“Idauluan dagiti Sibibiag a Propeta,” Liahona, Sept. 2022.
Binulan a Mensahe ti Liahona , Septiembre 2022
Idauluan dagiti Sibibiag a Propeta
Dagiti propeta ti lallaki nga inawagan ti Nailangitan nga Ama nga agaso para Kenkuana. Isuda ti agpaneknek ken ni Jesucristo ken isuroda maipapan iti ebangheliona. Mamati dagiti miembro ti Ti Simbaan ni Jesucristo dagiti Santo iti Ud-udina nga Aldaw kadagiti agpada a nagkauna ken moderno a propeta.
Agsao ti Dios babaen dagiti Propeta
Umawat dagiti propeta iti paltiing manipud iti Dios. No naparegta dagiti propeta a mangisuro kadatayo, isu met laeng a makisasao ti Dios kadatayo (kitaen iti Doktrina ken Katulagan 1:38). Makapagtalektayo nga ibagbagada kadatayo ti kayat ti Dios a maammuantayo.
Ni Moroni a Mangyab-ababa kadagiti Pinanid, ni Tom Lovell
Isuro dagiti Propeta ni Jesucristo
Paneknekan ti amin a propeta maipapan ken ni Jesucristo. Isuroda a ni Jesus Isu ti Anak ti Dios. Isuroda kadatayo maipapan iti biag, pagwadan ken Pannubbotna. Ken ipakitada kadatayo no kasano ti sumurot Kenkuana ken agtungpal kadagiti bilinna.
Dagiti Pagrebbengan dagiti Propeta
Mangisuro dagiti propeta iti ebanghelio ni Jesucristo. Ilawlawagda dagiti bendision a maawattayo no agtulnogtayo kadagiti bilin ken dagiti pagbanagan a maawattayo no saantayo nga agtungpal. No dadduma, mabalin a maparegtada a mangibaga kadatayo maipapan kadagiti masakbayan a pasamak.
Ni Moises ken dagiti Lapida, ni Jerry Harston
Dagiti Nagkauna a Propeta
Insuro ti Dios dagiti tao babaen kadagiti propeta maipud pay idi punganay. Dagiti propeta a nagbiag idi panawen ti Daan a Tulag ket mairaman da Adan, Noe, Abraham, Moises, Isaias, ken dadduma pay. Adda pay dagiti propeta a maibilang kadagiti tao ti Libro ni Mormon. Karaman kadagitoy a propeta da Lehi, Mosiah, Alma, ken Moroni. Masursurotayo no ania ti insuroda babaen ti panangbasa kadagiti nasantuan a kasuratan.
Dagiti Moderno a Propeta
Ni Joseph Smith ti immuna a propeta iti moderno a panawen. Insublina ti Simbaan ni Jesucristo dagiti Santo iti daga. Ni Russell M. Nelson ti propeta ken Presidente ti Simbaan iti agdama. Dagiti mamagbagana iti Umuna a Panguluen ken dagiti Sangapulo-ket-dua nga Apostol ket isuda pay dagiti propeta mammadto, ken mammaltiing.
Panagdengngeg iti propeta
Makisao kadatayo ti propeta bayat ti sapasap a komperensia ken iti dadduma pay a panawen. Isurona kadatayo no ania ti kayat ti Dios a maammuantayo ken no kasano a surotentayo ni Jesucristo ita. Masarakantayo dagiti pannursurona iti Liahona ken iti ChurchofJesusChrist.org.
Dagiti Bendision ti Panangsurot iti Propeta
Mabendisionantayo no surotentayo dagiti pannursuro ti propeta. No surotentayo ti propeta, maammuantayo nga ar-aramidentayo no ania ti ipaaramid ti Dios kadatayo. Mariknatayo ti talna iti biagtayo ken umas-umasidegtayo ken ni Jesucristo.
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, September 2022. Ilokano. 18299 864