« E aha te pō ’utuāfare ? » Liahona, ’Ātete 2022.
Poro’i tā’āva’e o te Liahona, ’Ātete 2022
E aha te pō ’utuāfare ?
Te pō ’utuāfare, ’o te hō’ē ïa taime i te hepetoma e ’āmui ai ’outou ’e tō te ’utuāfare. I te reira taime, e « ha’api’i [’outou] i te ’evanelia, e ha’apūai i te ’itera’a pāpū, e patu i te hō’ēra’a, ’e e ’oa’oa i te tahi e te tahi » (Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te Mau Mahana Hope’a Nei, 2.2.4, ChurchofJesusChrist.org). E mea ta’a ’ē haere te pō ’utuāfare i tō te tahi noa atu ’utuāfare. Te fā rā, o te fa’a’ohipara’a ïa i teie taime ’ei ha’afātatara’a i te tahi ’e te tahi ’e i te Fa’aora.
Fa’aineinera’a
’A feruri i te hō’ē ’ātivite e auhia e tō ’outou ’utuāfare ’e i te hō’ē tumu parau nō te ’evanelia ’o tā ’outou e hina’aro e ’āparau ’e e ha’api’i ’āmui. ’A mā’iti ato’a i te hō’ē mahana ’e i te hō’ē taime i te hepetoma tāta’itahi e ti’a ai i te rahira’a ’aore rā te ta’ato’ara’a o te mau melo o te ’utuāfare e ruru. Tē fa’aitoito nei te ’Ēkālesia i te mau melo ’ia fa’atupu i te pō ’utuāfare i te mau pō monire. E ruru rā te mau ’utuāfare i te taime maita’i a’e nō rātou.
Te pure
E rave rahi ’utuāfare e ha’amata ’e e fa’aoti nei i te pō ’utuāfare nā roto i te pure. E tītau te reira i te Vārua Maita’i i roto i tō rātou fare. E taime maita’i te pō ’utuāfare nō te mau tamari’i ’e nō te feiā pa’ari nō te ha’api’i i te pure e te hō’ē pupu iti ha’iha’i.
Pehe
E rave rahi ato’a ’utuāfare tē hīmene nei i te ’ōmuara’a ’e i te hōpe’ara’a. E mā’iti rātou i te hō’ē hīmene i roto i te buka Te mau hīmene ’aore rā i roto i te buka hīmene a te Paraimere. Te vai nei te mau fa’aharuharura’a piāna nō te mau hīmene a te ’Ēkālesia i ni’a i te music.ChurchofJesusChrist.org. E māta’ita’i ato’ahia te mau video nō te pupu hīmene o te Fare Menemene i Temple Square. ’Ia hīmene i roto i te pō ’utuāfare, e tauturu te reira i te mau melo ’ia ha’api’i i te mau hīmene tei hīmenehia i te fare purera’a.
Ha’api’ira’a
E rave rahi rāve’a tā te ’Ēkālesia nō te tauturu i te pō ’utuāfare. E rave ’outou tau minuti ri’i nō te tai’o ’e nō te ’āparau i te hō’ē parau pāpa’i i roto i te Liahona, te Hoa, ’aore rā Nō te Pūai o te Feiā ’Āpī. E taime au ato’a teie nō te māta’ita’i ’e nō te tau’a parau i te mau video a te ’Ēkālesia. ’Aore rā nō te tai’o i te hō’ē a’ora’a nō roto mai i te ’āmuira’a rahi, nō te tai’o i te mau pāpa’ira’a mo’a, ’aore rā nō te ’āparau i te tai’ora’a o te hepetoma i roto i te Mai, pe’e mai.
Hōho’a nō te mau tamari’i e tunu ra i te noha nā Michelle Loynes
Te turura’a tō te ’ūtuāfare
E nehenehe te mau tamari’i e rave i te hō’ē tuha’a i roto i te pō ’utuafare. E fa’anaho rātou i te mau ’ātivite, e pure, ’aore rā e mā’iti ’e e arata’i i te mau hīmene. E hōro’a ato’a rātou i te ha’api’ira’a. Hou te pō ’utuāfare, ’a tauturu i tā ’outou tamari’i ’ia tai’o i te hō’ē ’ā’amu o te ve’a Hoa ’aore rā i te ’ā’amu pāpa’ira’a mo’a au-roa-hia e rātou. I muri iho, e fa’ati’a te tamari’i i te reira ’ā’amu i tō te ’utuāfare ’ei ha’api’ira’a. E rave rahi ato’a te mau tamari’i e au nei ’ia ha’uti ta’ata ora i te ’ā’amu o te mau pāpa’ira’a mo’a i te pō ’utuāfare. ’A vaiiho i te mau tamari’i pa’ari ’ia fa’anaho i te ha’api’ira’a e ’aore rā, ’ia mā’iti i te hō’ē a’ora’a o te ’āmuira’a rahi ’o tā rātou e hina’aro e tai’o. I muri iho, ’a ani ia rātou ’ia arata’i i te ’āparaura’a
Te mau ’ātivite
E rave rahi ’utuāfare e au nei i te mau ’ātivite i roto i te pō ’ūtuāfare. Teie te mau ’ātivite e fa’atupuhia i roto i te fare, te perera’a, te hāmanira’a i te mau tao’a rima’ī, ’aore rā te tunu-’āmui-ra’a i te mā’a.
Nō te mau ’ātivite nā rāpae’au, e nehenehe ’outou e hāhaere, e orihaere e tō te ’utuāfare, ’aore rā e ha’uti ’āmui haere i te tū’aro i rāpae’au. ’Imi i te hō’ē ’ātivite e au nō te ta’ato’ara’a o te ’utuāfare ’e ’ia ’ārearea ’āmui. ’Eiaha ’ei mau ha’utira’a nō te tāta’u ’a pe’e te Varua au maita’i mai rotopu atu ia ’outou.
Tāvinira’a
E taime fa’ahiahia te pō ’utuāfare nō tō te ’utuafare nō te tāvini ia vetahi ’ē. E tauturu ’outou i tō ’outou mau veutupu pa’ari a’e, e tāvini nō te taipu i te mā’a nō te feiā ’aita e nohora’a, e pāpa’i te rata nā te mau misiōnare, ’aore rā e ’ohi haere i te pehu, ’ei hi’ora’a.
© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, August 2022. Tahitian. 17467 895