Tsev Neeg Hmo Ua Ke Yog Dab Tsi?

Daim Duab

niam, txiv, thiab me nyuam ntxhais zaum nraum zoov

Hmo ua ke yog ib lub sij hawm tshwj tseg txhua lub lim tiam rau koj tsev neeg los koom ua ke. Lub sij hawm no koj “kawm tau txog txoj moo zoo, pab koj zaj lus tim khawv muaj zog, koom siab, thiab zoo siab koom ua ke” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Txhua tsev neeg nyias muaj nyias hmo ua ke uas sib txawv. Tiam sis lub hom phiaj yog kom siv lub sij hawm no los nyob ze ua ke thiab nyob ze tus Cawm Seej.

Kev Npaj

Xav txog ib qho kev lom zem uas koj tsev neeg nyiam ua thiab txoj moo zoo ib lub ntsiab lus uas nej xav tham txog thiab kawm txog ua ke. Thiab, xaiv ib hnub thiab ib lub sij hawm txhua lub lim tiam thaum feem coob los tag nrho tsev neeg sib ntsib tau. Lub Koom Txoos yaum kom cov mej zeej muaj hmo ua ke hnub Monday yav tsaus ntuj. Tiam sis tsev neeg sib ntsib tau thaum twg lawv muaj sib hawm.

Daim Duab

tsev neeg thov Vajtswv

Thov Vajtswv

Tej tsev neeg feem ntau pib thiab xaus hmo ua ke thaum lawv thov Vajtswv. Qhov no caw tus Vaj Ntsuj Plig Dawb Huv los rau hauv lawv tsev. Hmo ua ke yog ib lub sij hawm zoo rau cov me nyuam thiab cov neeg laus kawm thiab thov Vajtswv ua ke ib pawg me.

Cov Nkauj

Tej tsev neeg feem ntau kuj hu nkauj kom pib thiab xaus kev sib ntsib no. Ntau zaus lawv xaiv ib zaj nkauj ntawm phau nkauj qhuas Vajtswv los phau nkauj rau lub Koom Haum Me Nyuam Yaus. Lub Koom Txoos muaj tej piano kaw suab ntawm phau nkauj qhuas Vajtswv nyob rau hauv music.ChurchofJesusChrist.org. Koj kuj saib tau cov vidi-aus txog Lub Tsev Kheej Pawg Hu Nkauj Nyob ntawm Tshav Tuam Tsev. Kev hu nkauj hauv hmo ua ke pab ib tsev neeg kawm cov nkauj qhuas Vajtswv uas hu tom lub koom txoos.

Tej Zaj Lus Qhia

Lub Koom Txoos muaj ntau yam uas pab tau ua hmo ua ke. Tej zaum koj yuav cia ob peb feeb los nyeem thiab sib tham nrog ib tsab ntawv ntawm phau Liyahaunas, phau Phooj Ywg, los Ntxiv Dag Zog rau cov Tub Hluas Ntxhais Hluas. Nov kuj yog ib lub sij hawm los saib thiab tham txog lub Koom Txoos cov vidi-aus. Los tej zaum koj nyeem tau ib zaj lus los ntawm lub tuam rooj sab laj, nyeem vaj lug kub, los sib tham txog lub lim tiam ntawd tej zaj lus hauv Los, Nrog Kuv Mus.

Daim Duab

me nyuam yaus ci khoom qab zib

Daim duab txog me nyuam yaus ci khoom qab zib los ntawm Michelle Loynes

Tsev Neeg Kev Koom Tes

Cov me nyuam txawj pab thaum ua tsev neeg hmo ua ke. Lawv muaj peev xwm pab npaj tej yam ntxim saib ntxim ua, thov Vajtswv, los xaiv thiab coj nkauj. Lawv kuj pab qhia tej zaj lus thiab. Ua ntej hmo ua ke, koj pab tau koj tus me nyuam nyeem ib zaj dab neeg hauv phau Phooj Ywg los sis zaj dab neeg lawv nyiam tshaj hauv phau vaj lug kub. Ces tom qab ntawd tus me nyuam yuav qhia zaj dab neeg ntawd rau tsev neeg. Cov me nyuam feem coob kuj nyiam ua yeeb yam txog tej dab neeg hauv vaj lug kub rau hmo ua ke thiab. Cia cov me nyuam hlob npaj tej zaj lus los xaiv tej zaj hais lus ntawm lub tuam rooj sab laj uas lawv xav nyeem txog. Ces tom qab ntawd cia lawv coj kev sib tham ntawd.

Yam Ntxim Saib Ntxim Ua

Tej tsev neeg feem ntau nyiam ua tej yam ntxim saib ntxim ua uas yog ib feem ntawm hmo ua ke. Tej yam uas ua tau hauv tsev yog ua si, xuas tes ua tej yam khoom, los ua zoo mov noj ua ke.

Tej yam uas ua tau nraum zoov yog mus taug kev, mus taug kev deb deb ua ke, los ua si ntaus pob ncaws pob ua ke. Nrhiav ib yam ntxim saib ntxim ua uas tag nrho tsev neeg ua tau, thiab muaj kev lom zem ua ke. Ceev faj rau tej yam kev sib tw uas ua rau tus Vaj Ntsuj Plig nyob tsis tau.

Pab Lwm Tus

Hmo ua ke yog ib lub sij hawm zoo rau tsev neeg mus pab lwm tus. Piv txwv hais tias, koj pab tau cov kwj tij zej zog uas laus lawm, pab muab zaub mov rau tej tsev rau cov neeg tsis muaj chaw nyob, sau ntawv rau cov tub txib, los pab khaws khib nyiab.

© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, August 2022. Hmong. 18316 295