahimo maglakip sang mga hampang, paghimo sang art, ukon pagluto nga ululupod.

Sa mga aktibidades sa gwa sang balay, pwede kamo maglakat, mag-hike bilang pamilya, ukon maghampang sang isport nga ululupod. Magpangita sang kahiwatan nga masarangan himuon sang tanan nga mga miyembro sang pamilya, kag magsadya-sadya nga ululupod. Likawi ang pagpaindis-indis nga mahimo makatabog sang Espiritu.

Pag-alagad

Ang home evening maayo nga tion para sa mga pamilya nga magserbisyo sa iban. Pwede kamo halimbawa, magbulig sa tigulang na ninyo nga kasilingan, magserbe sang pagkaon sa dalayunan sang mga homeless, magsulat sa mga misyonero, ukon magpamulot sang basura.

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, August 2022. Hiligaynon. 18316 861