“Dahkot Soutik En Peneinei?” Liahona, Oahkos 2022.
Padahk en Sounpwong kan Liahona Oahkos 2022
Dahkot Soutik en Peneinei?
Soutik en peneinei iei e wia ahnsou ehu me kin katohrohrla nan wihko ong peneinei ehu en kin tuhpene. Nan ereihn ansou wet, kumwail kak “esehla duwen rongamwahuo, kakehlakahla kadehdeh kan, kakehlakahla ehupene kan, oh pereperenpene nanpwungamwail” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Soutik en peneinei kin sohte nohn duwepene ong ehu ehu peneinei. Ahpw kahrepehu iei en doadoahngki ahnsou wet pwehn kihpene kitail oh pil karaniala Sounkomouro.
Kaunopada
Medewehda ehu kemwekid en kemweiht me amwail peneinei pahn pereniki oh ehu iren rongamwahu me kumwail pahn men ehukipene oh esehla. Oh pil, pilada ehu rahn en oh ahnsou en nan ehu wihk me palilaud de koaros tohn amwail peneinei kak tuhpene. Mwomwohdiso kin koangoangoahki toweh kan en kin wia sarawi en peneinei ni soutik en Ni Ehd koaros. Ahpw peneinei kan kak tuhpene nan ahnsou me keieu mwahu ehng irail.
Kapakap
Peneinei tohtoh kin tapiada oh kaimwsengkihla arail soutik en peneinei ki kapakap. Met kin lukehdo Ngehn Sarawi nan tehnpasarail. Soutik en peneinei wia ehu ansou mwahu ong serih kan oh aramas laud en kin esehla duwen kapakapene nan arail kisin peneinei tikitik.
Koul
Peneinei tohtoh kin pil koul ni tepidahn oh keimwseklahn arail soutik en peneinei. Irail kin kalapw pilada koul sang nan pwuken koul de pwuken koul en Serihkan. Mwomwohdiso kolokol ngilen keseng en koul kan nan music.ChurchofJesusChrist.org. Kumwail pil kak kilang kasdohn Pwihn en Koul en Tabernacle en Temple Square. Koul ni ansou en soutik en peneinei kin sewese toweh kan en esehla koul kan me kin wiawi nihmw sarawi.
Padahk
Mwomwohdiso kolokol soangen mehn kaweihd tohtoh me kak sawas nan ansou en soutik en peneinei. Kumwail kak wadek oh koasoikipene ehu irehn ki minit kei me pahn sang nan pwuhk en Liahona, pwuhk en Friend, de For the Strength of Youth. Met pil ahnsou mwahu en kilangpene oh koasoikipene duwen kasdoh kan en Mwomwohdiso. De kumwail kak wadek ehu padahk sang nan kapokon lap, wadek iren pwuhk sarawih kan, de koasoikipene wadawad en nan wihko sang nan Kohdo, Idawehn Ie.
Kilel en serih kan wihwia kukihs sang Michelle Loynes
Ehupenehn Peneinei
Serih kan kak iang patehng katanga soutik en peneinei. Irail kak iang sawas pilahn mwadong kan, kapakap, de pilada oh kaweihd koul kan. Irail pil kak iang wia padahk kan. Mwohn soutik en peneinei, kumwail kak sewese noumwail serih kan wadek ehu soi sang nan makesihn en Friend de soi en pwuhk sarawi me irail keieu pereniki. Serio ahpw pahn kak ehukieng peneineio soaio ni ah pahn wia iren padahk ehu. Tohtoh serih kan me pil kin mwahuki alasang de kamwomwehda soi kan ong nan soutik en peneinei. Mweidohng seri laud kan en kin kaunopada padahk de pilada ehu padahk sang nan kapokon lap me irail mwahuki wadek. Oh mwiedehng irail en kaweihd ehupenehn irehu.
Kemwekid kan
Tohtoh peneinei kan me kin pereniki wia kemwekid kaperen kan nan soutik en peneinei. Kemwekid kaperen kan en nan ihmw kak rasehng mwadongki soangen kamwadong kan, wia mahlel de peipei, de kuk.
Ong kemwekid kaperen en likinihmw kumwail kak kohla alu, kohla aik, de mwadongkipene ehu mwadong en. Kilangada ehu kemwekid kaperen me tohn peneineio koaros pahn kak wia, oh pereperenpene. Ieremen wia mwadong me pahn siaipene pwe ede katangala Ngehno.
Sawas en Papah
Soutik en peneinei wia ehu ahnsou kaselel ong peneinei kan en papah mehteikan. Kumwail kak sewese ekei mehnimpomwail me likeilapalahr kan, sewese kamwenge irail kan me kin mihmi nan wasahn keiruh kan, intinglahng misineri kan, de rikida kihd kan, ni karasepe.
© 2022 sang Intellectual Reserve, Inc. Kolokol pwuhng koaros Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Translation of Monthly Liahona Message, August 2022. Pohnpeian. 18316 885.