“Ta in Nokon in Jota?” Liaona O̧kwōj 2022
Ennaan eo jān Liaona ilo Allōn̄ Otemjej, O̧kwōj 2021
Ta in Nokon in Jota?
Nokon in jota ej juon iien em̧ōj kōjeņoļo̧ke ilo juon wiik n̄an an baam̧le eo am̧ ippān doon. Ilo iien in, komaron̄ “katak gospel eo, kōkajoor naan in kam̧ool, kalōk doon, im mōņōņō ippān doon” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Nokon in jota ilo juon wāween eoktak n̄an kajjojo baamle. Bōtaab kōttōpar eo in n̄an kōm̧m̧an bwe jen epaake doon im epaakeļo̧k Rilo̧mo̧o̧r.
Kōppopo
Ļōmņak kōn juon m̧akūtkūt me baam̧le eo enaaj itok limoier kake im juon unin kōnono an gospel me kom̧ naaj kōņaan kōnono kake im ekkatak kake ippān doon. Barāinwōt, kālet juon raan im iien kajjojo wiik n̄e eiten aolep ak aolep uwaan baam̧le eo remaron̄ ippān doon. Kabun̄ in ej rōjan̄ membōr ro n̄an kōm̧m̧an nokon in jota ilo Mande ko kajjojo. Ak baam̧le ko remaron̄ kōm̧m̧ane ilo iien eo em̧m̧an n̄an er.
Jar
Elōn̄ baam̧le ko rej ijjino im kōjem̧ļo̧k nokon ko aer kōn jar. Menin ej karuwainene tok Jetōb Kwojarjar ñan m̧oko m̧ōer. Nokon in jota ej iien eo n̄an ajri im rūtto ro n̄an aer katak jar ilo aer ippān doon ilo juon doulul jidikdik.
Al ko
Elōn̄ baam̧le rej bar ijjino im jemļo̧k kōn al. Ekkā aer kālet juon al jān bok in al eo ak jān book in al eo an Būraimare. Ewōr an Kabun̄ in piano record in al ko ilo music.churchofJesusChrist.org. Komaron̄ bar alooje bitio in Tabernacle Choir ilo Temple Square. Al ilo iien nokon in jota ko enaaj jipan̄ membor ro katak al ko im jej al ilo m̧ōn jar eo.
Katak
Ilo Kabun̄ in elōn̄ kein jipan̄ ko im remaron̄ jipan̄ eok kōn nokon in jota. Komaron̄ bok jejjo minit ko n̄an am̧ riiti im kōmeļeļeiki juon bwebwenato jān Liaona, eo Jera, ak N̄an Kōkajoorļo̧k Jodikdik ro. Iien in emaron̄ bar iien n̄an alooj im kōmeļeļe kōn bitio ko an Kabun̄ in. Ak komaron̄ riit kōnono ko jān juon kweilo̧k eļap, riit jeje ko rekwojarjar, ak kōnono kōn naan eo an wiik in ilo Itok, Ļoor Eō.
Pija in ajri ro rej kōm̧m̧an cookies jen Michelle Loynes
An baam̧le eo Bōk Koņaer
Ajri ro remaron̄ bok koņaer ilo nokon in jota. Remaron̄ jipan̄ kōn kōm̧m̧an pepe in m̧akūtkūt ko, jar, ak kāālet in tōl ilo al ko. Rej barāinwōt maron̄ katakin katak ko. M̧okta jān nokon in jota, komaron̄ jipan̄ ajiri eo nejūm̧ riit i bwebwenato eo ilo Eo Jera māākjiin ak bwebwenato eo em̧m̧antata ippāier ilo jeje ko rekwojarjar. Ajri eo emaron̄ naaj kwaļok kōn bwebwenato eo n̄an baam̧le eo āinwōt juon menin katak. Elōn̄ ajiri rej bar kōņaan kōm̧m̧an tieta in bwebwenato ko ilo jeje ko rekwojarjar ilo iien nokon in jota. Kōtļo̧k bwe ajiri ro rerūitto ren kālet katak eo ak kālet jen juon kweilo̧k eo eļap im rekōnaan riiti. Leļo̧k bwe ren tōl ien ekōnono in.
M̧akūtkūt ko
Elōn̄ baam̧le ko rej mōņōņō in kōm̧m̧ane m̧aktkūt kein āinwōt m̧ōttan nokon in jota. Makūtkūt ko ilowaan m̧ōko rej ānwōt ikkure game ko, kōm̧m̧an amim̧ono ak jerbal in pā, ak kōmat ippān doon.
N̄an m̧akūtkūt ko nabōj komaron̄ etetal, tallōn̄ toļ ak hike an baam̧le, ak ikkure ko nabōj ippān doon. Pukōt juon m̧akūtkūt eo me aolepān membōr in baam̧le eo remaron̄ kōm̧m̧ane, im limo ippān doon kake. Kajjieon̄ kōm̧m̧an bwe en ejeļo̧k jitibōn jiāe bwe emaron̄ kōm̧m̧an bwe jetōb eo en jako.
Jerbal in Jipan̄
Nokon in jota ej iien eo em̧m̧an n̄an an baamle ko jipan̄ ro jet. Komaron jipan̄ ro ritūrum̧ im rerūtto, leļo̧k m̧ōn̄a n̄an jikin kōpped ko an ro ejjeļo̧k m̧ōer, jeje n̄an mijenede ro, ak karreo ijoko rokkopejpej, n̄an waan jon̄ok.
© 2022 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim ukook eo: 6/19. Ukook eo an Monthly Liahona Message, August 2022. Marshallese. 18316 874