“Balombodibua kudi Bambi ba Moyo,” Liahona, Ngondo wa Tshitema 2022.
Mukenji wa ku Ngondo wa Liahona, Ngondo wa Tshitema 2022
Balombodibua kudi Bambi ba Moyo
Bambi badi bantu baluma badi babikidibua kudi Tatu wa mu Diûlu bua kuakula buenda. Badi bajadika bua Yezu Kilisto ne balongesha lumu luimpa luenda. Bidimba bia Ekelezia wa Yezu Kilisto wa Bansantu ba Matuku a Ndekelu bidi bitabuija mu bambi ba kala ne ba Lelu.
Nzambi Udi Wakula Kupitshila ku Bambi
Bambi badi bapeta dibuluibua dia kudi Nzambi. Padi bambi bapeta lungenyi lua kudi Nzambi bua kutulongesha, bidi momumua bu ne Nzambi uvua uyukila netu (tangila Dilongesha ne Bipungidi 1:38). Tudi ne bua kuitaba ne badi batuambila bidi Nzambi musua bua tumvua.
Molomo Ukosoloja Bitata, kudi Tom Lovell
Bambi badi Balongesha Bitangila Yezu Kilisto
Bambi bonsu badi bajadika bua Yezu Kilisto. Badi batulongesha ne udi Muana wa Nzambi. Badi batulongesha bua moyo wenda, tshilejilu tshienda, ne Bupikudi buenda. Badi batuleja mushindu wa tuetu kumulonda ne kutumikila mikenji yenda.
Majitu a Bambi
Bambi badi batulongesha lumu luimpa lua Yezu Kilisto. Badi bumvuija mabenesha atudi tupeta patudi tutumikila mikenji ne bipeta bitudi tupeta patudi katuyi tutumikila. Ku misangu, badi mua kupeshibua lungenyi kudi Nzambi bua kutuambila bua malu adi alua.
Mose ne mabua a biamua, kudi Jerry Harston
Bambi ba Kala
Nzambi wakalongesha bantu kupitshila ku bambi kumbukila ku tshibangidi. Bambi bavuaku mu bikondu bia Dipungila Dikulukulu bu mudi Adama, Noa, Abalahama, Mose, Yeshaya, ne bakuabu. Kuvua kabidi bambi munkatshi mua bantu ba mu Mukanda wa Molomo. Bambi aba bavua bu mudi Lehi, Mosiya, Alama, ne Moloni. Tudi mua kulonga bivuabu balongesha mu kubala kua mifundu.
Bambi ba Lelu
Joseph Smith uvua muambi wakumpala mu bikondu bia lelu. Wakapingajilula Ekelezia wa Yezu Kilisto pa buloba. Russell M. Nelson udi muambi ne Mulombodi Mukulu wa Ekelezia lelu. Babedi benda mu Bulombodi Bukulu bua Kumpala ne Bapostolo, badi pabu bambi, bamonyi, ne babuluidi.
Kuteleja Muambi
Muambi udi wakula kutudi mu mpungilu munena ne mu bikondu bikuabu. Udi utulongesha tshidi Nzambi musua bua tumanya ne mushindu wa tuetu kulonda Yezu Kilisto lelu. Tudi mua kupeta malongesha enda mu Liahona ne ku ChurchofJesusChrist.org.
Mabenesha a Kulonda kua Muambi
Netubeneshibua bitualonda malongesha a muambi. Patudi tulonda muambi, tudi mua kumanya ne tudi munkatshi mua kuenza tshivua Nzambi musua bua tuenza. Tudi mua kumvua ditalala mu mioyo yetu ne kusemena pabuipi ne Yezu Kilisto.
© 2022 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, September 2022. Tshiluba. 18299 760