Bulanan nga Mensahe sa Liahona, Septyembre 2022

Ginapangunahan sang Buhi nga mga Propeta

mga lider sang Simbahan sa atubang sang Christus nga istatwa

Ang mga propeta matarong nga mga tawo nga gintawag sang Amay nga Langitnon agud maghambal para sa Iya. Sila nagapamatuod parte kay Jesucristo kag nagatudlo sang Iya ebanghelyo. Ang mga miyembro sang Ang Simbahan ni Jesucristo sang mga Santos sa Ulihing mga Adlaw nagapati sa pareho dumaan kag moderno nga mga propeta.

Ang Dios Nagahambal paagi sa mga Propeta

Ang mga propeta nagabaton sang rebelasyon halin sa Dios. Kon ang mga propeta ginainspirar nga magtudlo sa aton, daw pareho lang ini nga ang Dios mismo ang nagahambal sa aton (tan-awa sa Doktrina kag mga Kasugtanan 1:38). Makasalig kita nga ginasiling nila sa aton ang gusto sang Dios nga aton mabatian.

Si Mormon nga may bulawan nga mga lamina

Mormon Abridging the Plates [Si Mormon nga Nagapalip-ot sang mga Lamina], ni Tom Lovell

Ang mga Propeta Nagatudlo parte kay Jesucristo

Ang tanan nga mga propeta nagapamatuod kay Jesucristo. Ginatudlo nila sa aton nga Sia ang Anak sang Dios. Ginatudloan nila kita parte sa Iya kabuhi, ehemplo, kag Pagbayad-Sala. Kag ginapakita nila sa aton kon paano Sia sundon kag tumanon ang Iya mga kasuguan.

Mga Responsibilidad sang mga Propeta

Ang mga propeta nagatudlo sang ebanghelyo ni Jesucristo. Ginapaathag nila ang mga bugay nga aton mabaton kon tumanon naton ang mga kasuguan kag ang mga konsikwensya nga aton mabaton kon indi kita magtuman. May mga beses, nga mainspirar sila nga sugiran kita parte sa mga matabo sa palaabuton.

Si Moises nga may dala nga mga tapi-tapi nga bato

Moses and the Tablets [Si Moises kag ang mga Tapi-tapi nga Bato], ni Jerry Harston

Dumaan nga mga Propeta

Ang Dios nagtudlo sa mga tawo paagi sa mga propeta halin sang ginsuguran. Ang mga propeta nga nagkabuhi sa panahon sang Daan nga Katipan nagalakip kanday Adan, Noe, Abraham, Moises, Isaias, kag iban pa. May mga propeta man sa tunga sang katawhan sa Libro ni Mormon. Ining mga propeta nagalakip kanday Lehi, Mosias, Alma, kag Moroni. Matun-an naton ang ila gintudlo paagi sa pagbasa sang balaan nga mga kasulatan.

Moderno nga mga Propeta

Si Joseph Smith amo ang una nga propeta sang moderno nga panahon. Ginpanumbalik niya ang Simbahan ni Jesucristo sa duta. Si Russell M. Nelson amo ang propeta kag Pangulo sang Simbahan sa karon. Ang iya mga manuglaygay sa Unang Pangulohan kag ang Dose ka Apostoles mga propeta man, mga manugpanan-aw, kag manugpahayag sang rebelasyon.

mag-asawa nga nagatan-aw sang komperensya sa telepono

Pagpamati sa Propeta

Ang propeta nagahambal sa aton sa tion sang pangkabilogan nga komperensya kag sa iban man nga mga tinion. Ginatudlo niya sa aton kon ano ang gusto sang Dios nga mahibal-an naton kag kon paano sundon si Jesucristo adlaw-adlaw. Makita naton ang iya mga pinanudlo sa Liahona kag sa ChurchofJesusChrist.org.

Mga Bugay sang Pagsunod sa Propeta

Pagabugayan kita kon sundon naton ang mga pinanudlo sang propeta. Kon sundon naton ang propeta, mahibal-an naton nga ginahimo naton kon anong gusto sang Dios nga aton himuon. Makabatyag kita sang paghidaet sa aton mga kabuhi kag mas magalapit kay Jesucristo.

Gikan sa Balaan nga mga Kasulatan

Ang Dios nagahambal sa Iya mga propeta (tan-awa sa Amos 3:7).

Pagabugayan kita kon sundon naton ang propeta (tan-awa sa Doktrina kag mga Kasugtanan 21:4–6).

Ang propeta ang nagapanguna sa Simbahan (tan-awa sa Doktrina kag mga Kasugtanan 107:91–92).

Mga Tinaga nga Dapat Tandaan

Manugpanan-aw: Isa ka propeta nga makakita gamit ang espirituhanon nga mga mata sang mga butang nga indi maathag sa iban.

Manugpahayag sang rebelasyon: Isa ka tawo nga nagapahayag sang gusto sang Dios nga ipahibalo sa aton.

Magpamatuod: Ang paghambal sang kon ano nga imo ginapatihan ukon nahibal-an nga matuod.

© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, September 2022. Hiligaynon. 18299 861