“Meac Ekuh in Sucu?” Liahona, Ohkohs 2022.
Mahlwem nuhkwewa Liahona Sramsram, Ohkohs 2022
Meac Ekuh in Sucu?
Ekuh in sucu pa pacl se sriyucklac ke wik se nuh sin sucu lom in toeni. Ke pacl se inge, kom kuh in “lutlut ke wosasuc, ahkfokokoye luhlahlfongi, muhsaheack insese, ac engan kihn sie sin sie” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Ekuh in sucu uh ac siena sin kais sie sucu. Tuhsruhk finsrak se nuh kac uh pa in orekmakihn pacl se inge in fototoeni nuh sin sie sie ac fototoeni nuh sin Mwet Lahngo.
Ahkolah
Nuhnkuh ke sie mukwikwi ma sucu lom an luhngse ac sie sifac ke wosasuc ma kom ac luhngse akacsruhi ac tuhkweni lutlut kac. Oacyacpac, sulaclah sie lwen ac pacl ke wik se ma inkaiyen kuh sucu lom an nohfohn kuh in tuhkweni. Alu uh kwacfe mempucr an in ahkfahsrye ekuh in sucu ke ekuh in Mante. Tuhsruhk sucu uh kuh in toeni fin pa wo emet seltahl uh.
Pruhe
Puhs sucu muhtwacwacack ac sahflah ekuh in sucu ke pruhe se. Ma se inge suli Nguhn Muhtahl nuh in lohm selos. Ekuh in sucu el pacl wowo se nuh sin tuhlihk srihsrihk ac mwet mahtuh in lutlut ke pruhe ekihn u srihsrihk se.
On
Puhs sucu muhtwacwacack ac sahflah ke on soko. Elos kwacna sulaclah on soko ke puk in on ah kuh puk in on luhn Tuhlihk Srihsrihk ah. Oasr on sruokyucki ke ohkohn ah oasr ke music.ChurchofJesusChrist.org. Kom kuh pac in liye petsac ke Tabernacle Choir in acn Temple Square. On orek ke ekuh in sucu uh kahsruh mempucr in etwaclah on ma muhta yuckyuck ke alu ah.
Mwe Luti
Puhs kahsruh luhn Alu uh nuh ke ekuh in sucu. Kom kuh in sislah minit ekahsr in riti ac akacsruhi ke sie pweng ke Liahona, ke Friend, kuh Mwe Ahkweye Mwet Fuhsr. Pacl wowo se pac pa inge in liye ac akacsruhi ke petsac ke Alu uh. Kuh kom kuh in riti sie sramsram ke toeni luhlahp ah, riti ma suhmuhslah, kuh tuhkweni sramsram ke fuhs nuh ke wik se ingacn ke Come, Follow Me.
Petsac kacn tuhlihk srihsrihk orek cookies sel Michelle Loynes
Tuhkweni Asaplaki luhn Sucu
Tuhlihk srihsrihk uh kuh in oasr ma kunac ke ekuh in sucu uh. Elos kuh in kahsruh plwacnelah ma ac orek uh, pruhe, kuh sulaclah ac kol on ah. Elos kuh pac in luti. Meet liki ekuh in sucu, kom kuh in kahsruh tuhlihk nuhtum an ritwelah sie sramsram ke Kawuck magazine kuh sie sramsram elos luhngse ah. Tuhlihk sacn kuh in sruhmuhn sramsram soko ingacn nuh sin sucu an pa mwe luti uh. Puhs pac tuhlihk srihsrihk luhngse srihke sramsram ke ma suhmuhslah ke ekuh in sucu. Sang tuhlihk mahtuh an in plwacnelah mwe lutlut an kuh sulaclah sie sramsram ke toeni luhlahp ma elos luhngse riti. Na sang elos in kol sramsram.
Sritacl
Puhslac sucu luhngse oruh sritacl in sie ipin ekuh in sucu. Sritacl lin lohm kuh in sritacl games, orek mwe otwot, kuh in tuhkweni orek mongo.
Nuh ke sritacl lihkihnihm kom kuh in oruh sie fahsr ah, som fanfan, kuh tuhkweni oruh sie sritacl lihkihnihm ah. Sokwack sie sritacl ma nohfohn mwet ke sucu lom an kuh in oruh, ac in nohfohnna puhla pwacr kac. Nimet oruh sritacl ma ac luhslah Nguhn.
Kuhlwacnsap
Ekuh in sucu el pacl na wowo se nuh sin sucu in kuhlwacnsuhpuh sie sin sie. Kom kuh in kahsruh sie mwet mahtuh tuhlan lom, kihtakat mongo nuh sin mwet wacngihn lohm se, sihm nuh sin misinacri, kuh in som sifasak kutkut.
© 2022 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Monthly Liahona Message, August 2022. Kosraean. 18316 868