“Cov Yaj Saub uas Muaj Sia Nyob Coj Peb Txoj Hau Kev,” Liyahaunas, Cuaj Hlis Ntuj. 2022.
Zaj Lus hauv Liyahaunas Txhua Hli, Cuaj Hlis Ntuj 2022
Cov Yaj Saub uas Muaj Sia Nyob Coj Peb Txoj Hau Kev
Cov yaj saub yog cov txiv neej uas Leej Txiv Saum Ntuj Ceeb Tsheej hu kom sawv Nws cev hais lus. Lawv ua tim khawv txog Yexus Khetos thiab qhia txog Nws txoj moo zoo. Cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ntseeg cov yaj saub uas nyob puag thaum ub thiab niaj hnub no.
Vajtswv Hais Lus Dhau Los ntawm cov Yaj Saub
Cov yaj saub txais kev tshwm sim los ntawm Vajtswv. Thaum cov yaj saub txais kev tshoov siab los qhia peb, zoo tib yam li ua Vajtswv hais lus rau peb thiab (saib Lus Qhuab Qhia thiab Kev Khi Lus 1:38). Peb ntseeg tau tias lawv qhia peb tej yam uas Vajtswv xav kom peb paub txog.
Maumoos Sau Ntsiab Lus txog cov Phiaj, los ntawm Tom Lovell
Cov Yaj Saub Qhia txog Yexus Khetos
Txhua tus yaj saub ua tim khawv txog Yexus Khetos. Lawv qhia peb tias Nws yog Vajtswv Leej Tub. Lawv qhia txog Nws lub neej, Nws tus yam ntxwv, thiab Nws txoj Kev Theej Txhoj. Thiab lawv qhia peb coj raws li Nws thiab ua raws li Nws cov lus txib.
Cov Yaj Saub tej Kev Lav Ris
Cov yaj saub qhia txog Yexus Khetos txoj moo zoo. Lawv qhia peb txog cov koob hmoov uas peb txais thaum peb ua raws li cov lus txib thiab tej yam uas yuav muaj los yog peb tsis ua li ntawd. Tej lub sij hawm, lawv tau kev tshoov siab los qhia peb txog tej yam uas yuav muaj los yav tom ntej.
Mauxes thiab cov Phiaj Zeb, los ntawm Jerry Harston
Cov Yaj Saub Thaum Ub
Vajtswv ib txwm qhia tib neeg los ntawm cov yaj saub txij puag thaum ub los. Cov yaj saub uas nyob hauv lub caij nyoog ntawm Phau Qub yog Adas, Nau-as, Anplaham, Mauxes, Yaxayas thiab lwm cov. Kuj muaj cov yaj saub nyob nrog tib neeg hauv Phau Ntawv Maumoos. Cov yaj saub no yog Lihais, Mauxiyas, Amas, thiab Maulaunais Peb kawm tau tej yam lawv qhia thaum peb nyeem cov vaj lug kub.
Cov Yaj Saub Niaj Hnub No
Joseph Smith yog thawj tus yaj saub hauv lub caij nyoog no. Nws yog tus uas muab Yexus Khetos lub Koom Txoos txum tim rov qab los nyob hauv lub ntiaj teb no. Russell M. Nelson yog tus yaj saub thiab tus Thawj Tswj Hwm ntawm lub Koom Txoos tam sim no. Nws ob tug pab cuam hauv Thawj Pawg Thawj Tswj Hwm thiab Kaum Ob tug Thwj Tim kuj yog cov yaj saub, cov pom tau, thiab cov txais kev tshwm sim.
Mloog cov Yaj Saub Lus
Tus yaj saub hais lus rau peb hauv lub tuam rooj sab laj thiab lwm lub sij hawm. Nws qhia peb tej yam uas Vajtswv xav kom peb paub thiab qhia peb kom paub coj raws li Yexus Khetos niaj hnub no. Peb nrhiav tau nws tej lus qhia nyob hauv phau Liyahaunas thiab hauv ChurchofJesusChrist.org.
Cov Koob Hmoov uas Los ntawm Kev Coj Raws Li tus Yaj Saub
Peb yuav tau koob hmoov yog peb coj raws tus yaj saub tej lus qhia. Thaum peb coj raws li tus yaj saub, peb yuav paub tias peb ua tej yam uas Vajtswv xav kom peb ua. Peb yuav muaj kev kaj siab hauv peb lub neej thiab peb yuav los nyob ze Yexus Khetos.
© 2022 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, September 2022. Hmong. 18299 295