Mesaj Mansyèl Liahona , Septanm 2022

Dirije pa Pwofèt Vivan

Pwofèt yo se gason Papa ki nan Syèl la aple pou pale nan non Li. Yo temwaye konsènan Jezikri epi yo anseye nou levanjil Li a. Manm Legliz Jezikri pou Sen Dènye Jou yo kwè nan ni pwofèt ansyen ni pwofèt modèn.

Bondye pale atravè Pwofèt

Pwofèt yo resevwa revelasyon ki soti nan men Bondye. Lè pwofèt yo enspire pou yo anseye nou, se tankou se Bondye ki t ap pale avèk nou (gade Doktrin ak Alyans 1:38). Nou kapab gen konfyans ke sa y ap di nou yo se sa Bondye ta vle nou konnen.

Mòmon ap Fè Rezime Plak yo, pa Tom Lovell

Pwofèt yo Anseye apwopo Jezikri

Tout pwofèt temwaye de Jezikri. Yo anseye nou ke Li se Pitit Bondye. Yo anseye nou sou lavi Li, egzanp Li ak Ekspyasyon L la. Epi yo montre nou kijan pou nou suiv Li ak obeyi kòmannman L yo.

Responsablite Pwofèt yo

Pwofèt yo anseye levanjil Jezikri a. Yo eksplike benediksyon n ap resevwa lè nou obeyi kòmandman yo ak konsekans n ap resevwa si nou pa fè sa. Pafwa, yo ka enspire pou pale nou de evènman k ap vini.

Moyiz ak Tablèt yo, pa Jerry Harston

Pwofèt ansyen

Depi nan kòmansman, Bondye te anseye pèp la atravè pwofèt. Pwofèt ki t ap viv nan tan Ansyen Testaman yo enkli Adan, Noe, Abraham, Moyiz, Ezayi, ak lòt. Te genyen pwofèt nan mitan pèp Liv Mòmon an tou. Pwofèt sa yo te enkli Leyi, Mozya, Alma ak Mowoni. Nou kapab aprann sa yo te anseye lè nou li ekriti yo.

Pwofèt Modèn yo

Joseph Smith sete premye pwofèt nan tan modèn yo. Li te retabli Legliz Jezikri a sou tè a. Russell M. Nelson se pwofèt ak Prezidan Legliz la jodia. Konseye l yo nan Premye Prezidans lan ak Douz Apot yo se pwofèt, vwayan, ak revelatè tou.

Koute Pwofèt la.

Pwofèt la pale avèk nou pandan konferans jeneral ak nan lòt lè. Li anseye nou sa Bondye vle nou konnen ak kijan pou nou suiv Jezikri jounen jodia. Nou kapab jwenn ansèyman l yo nan Liahona ak nan ChurchofJesusChrist.org.

Benediksyon nan Suiv Pwofèt la

N ap beni si nou suiv ansèyman pwofèt la. Lè nou suiv pwofèt la, nou kapab konnen n ap fè sa Bondye ta vle nou fè. Nou kapab santi lapè nan lavi nou epi vin pi pre Jezikri.

Nan Ekriti yo

Bondye pale avèk pwofèt Li yo (gade Amòs 3:7).

N ap beni si nou suiv pwofèt la (gade Doktrin ak Alyans 21:4–6).

Pwofèt la ap dirije Legliz la (gade Doktrin ak Alyans 107:91–92).

Pawòl pou nou Sonje

Vwayan: Yon pwofèt ki wè avèk zye espirityèl sa ki pa klè pou lòt moun.

Revelatè: Yon moun ki releve sa Bondye vle nou konnen.

Temwaye: Pou di sa w kwè oswa sa w konnen ki verite.

© 2022 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, September 2022. Haitian Creole. 18299 036