“The Everlasting Covenant,” Liahona, Oct. 2022.
ຂ່າວສານປະຈຳເດືອນ Liahona, ເດືອນຕຸລາ 2022
The Everlasting Covenant
ທຸກຄົນທີ່ໄດ້ເຮັດພັນທະສັນຍາກັບພຣະເຈົ້າໄດ້ເຂົ້າເຖິງຄວາມຮັກ ແລະ ຄວາມເມດຕາພິເສດ.
The Lord Jesus Christ [ອົງພຣະເຢຊູຄຣິດເຈົ້າ], ໂດຍ ແດວ ພາສັນ
ໃນໂລກນີ້ທີ່ຖືກທຳລາຍໂດຍສົງຄາມ ແລະ ຂ່າວລືກ່ຽວກັບສົງຄາມ, ຄວາມຕ້ອງການຄວາມຈິງ, ຄວາມສະຫວ່າງ, ແລະ ຄວາມຮັກອັນບໍລິສຸດຂອງພຣະເຢຊູຄຣິດແມ່ນມີຫລາຍກວ່າທີ່ເຄີຍມີມາ. ພຣະກິດຕິຄຸນຂອງພຣະຄຣິດສະຫງ່າລາສີ, ແລະ ເຮົາໄດ້ຮັບພອນທີ່ໄດ້ສຶກສາ ແລະ ດຳລົງຊີວິດຕາມກົດເກນຂອງພຣະກິດຕິຄຸນ. ເຮົາຊື່ນຊົມກັບໂອກາດທີ່ໄດ້ແບ່ງປັນມັນ—ເພື່ອເປັນພະຍານເຖິງຄວາມຈິງຂອງມັນ ບໍ່ວ່າເຮົາຈະຢູ່ໃສ.
ຂ້າພະເຈົ້າໄດ້ກ່າວເລື້ອຍໆກ່ຽວກັບຄວາມສຳຄັນແຫ່ງພັນທະສັນຍາຂອງອັບຣາຮາມ ແລະ ການເຕົ້າໂຮມອິດສະຣາເອນ. ເມື່ອເຮົາຮັບເອົາພຣະກິດຕິຄຸນ ແລະ ຮັບບັບຕິສະມາ, ເຮົາໄດ້ຮັບເອົາພຣະນາມອັນສັກສິດຂອງພຣະເຢຊູຄຣິດ. ການບັບຕິສະມາແມ່ນປະຕູທີ່ນຳໄປສູ່ການກາຍເປັນຜູ້ໄດ້ຮັບມໍລະດົກແຫ່ງຄຳສັນຍາທັງໝົດນຳກັນທີ່ພຣະຜູ້ເປັນເຈົ້າໄດ້ມອບໃຫ້ແກ່ ອັບຣາຮາມ, ອີຊາກ, ຢາໂຄບ, ແລະ ລູກຫລານຂອງພວກເພິ່ນ.1
“ພັນທະສັນຍາໃໝ່ ແລະ ເປັນນິດ”2 (ຄຳສອນ ແລະ ພັນທະສັນຍາ 132:6) ແລະ ພັນທະສັນຍາຂອງອັບຣາຮາມເປັນສິ່ງຈຳເປັນຄືກັນ—ສອງວິທີໃນການກ່າວຄຳພັນທະສັນຍາທີ່ພຣະເຈົ້າໄດ້ເຮັດໄວ້ກັບຊາຍ ແລະ ຍິງທີ່ເປັນມະນຸດໃນເວລາທີ່ແຕກຕ່າງກັນ.
ຄຸນນະສັບ ອັນເປັນນິດ ໝາຍເຖິງ ພັນທະສັນຍາທີ່ມີຢູ່ແລ້ວກ່ອນການສ້າງຮາກຖານຂອງໂລກ! ແຜນນັ້ນໄດ້ຖືກກຳນົດໄວ້ໃນສະພາມະຫາສານໃນສະຫວັນ ລວມທັງການຮັບຮູ້ຢ່າງມີສະຕິວ່າ ເຮົາຈະຖືກຕັດອອກຈາກທີ່ປະທັບຂອງພຣະເຈົ້າ. ເຖິງຢ່າງໃດກໍຕາມ, ພຣະເຈົ້າໄດ້ສັນຍາວ່າ ພຣະອົງຈະຈັດຕຽມພຣະຜູ້ຊ່ວຍໃຫ້ລອດໄວ້ໃຫ້ຜູ້ທີ່ຈະເອົາຊະນະຜົນສະທ້ອນຂອງການຕົກ. ພຣະເຈົ້າໄດ້ບອກອາດາມຫລັງຈາກການບັບຕິສະມາຂອງລາວວ່າ:
“ເຈົ້າເປັນຄົນຕາມລະບຽບຂອງພຣະອົງຜູ້ປາດສະຈາກການເລີ່ມຕົ້ນຂອງມື້ ຫລື ທີ່ສິ້ນສຸດຂອງປີ, ຈາກຕະຫລອດຊົ່ວນິລັນດອນເຖິງຕະຫລອດຊົ່ວນິລັນດອນ.
“ຈົ່ງເບິ່ງ, ເຈົ້າເປັນໜຶ່ງໃນເຮົາ, ເປັນບຸດຂອງພຣະເຈົ້າ; ແລະ ດັ່ງນັ້ນຄົນທັງປວງຈະກາຍເປັນບຸດຂອງເຮົາ” (ໂມເຊ 6:67–68).
ອາດາມ ແລະ ເອວາ ໄດ້ຮັບເອົາພິທີການຂອງການບັບຕິສະມາ ແລະ ເລີ່ມຕົ້ນຂະບວນການຂອງການເປັນໜຶ່ງກັບພຣະເຈົ້າ. ເຂົາເຈົ້າໄດ້ເຂົ້າໄປໃນເສັ້ນທາງແຫ່ງພັນທະສັນຍາ.
ເມື່ອທ່ານ ແລະ ຂ້າພະເຈົ້າເຂົ້າໄປໃນເສັ້ນທາງນັ້ນຄືກັນ, ເຮົາມີວິຖີຊີວິດໃໝ່. ດັ່ງນັ້ນ ເຮົາຈຶ່ງສ້າງຄວາມສຳພັນກັບພຣະເຈົ້າ ທີ່ຍອມໃຫ້ພຣະອົງອວຍພອນ ແລະ ປ່ຽນແປງເຮົາ. ເສັ້ນທາງແຫ່ງພັນທະສັນຍານຳພາເຮົາກັບຄືນໄປຫາພຣະອົງ. ຖ້າເຮົາຍອມໃຫ້ພຣະເຈົ້າໄຊຊະນະໃນຊີວິດຂອງເຮົາ, ພັນທະສັນຍານັ້ນຈະນຳພາເຮົາໃຫ້ເຂົ້າໃກ້ຊິດກັບພຣະອົງຫລາຍຂຶ້ນເລື້ອຍໆ. ພັນທະສັນຍາທັງໝົດມີຈຸດປະສົງເພື່ອຜູກມັດ. ມັນສ້າງຄວາມສຳພັນດ້ວຍສາຍສຳພັນອັນເປັນນິດ.
ຄວາມຮັກ ແລະ ຄວາມເມດຕາພິເສດ
ເມື່ອເຮົາເຮັດພັນທະສັນຍາກັບພຣະເຈົ້າ, ເຮົາຈະໜີຈາກພື້ນຖານກາງຕະຫລອດໄປ. ພຣະເຈົ້າຈະບໍ່ປະຖິ້ມຄວາມສຳພັນຂອງພຣະອົງກັບຜູ້ທີ່ໄດ້ສ້າງຄວາມຜູກພັນເຊັ່ນນັ້ນກັບພຣະອົງ. ຕາມຄວາມຈິງແລ້ວ, ທຸກຄົນທີ່ໄດ້ເຮັດພັນທະສັນຍາກັບພຣະເຈົ້າ ໄດ້ເຂົ້າເຖິງຄວາມຮັກ ແລະ ຄວາມເມດຕາທີ່ພິເສດ. ໃນພາສາເຮັບເຣີ, ພັນທະສັນຍາແຫ່ງຄວາມຮັກນັ້ນຖືກເອີ້ນວ່າ hesed (חֶסֶד).3
Hesed ບໍ່ມີສັບທຽບເທົ່າໃນພາສາອັງກິດ. ຜູ້ແປພຣະຄຣິສຕະທຳຄຳພີສະບັບກະສັດເຈມສ໌ ຄົງມີບັນຫາວ່າຈະໃຊ້ຄຳໃດກັບ hesed ໃນພາສາອັງກິດ. ເຂົາເຈົ້າມັກເລືອກໃຊ້ “ຄວາມຮັກແພງ.” ຄຳນີ້ຕີຄວາມໝາຍໄດ້ຫລາຍ ແຕ່ບໍ່ແມ່ນຄວາມໝາຍທັງໝົດຂອງ hesed. ການແປອື່ນໆກໍໃຊ້ຄຳ, ເຊັ່ນວ່າ “ເມດຕາ” ແລະ “ຄວາມດີ.” Hesed ເປັນສັບພິເສດສະເພາະທີ່ບັນຍາຍຄວາມສຳພັນຂອງພັນທະສັນຍາ ຊຶ່ງໃນນັ້ນທັງສອງຝ່າຍຖືກຜູກມັດໃຫ້ຈົງຮັກພັກດີ ແລະ ຊື່ສັດຕໍ່ກັນແລະກັນ.
ການແຕ່ງງານຊັ້ນສູງກໍເປັນຄວາມສຳພັນຂອງພັນທະສັນຍາເຊັ່ນນີ້. ສາມີ ແລະ ພັນລະຍາເຮັດພັນທະສັນຍາກັບພຣະເຈົ້າ ແລະ ນຳກັນວ່າຈະຈົງຮັກພັກດີ ແລະ ຊື່ສັດຕໍ່ກັນແລະກັນ.
Hesed ເປັນຄວາມຮັກ ແລະ ຄວາມເມດຕາພິເສດທີ່ພຣະເຈົ້າຮູ້ສຶກຕໍ່ ແລະ ມີຕໍ່ຜູ້ທີ່ໄດ້ເຮັດພັນທະສັນຍາກັບພຣະອົງ. ແລະ ເຮົາກໍຮູ້ສຶກ hesed ຕໍ່ພຣະອົງ.
ເມື່ອທ່ານກັບຂ້າພະເຈົ້າໄດ້ເຮັດພັນທະສັນຍາກັບພຣະເຈົ້າແລ້ວ, ຄວາມສຳພັນຂອງເຮົາກັບພຣະອົງຈະໃກ້ຊິດຫລາຍກວ່າ ກ່ອນທີ່ເຮົາໄດ້ເຮັດພັນທະສັນຍາ. ບັດນີ້ ເຮົາຖືກຜູກມັດເຂົ້າກັນ.
ຮູບຖ່າຍໂດຍ ແຈຣີ ແອວ ການສ໌
ຍ້ອນວ່າພຣະເຈົ້າມີ hesed ຕໍ່ຜູ້ທີ່ໄດ້ເຮັດພັນທະສັນຍາກັບພຣະອົງ, ພຣະອົງຈະຮັກເຂົາເຈົ້າ. ພຣະອົງຈະສືບຕໍ່ທຳງານກັບເຂົາເຈົ້າ ແລະ ສະເໜີມອບໂອກາດໃຫ້ເຂົາເຈົ້າເພື່ອປ່ຽນແປງ. ພຣະອົງຈະໃຫ້ອະໄພເຂົາເຈົ້າເມື່ອເຂົາເຈົ້າກັບໃຈ. ແລະ ຖ້າຫາກເຂົາເຈົ້າຫລົງທາງໄປ, ພຣະອົງຈະຊ່ວຍໃຫ້ເຂົາເຈົ້າພົບເຫັນເສັ້ນທາງກັບຄືນໄປຫາພຣະອົງ.
ເມື່ອທ່ານກັບຂ້າພະເຈົ້າໄດ້ເຮັດພັນທະສັນຍາກັບພຣະເຈົ້າແລ້ວ, ຄວາມສຳພັນຂອງເຮົາກັບພຣະອົງຈະໃກ້ຊິດຫລາຍກວ່າ ກ່ອນທີ່ເຮົາໄດ້ເຮັດພັນທະສັນຍາ. ບັດນີ້ ເຮົາຖືກຜູກມັດເຂົ້າກັນ. ຍ້ອນພັນທະສັນຍາຂອງເຮົາກັບພຣະເຈົ້າ, ພຣະອົງຈະບໍ່ມີວັນອິດເມື່ອຍໃນຄວາມພະຍາຍາມຂອງພຣະອົງທີ່ຈະຊ່ວຍເຫລືອເຮົາ, ແລະ ເຮົາຈະບໍ່ເຮັດໃຫ້ຄວາມອົດທົນທີ່ເມດຕາຂອງພຣະອົງສຳລັບເຮົາໝົດໄປ. ເຮົາແຕ່ລະຄົນມີບ່ອນພິເສດໃນພຣະໄທຂອງພຣະເຈົ້າ. ພຣະອົງມີຄວາມຫວັງສູງໃນຕົວພວກເຮົາ.
ທ່ານກໍຮູ້ເຖິງການປະກາດແຫ່ງປະຫວັດສາດທີ່ພຣະຜູ້ເປັນເຈົ້າໄດ້ມອບໃຫ້ແກ່ສາດສະດາ ໂຈເຊັບ ສະມິດ. ມັນມາເຖິງໂດຍທາງການເປີດເຜີຍ. ພຣະຜູ້ເປັນເຈົ້າໄດ້ກ່າວກັບໂຈເຊັບວ່າ, “ຄຳສັນຍານີ້ເປັນຂອງພວກເຈົ້າເໝືອນກັນ, ເພາະວ່າພວກເຈົ້າເປັນຂອງອັບຣາຮາມ, ແລະ ຄຳສັນຍາໄດ້ຖືກເຮັດໄວ້ກັບອັບຣາຮາມ” (ຄຳສອນ ແລະ ພັນທະສັນຍາ 132:31).
ດັ່ງນັ້ນ, ພັນທະສັນຍາອັນເປັນນິດນີ້ຈຶ່ງໄດ້ຖືກຟື້ນຟູໃຫ້ເປັນພາກສ່ວນໜຶ່ງຂອງການຟື້ນຟູທີ່ຍິ່ງໃຫຍ່ຂອງພຣະກິດຕິຄຸນໃນຄວາມສົມບູນຂອງມັນ. ໃຫ້ຄິດກ່ຽວກັບສິ່ງນີ້! ພັນທະສັນຍາຂອງການແຕ່ງງານໃນພຣະວິຫານຖືກຜູກມັດໂດຍກົງ ເຂົ້າກັບພັນທະສັນຍານັ້ນຂອງອັບຣາຮາມ. ໃນພຣະວິຫານ ຄູ່ແຕ່ງງານໄດ້ຖືກແນະນຳຕໍ່ພອນ ທັງໝົດ ທີ່ຖືກຮັກສາໄວ້ສຳລັບລູກຫລານທີ່ຊື່ສັດຂອງອັບຣາຮາມ, ອີຊາກ, ແລະ ຢາໂຄບ.
ເໝືອນດັ່ງອາດາມ, ທ່ານກັບຂ້າພະເຈົ້າໄດ້ເຂົ້າສູ່ເສັ້ນທາງແຫ່ງພັນທະສັນຍາເມື່ອຮັບບັບຕິສະມາດ້ວຍຕົວເອງ. ແລ້ວເຮົາເຂົ້າໄປຢ່າງສົມບູນໃນພຣະວິຫານ. ພອນຂອງພັນທະສັນຍາຂອງອັບຣາຮາມໄດ້ຖືກມອບໃຫ້ໃນພຣະວິຫານທີ່ສັກສິດ. ພອນເຫລົ່ານີ້ອະນຸຍາດໃຫ້ເຮົາ, ໃນເວລາຟື້ນຄືນຊີວິດ, ໄດ້ “ຮັບບັນລັງ, ອານາຈັກ, ເຂດປົກຄອງ, ອຳນາດ, ການຄອບຄອງ, ‘ສູງສຸດ ແລະ ເລິກສຸດທັງປວງ’ [ຄຳສອນ ແລະ ພັນທະສັນຍາ 132:19].”4
ໃນທ້າຍຂອງພຣະຄຳພີເດີມ, ເຮົາອ່ານຄຳສັນຍາຂອງມາລາກີ ວ່າເອລີຢາຈະ “ນຳພໍ່ກັບລູກມາພົບກັນອີກ” (ມາລາກີ 4:6). ໃນອິດສະຣາເອນສະໄໝບູຮານ, ການກ່າວເຖິງບັນພະບຸລຸດເຊັ່ນນັ້ນ ຄົງຈະຕ້ອງກ່າວເຖິງອັບຣາຮາມ, ອີຊາກ, ແລະ ຢາໂຄບ. ຄຳສັນຍານີ້ແຈ່ມແຈ້ງຂຶ້ນເມື່ອເຮົາອ່ານຂໍ້ຄວາມນີ້ໃນໜັງສືອີກເຫລັ້ມ ຊຶ່ງໂມໂຣໄນໄດ້ອ້າງອີງກັບສາດສະດາ ໂຈເຊັບ ສະມິດ ວ່າ: “ເພິ່ນ [ເອລີຢາ] ຈະປູກຝັງ ຄຳສັນຍາທີ່ໄດ້ເຮັດກັບພໍ່ໄວ້ໃນໃຈລູກ, ແລະ ໃຈລູກຈະຫັນໄປຫາພໍ່ຂອງເຂົາ” (ໂຈເຊັບ ສະມິດ—ປະຫວັດ 1:39). ແນ່ນອນບັນພະບຸລຸດເຫລົ່ານັ້ນແມ່ນລວມທັງອັບຣາຮາມ, ອີຊາກ, ແລະ ຢາໂຄບ. (ເບິ່ງ ຄຳສອນ ແລະ ພັນທະສັນຍາ 27:9–10.)
ຜູ້ທີ່ເຮັດພັນທະສັນຍາ ແລະ ຮັກສາມັນ ໄດ້ຮັບຄຳສັນຍາວ່າຈະມີຊີວິດນິລັນດອນ ແລະ ຮັບຄວາມສູງສົ່ງ. ພຣະເຢຊູຄຣິດເປັນຜູ້ຮັບປະກັນພັນທະສັນຍາເຫລົ່ານັ້ນ.
ລາຍລະອຽດຈາກ Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ
ພຣະເຢຊູຄຣິດ: ສູນກາງຂອງພັນທະສັນຍາ
ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ ຊ່ວຍພຣະບິດາໃຫ້ບັນລຸຄຳສັນຍາຂອງພຣະອົງທີ່ໄດ້ເຮັດໄວ້ກັບລູກໆຂອງພຣະອົງ. ເພາະພຣະເຢຊູຄຣິດ “ເປັນທາງນັ້ນ, ເປັນຄວາມຈິງ,” ສະນັ້ນ “ບໍ່ມີຜູ້ໃດມາເຖິງພຣະບິດາໄດ້, ນອກຈາກມາທາງ [ພຣະອົງ]” (ໂຢຮັນ 14:6). ການບັນລຸພັນທະສັນຍາຂອງອັບຣາຮາມສາມາດເປັນໄປໄດ້ຍ້ອນການຊົດໃຊ້ຂອງພຣະຜູ້ຊ່ວຍໃຫ້ລອດຂອງເຮົາ, ອົງພຣະເຢຊູຄຣິດເຈົ້າ. ພຣະເຢຊູຄຣິດເປັນ ສູນກາງ ແຫ່ງພັນທະສັນຍາຂອງອັບຣາຮາມ.
ພຣະຄຳພີເດີມບໍ່ໄດ້ເປັນພຽງແຕ່ພຣະຄຳພີເທົ່ານັ້ນ; ແຕ່ເປັນໜັງສືປະຫວັດສາດນຳອີກ. ທ່ານຄົງຈື່ການອ່ານກ່ຽວກັບການແຕ່ງງານຂອງນາງຊາຣາຍກັບອັບຣາມໄດ້. ຍ້ອນວ່າພວກເພິ່ນບໍ່ມີລູກ, ນາງຊາຣາຍຈຶ່ງມອບສາວໃຊ້ຂອງນາງຊື່, ຮາກາ, ໃຫ້ເປັນເມຍຂອງອັບຮາຣາມນຳອີກ, ເພື່ອໃຫ້ສອດຄ່ອງກັບການຊີ້ນຳຂອງພຣະຜູ້ເປັນເຈົ້າ. ນາງຮາກາໄດ້ເກີດລູກຊື່ ອິດຊະມາເອນ.5 ອັບຣາມຮັກອິດຊະມາເອນ, ແຕ່ລາວຈະບໍ່ໄດ້ເປັນລູກຜູ້ທີ່ພັນທະສັນຍາຈະຖືກສົ່ງຕໍ່ໃຫ້. (ເບິ່ງ ປະຖົມມະການ 11:29–30; 16:1, 3, 11; ຄຳສອນ ແລະ ພັນທະສັນຍາ 132:34.)
ດ້ວຍພອນຈາກພຣະເຈົ້າ, ແລະ ໃນການຕອບສະໜອງສັດທາຂອງນາງຊາຣາຍ,6 ນາງຈຶ່ງຖືພາໃນໄວຊະລາຂອງນາງ ເພື່ອວ່າພັນທະສັນຍາຈະຖືກສົ່ງຕໍ່ໃຫ້ອີຊາກ ລູກຊາຍ ຂອງນາງ (ເບິ່ງ ປະຖົມມະການ 17:19). ລາວເກີດໃນພັນທະສັນຍາ.
ພຣະເຈົ້າໄດ້ຕັ້ງຊື່ໃໝ່ໃຫ້ນາງຊາຣາຍ ແລະ ອັບຣາມ—ຊາຣາ ແລະ ອັບຣາຮາມ (ເບິ່ງ ປະຖົມມະການ 17:5, 15). ການມອບຊື່ໃໝ່ເຫລົ່ານັ້ນໄດ້ເປັນຈຸດເລີ່ມຕົ້ນຊີວິດ ແລະ ເປັນຈຸດໝາຍປາຍທາງໃໝ່ສຳລັບຄອບຄົວນີ້.
ອັບຣາຮາມຮັກທັງອິດຊະມາເອນ ແລະ ອີຊາກ. ພຣະເຈົ້າໄດ້ບອກອັບຣາຮາມວ່າ ອິດຊະມາເອນຈະຂະຫຍາຍພົງພັນ ແລະ ກາຍເປັນປະຊາຊາດທີ່ຍິ່ງໃຫຍ່ (ເບິ່ງ ປະຖົມມະການ 17:20). ໃນເວລາດຽວກັນ, ພຣະເຈົ້າໄດ້ເຮັດໃຫ້ແຈ້ງຊັດວ່າ ພັນທະສັນຍາອັນເປັນນິດຈະຖືກສະຖາປະນາຂຶ້ນຜ່ານທາງອີຊາກ (ເບິ່ງ ປະຖົມມະການ 17:19).
ທຸກຄົນທີ່ຮັບເອົາພຣະກິດຕິຄຸນກາຍເປັນພາກສ່ວນໃນເຊື້ອສາຍຂອງອັບຣາຮາມ. ໃນຄາລາເຕຍເຮົາອ່ານວ່າ:
“ຄົນໃດໃນພວກເຈົ້າໄດ້ຮັບບັບຕິສະມາໃນພຣະຄຣິດແລ້ວ ຄົນນັ້ນກໍໄດ້ສວມຊີວິດຂອງພຣະອົງ.
“… ພວກເຈົ້າທຸກຄົນເປັນອັນໜຶ່ງອັນດຽວກັນໃນພຣະຄຣິດເຈົ້າເຢຊູ.
“ຖ້າພວກເຈົ້າເປັນຄົນຂອງພຣະຄຣິດແລ້ວ ພວກເຈົ້າກໍເປັນເຊື້ອສາຍຂອງອັບຣາຮາມ ຄືເປັນຜູ້ໄດ້ຮັບມໍລະດົກຕາມພຣະສັນຍາ” (ຄາລາເຕຍ 3:27–29).
ດັ່ງນັ້ນ, ເຮົາຈຶ່ງສາມາດກາຍເປັນຜູ້ໄດ້ຮັບມໍລະດົກແຫ່ງພັນທະສັນຍາ ບໍ່ວ່າໂດຍກຳເນີດ ຫລື ໃນຖານະລູກບຸນທຳກໍຕາມ.
ເມື່ອເຮົາເຮັດພັນທະສັນຍາກັບພຣະເຈົ້າ, ເຮົາຈະໜີຈາກພື້ນຖານກາງຕະຫລອດໄປ. ພຣະເຈົ້າຈະບໍ່ປະຖິ້ມຄວາມສຳພັນຂອງພຣະອົງກັບຜູ້ທີ່ໄດ້ສ້າງຄວາມຜູກພັນເຊັ່ນນັ້ນກັບພຣະອົງ.
ຢາໂຄບ ລູກຊາຍຂອງອີຊາກກັບນາງເຣເບກາໄດ້ເກີດໃນພັນທະສັນຍາ. ນອກເໜືອຈາກນີ້, ລາວໄດ້ເລືອກເຂົ້າໄປດ້ວຍຕົວເອງ. ດັ່ງທີ່ທ່ານຮູ້ຈັກ, ຊື່ຂອງຢາໂຄບໄດ້ປ່ຽນເປັນ ອິດສະຣາເອນ (ເບິ່ງ ປະຖົມມະການ 32:28), ແປວ່າ “ໃຫ້ພຣະເຈົ້າໄຊຊະນະ” ຫລື “ຜູ້ທີ່ໄຊຊະນະກັບພຣະເຈົ້າ.”7
ໃນ ອົບພະຍົບ ເຮົາອ່ານວ່າ “ພຣະເຈົ້າລະນຶກເຖິງພັນທະສັນຍາ ທີ່ພຣະອົງໄດ້ໃຫ້ໄວ້ກັບອັບຣາຮາມ, ອີຊາກ, ແລະ ຢາໂຄບ” (ອົບພະຍົບ 2:24). ພຣະເຈົ້າໄດ້ບອກລູກຫລານຂອງອິດສະຣາເອນວ່າ, “ຖ້າພວກເຈົ້າເຊື່ອຟັງເຮົາ ແລະ ຮັກສາພັນທະສັນຍາຂອງເຮົາ ພວກເຈົ້າກໍຈະເປັນ [ຊັບອັນປະເສີດ] ຂອງເຮົາ” (ອົບພະຍົບ 19:5).
ວະລີ “ຊັບອັນປະເສີດ” ຖືກແປຈາກພາສາເຮັບເຣີ segullah, ແປວ່າ ສິ່ງຄອບຄອງທີ່ມີມູນຄ່າສູງ—“ຊັບສົມບັດ.”8
ພຣະທຳພຣະບັນຍັດສອງ ບອກເລື່ອງລາວເຖິງຄວາມສຳຄັນຂອງພັນທະສັນຍາ. ອັກຄະສາວົກຂອງພຣະຄຳພີໃໝ່ຮູ້ເຖິງພັນທະສັນຍາ. ຫລັງຈາກເປໂຕໄດ້ປິ່ນປົວຊາຍທີ່ເປັນລ່ອຍຢູ່ຂັ້ນໄດພຣະວິຫານ, ເພິ່ນໄດ້ສິດສອນຜູ້ຄົນທີ່ຢືນເບິ່ງກ່ຽວກັບພຣະເຢຊູ. ເປໂຕໄດ້ເວົ້າວ່າ, “ພຣະເຈົ້າຂອງອັບຣາຮາມ, ອີຊາກ ແລະ ຢາໂຄບ ຄືອົງທີ່ບັນພະບຸລຸດຂອງພວກເຮົານະມັດສະການ ໄດ້ໃຫ້ພຣະເຢຊູ ພຣະຜູ້ຮັບໃຊ້ຂອງພຣະອົງໄດ້ຮັບສະຫງ່າລາສີ” (ກິດຈະການ 3:13).
ເປໂຕໄດ້ປິດຂ່າວສານຂອງເພິ່ນໂດຍການບອກຜູ້ຄົນທີ່ຢູ່ໃນບ່ອນຊຸມນຸມວ່າ, “ທ່ານທັງຫລາຍເປັນລູກຫລານຂອງ [ສາດສະດາ], ແລະ ຂອງພັນທະສັນຍາທີ່ພຣະເຈົ້າໄດ້ຊົງສັນຍາໄວ້ ແກ່ບັນພະບຸລຸດຂອງພວກທ່ານ ຄືໄດ້ກ່າວກັບອັບຣາຮາມວ່າ, ຄອບຄົວທັງໝົດທົ່ວແຜ່ນດິນໂລກຈະໄດ້ຮັບພຣະພອນ” (ກິດຈະການ 3:25). ເປໂຕໄດ້ເຮັດໃຫ້ແຈ້ງຊັດຕໍ່ພວກເຂົາວ່າ ພາກສ່ວນໜຶ່ງໃນພາລະກິດຂອງພຣະຄຣິດແມ່ນເພື່ອບັນລຸພັນທະສັນຍາຂອງພຣະເຈົ້າ.
ພຣະຜູ້ເປັນເຈົ້າໄດ້ເທດສະໜາທີ່ຄ້າຍຄືກັນນີ້ກັບຜູ້ຄົນໃນອາເມຣິກາສະໄໝບູຮານ. ຢູ່ທີ່ນັ້ນ, ພຣະຄຣິດທີ່ຟື້ນຄືນພຣະຊົນແລ້ວໄດ້ບອກຜູ້ຄົນວ່າພວກເຂົາເປັນໃຜແທ້ໆ. ພຣະອົງໄດ້ກ່າວວ່າ:
“ຈົ່ງເບິ່ງ, ເຈົ້າເປັນລູກຫລານຂອງສາດສະດາ; ແລະ ເຈົ້າເປັນເຊື້ອສາຍອິດສະຣາເອນ; ແລະ ເຈົ້າຢູ່ໃນພັນທະສັນຍາ ຊຶ່ງພຣະບິດາໄດ້ເຮັດໄວ້ກັບບັນພະບຸລຸດຂອງເຈົ້າ, ເມື່ອພຣະອົງກ່າວກັບອັບຣາຮາມວ່າ: ແລະ ໃນລູກຫລານຂອງເຈົ້າ ທຸກຕະກຸນຂອງແຜ່ນດິນໂລກຈະໄດ້ຮັບພອນ.
“ພຣະບິດາຍົກເຮົາໃຫ້ກັບເຈົ້າກ່ອນ, ແລະ ສົ່ງເຮົາມາໃຫ້ພອນແກ່ເຈົ້າໃນການເຮັດໃຫ້ເຈົ້າທຸກຄົນ ຫັນໜີຈາກຄວາມຊົ່ວຮ້າຍຂອງເຈົ້າ; ແລະ ນີ້ກໍເພາະວ່າເຈົ້າເປັນລູກຫລານແຫ່ງພັນທະສັນຍາ” (3 ນີໄຟ 20:25–26).
ທ່ານເຫັນຄວາມສຳຄັນຂອງເລື່ອງນີ້ບໍ? ຜູ້ທີ່ຮັກສາພັນທະສັນຍາຂອງຕົນກັບພຣະເຈົ້າ ຈະກາຍເປັນບຸກຄົນທີ່ມີພູມຕ້ານທານບາບໄດ້ດີ! ຜູ້ທີ່ຮັກສາພັນທະສັນຍາຂອງຕົນຈະມີກຳລັງວັງຊາໃນການຕ້ານທານກັບອິດທິພົນຂອງໂລກ.
ຜູ້ທີ່ຮັກສາພັນທະສັນຍາຂອງຕົນກັບພຣະເຈົ້າ ຈະກາຍເປັນບຸກຄົນທີ່ມີພູມຕ້ານທານບາບໄດ້ດີ! ຜູ້ທີ່ຮັກສາພັນທະສັນຍາຂອງຕົນຈະມີກຳລັງວັງຊາໃນການຕ້ານທານກັບອິດທິພົນຂອງໂລກ.
ວຽກງານເຜີຍແຜ່: ແບ່ງປັນພັນທະສັນຍາ
ພຣະຜູ້ເປັນເຈົ້າໄດ້ບັນຊາໃຫ້ເຮົາປະກາດພຣະກິດຕິຄຸນ ແລະ ແບ່ງປັນພັນທະສັນຍາ. ດ້ວຍເຫດນີ້ພວກເຮົາຈຶ່ງມີຜູ້ສອນສາດສະໜາ. ພຣະອົງປາດຖະໜາໃຫ້ລູກໆທຸກຄົນຂອງພຣະອົງມີໂອກາດທີ່ຈະເລືອກພຣະກິດຕິຄຸນຂອງພຣະຜູ້ຊ່ວຍໃຫ້ລອດ ແລະ ເຂົ້າໄປໃນເສັ້ນທາງແຫ່ງພັນທະສັນຍາ. ພຣະເຈົ້າຢາກເຊື່ອມຕໍ່ ຜູ້ຄົນທັງໝົດ ເຂົ້າກັບພັນທະສັນຍາ ທີ່ພຣະອົງໄດ້ເຮັດໄວ້ກັບອັບຣາຮາມ.
ດັ່ງນັ້ນ, ວຽກງານເຜີຍແຜ່ຈຶ່ງເປັນພາກສ່ວນສຳຄັນຂອງການເຕົ້າໂຮມອິດສະຣາເອນອັນຍິ່ງໃຫຍ່. ການເຕົ້າໂຮມນັ້ນເປັນວຽກງານສຳຄັນທີ່ສຸດ ທີ່ກຳລັງເກີດຂຶ້ນຢູ່ໃນໂລກທຸກວັນນີ້. ບໍ່ມີສິ່ງໃດສາມາດທຽບເທົ່າໃນຄວາມໃຫຍ່ໂຕ. ບໍ່ມີສິ່ງໃດສາມາດທຽບເທົ່າໃນຄວາມສຳຄັນ. ຜູ້ສອນສາດສະໜາຂອງພຣະຜູ້ເປັນເຈົ້າ—ສານຸສິດຂອງພຣະອົງ—ໄດ້ຮ່ວມມືໃນວຽກງານທີ່ທ້າທາຍອັນຍິ່ງໃຫຍ່ທີ່ສຸດ, ອຸດົມການທີ່ຍິ່ງໃຫຍ່ທີ່ສຸດ, ວຽກງານທີ່ຍິ່ງໃຫຍ່ທີ່ສຸດຢູ່ໃນໂລກທຸກວັນນີ້.
ແຕ່ມັນມີຫລາຍກວ່ານັ້ນ—ຫລາຍກວ່ານັ້ນອີກ. ມີຄວາມຕ້ອງການຫລາຍທີ່ຈະປະກາດພຣະກິດຕິຄຸນໃຫ້ກັບຜູ້ຢູ່ຟາກມ່ານເບື້ອງນັ້ນ. ພຣະເຈົ້າຢາກໃຫ້ທຸກຄົນ, ຢູ່ທັງສອງຟາກມ່ານ, ໄດ້ຊື່ນຊົມກັບພອນແຫ່ງພັນທະສັນຍາຂອງພຣະອົງ. ເສັ້ນທາງແຫ່ງພັນທະສັນຍາເປີດຕ້ອນຮັບທຸກຄົນ. ພວກເຮົາຂໍໃຫ້ທຸກຄົນເດີນໄປໃນເສັ້ນທາງນັ້ນກັບພວກເຮົາ. ບໍ່ມີວຽກງານອື່ນໃດອີກທີ່ທຸກຄົນມີສ່ວນຮ່ວມແບບນີ້. ດ້ວຍວ່າ “ພຣະຜູ້ເປັນເຈົ້າເມດຕາປານີຕໍ່ທຸກໆຄົນທີ່ເອີ້ນຫາພຣະນາມອັນສັກສິດຂອງພຣະອົງດ້ວຍຄວາມຈິງໃຈຂອງໃຈເຂົາ” (ຮີລາມັນ 3:27).
ເພາະຖານະປະໂລຫິດແຫ່ງເມນຄີເສເດັກໄດ້ຖືກຟື້ນຟູ, ຍິງ ແລະ ຊາຍທີ່ຮັກສາພັນທະສັນຍາໄດ້ເຂົ້າເຖິງ “ພອນ ທາງວິນຍານ ທັງໝົດ” ຂອງພຣະກິດຕິຄຸນ (ຄຳສອນ ແລະ ພັນທະສັນຍາ 107:18; ເນັ້ນຄຳເນີ້ງ).
ໃນການອຸທິດພຣະວິຫານເຄີດແລນ ໃນປີ 1836, ພາຍໃຕ້ການຊີ້ນຳຂອງພຣະຜູ້ເປັນເຈົ້າ, ເອລີຢາໄດ້ມາປະກົດ. ແມ່ນຫຍັງຄືຈຸດປະສົງຂອງເພິ່ນ? “ເພື່ອຫັນ … ລູກໄປຫາພໍ່” (ຄຳສອນ ແລະ ພັນທະສັນຍາ 110:15). ອີລາຍກໍໄດ້ມາປະກົດເຊັ່ນກັນ. ແມ່ນຫຍັງຄືຈຸດປະສົງຂອງເພິ່ນ? ເພື່ອມອບ “ຍຸກສະໄໝແຫ່ງພຣະກິດຕິຄຸນຂອງອັບຣາຮາມໃຫ້, ໂດຍກ່າວວ່າ ໃນພວກເຮົາ ແລະ ລູກຫລານຂອງພວກເຮົາ ຄົນທຸກລຸ້ນຕໍ່ຈາກພວກເຮົາຈະໄດ້ຮັບພອນ” ໃຫ້ແກ່ໂຈເຊັບ ສະມິດ ແລະ ອໍລີເວີ ຄາວເດີຣີ (ຄຳສອນ ແລະ ພັນທະສັນຍາ 110:12). ດັ່ງນັ້ນ, ພຣະອາຈານຈຶ່ງໄດ້ມອບສິດອຳນາດຂອງຖານະປະໂລຫິດ ແລະ ສິດທີ່ຈະມອບພອນພິເສດສະເພາະແຫ່ງພັນທະສັນຍາຂອງອັບຣາຮາມໃຫ້ແກ່ຄົນອື່ນ ໃຫ້ກັບໂຈເຊັບ ສະມິດ ແລະ ອໍລີເວີ ຄາວເດີຣີ.9
ໃນສາດສະໜາຈັກ, ເຮົາເດີນໄປໃນເສັ້ນທາງແຫ່ງພັນທະສັນຍາ ທັງເປັນການສ່ວນຕົວ ແລະ ເປັນກຸ່ມໃຫຍ່. ເຊັ່ນດຽວກັນກັບການແຕ່ງງານ ແລະ ຄອບຄົວມີຄວາມສຳພັນພິເສດສະເພາະ ແບບເສັ້ນຂະໜານຄຽງຄູ່ກັນໄປ ທີ່ສ້າງຄວາມຮັກພິເສດ, ຄວາມສຳພັນໃໝ່ກໍຖືກສ້າງຂຶ້ນເຊັ່ນກັນ ເມື່ອເຮົາຜູກມັດຕົວເອງໂດຍພັນທະສັນຍາ ແບບເສັ້ນຕັ້ງສູງຂຶ້ນເລື້ອຍໆ ກັບພຣະເຈົ້າຂອງເຮົາ!
ນີ້ອາດເປັນສິ່ງທີ່ນີໄຟໝາຍເຖິງ ເມື່ອເພິ່ນກ່າວວ່າ ພຣະເຈົ້າ “ຮັກຜູ້ທີ່ຮັບຮູ້ພຣະອົງເປັນພຣະເຈົ້າຂອງພວກເຂົາ” (1 ນີໄຟ 17:40). ນີ້ຄືເຫດຜົນ, ໃນສ່ວນຂອງພັນທະສັນຍາ, ທີ່ຄວາມເມດຕາ ແລະ ຄວາມຮັກພິເສດ—ຫລື hesed—ມີໃຫ້ທຸກຄົນທີ່ເຂົ້າໄປໃນການຜູກມັດ ແລະ ໃນຄວາມສຳພັນອັນໃກ້ຊິດກັບພຣະເຈົ້າ, ແມ່ນແຕ່ “ເຖິງພັນຊົ່ວເຊັ່ນຄົນ” (ພຣະບັນຍັດສອງ 7:9).
ການເຮັດພັນທະສັນຍາກັບພຣະເຈົ້າປ່ຽນແປງຄວາມສຳພັນຂອງເຮົາກັບພຣະອົງຕະຫລອດໄປ. ພັນທະສັນຍາອວຍພອນເຮົາດ້ວຍຄວາມຮັກ ແລະ ຄວາມເມດຕາຢ່າງຫລວງຫລາຍ.10 ມັນມີຜົນກະທົບຕໍ່ຜູ້ທີ່ເຮົາເປັນ ແລະ ວິທີທີ່ພຣະເຈົ້າຈະຊ່ວຍເຫລືອເຮົາໃຫ້ກາຍເປັນຜູ້ທີ່ເຮົາສາມາດກາຍເປັນ. ເຮົາໄດ້ຮັບສັນຍາວ່າ ເຮົາ, ເຊັ່ນກັນ, ສາມາດເປັນ “ຊັບອັນປະເສີດ” ຕໍ່ພຣະອົງ (ເພງສັນລະເສີນ 135:4).
ຄຳສັນຍາ ແລະ ສິດທິພິເສດ
ຜູ້ທີ່ເຮັດພັນທະສັນຍາສັກສິດ ແລະ ຮັກສາມັນ ໄດ້ຮັບຄຳສັນຍາວ່າຈະມີຊີວິດນິລັນດອນ ແລະ ໄດ້ຮັບຄວາມສູງສົ່ງ, “ຂອງປະທານອັນຍິ່ງໃຫຍ່ທີ່ສຸດໃນຂອງປະທານທັງໝົດຂອງພຣະເຈົ້າ” (ຄຳສອນ ແລະ ພັນທະສັນຍາ 14:7). ພຣະເຢຊູຄຣິດເປັນຜູ້ຮັບປະກັນພັນທະສັນຍາເຫລົ່ານັ້ນ (ເບິ່ງ ເຮັບເຣີ 7:22; 8:6). ຜູ້ຮັກສາພັນທະສັນຍາທີ່ຮັກພຣະເຈົ້າ ແລະ ໃຫ້ພຣະອົງໄຊຊະນະເໜືອທຸກສິ່ງອື່ນໃດໃນຊີວິດຂອງຕົນ ຈະເຮັດໃຫ້ພຣະອົງມີອິດທິພົນທີ່ມີພະລັງທີ່ສຸດໃນຊີວິດຂອງເຂົາເຈົ້າ.
ໃນວັນເວລາຂອງເຮົາ ເຮົາມີສິດທິພິເສດທີ່ຈະຮັບເອົາປິຕຸພອນ ແລະ ຮຽນຮູ້ກ່ຽວກັບການເຊື່ອມຕໍ່ຂອງເຮົາເຂົ້າກັບບັນພະບຸລຸດໃນສະໄໝບູຮານ. ພອນເຫລົ່ານັ້ນກໍຈະໃຫ້ເຫັນຈັກໜ້ອຍໜຶ່ງກ່ຽວກັບສິ່ງທີ່ຢູ່ຂ້າງໜ້ານຳອີກ.
ຍ້ອນພັນທະສັນຍາຂອງເຮົາກັບພຣະເຈົ້າ, ພຣະອົງຈະບໍ່ມີວັນອິດເມື່ອຍໃນຄວາມພະຍາຍາມຂອງພຣະອົງທີ່ຈະຊ່ວຍເຫລືອເຮົາ, ແລະ ເຮົາຈະບໍ່ເຮັດໃຫ້ຄວາມອົດທົນທີ່ເມດຕາຂອງພຣະອົງສຳລັບເຮົາໝົດໄປ.
Lovest Thou Me More Than These? [ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?] ໂດຍ ເດວິດ ລິນສະລີ
ການເອີ້ນຂອງເຮົາໃນຖານະອິດສະຣາເອນແຫ່ງພັນທະສັນຍາ ແມ່ນເພື່ອໃຫ້ແນ່ໃຈວ່າ ສະມາຊິກທຸກຄົນຂອງສາດສະໜາຈັກຮັບຮູ້ຄວາມຊື່ນຊົມ ແລະ ສິດທິພິເສດທີ່ກ່ຽວຂ້ອງກັບການເຮັດພັນທະສັນຍາກັບພຣະເຈົ້າ. ມັນເປັນການເອີ້ນໃຫ້ຊຸກຍູ້ຊາຍ ແລະ ຍິງທີ່ຮັກສາພັນທະສັນຍາ, ເດັກນ້ອຍທຸກຄົນ, ເພື່ອໃຫ້ແບ່ງປັນພຣະກິດຕິຄຸນໃຫ້ກັບຜູ້ທີ່ຢູ່ອ້ອມຂ້າງເຂົາເຈົ້າ. ມັນກໍເປັນການເອີ້ນໃຫ້ສະໜັບສະໜູນ ແລະ ຊຸກຍູ້ຜູ້ສອນສາດສະໜາຂອງເຮົານຳອີກ, ຜູ້ຖືກສົ່ງອອກໄປດ້ວຍຄຳແນະນຳໃຫ້ບັບຕິສະມາ ແລະ ຊ່ວຍເຕົ້າໂຮມອິດສະຣາເອນ, ເພື່ອວ່າເຮົາຈະໄດ້ເປັນຜູ້ຄົນຂອງພຣະເຈົ້ານຳກັນ ແລະ ພຣະອົງຈະເປັນພຣະເຈົ້າຂອງເຮົາ (ເບິ່ງ ຄຳສອນ ແລະ ພັນທະສັນຍາ 42:9).
ຊາຍ ແລະ ຍິງທຸກຄົນຜູ້ມີພາກສ່ວນໃນພິທີການຖານະປະໂລຫິດ ແລະ ຜູ້ທີ່ເຮັດ ແລະ ຮັກສາພັນທະສັນຍາກັບພຣະເຈົ້າ ສາມາດເຂົ້າເຖິງອຳນາດຂອງພຣະເຈົ້າໂດຍກົງ. ເຮົາຮັບເອົາພຣະນາມຂອງພຣະຜູ້ເປັນເຈົ້າເປັນສ່ວນບຸກຄົນ. ເຮົາກໍຮັບເອົາພຣະນາມຂອງພຣະອົງເປັນກຸ່ມໃຫຍ່ເຊັ່ນກັນ. ການມັກໃຊ້ຊື່ທີ່ຖືກຕ້ອງຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເປັນວິທີທີ່ຈຳເປັນສຳລັບເຮົາເປັນກຸ່ມໃຫຍ່ໃນການຮັບເອົາພຣະນາມຂອງພຣະອົງ. ແທ້ຈິງແລ້ວ, ການກະທຳດ້ວຍຄວາມໃຈບຸນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແລະ ສະມາຊິກຂອງສາດສະໜາຈັກ ເປັນການສະແດງອອກເຖິງຄວາມ hesed ຂອງພຣະເຈົ້າ.
ເປັນຫຍັງຊາວອິດສະຣາເອນຈຶ່ງກະຈັດກະຈາຍໄປ? ຍ້ອນວ່າຜູ້ຄົນໄດ້ລະເມີດພຣະບັນຍັດ ແລະ ແກວ່ງກ້ອນຫີນໃສ່ສາດສະດາ. ພຣະບິດາທີ່ຊົງຮັກ ແຕ່ໂສກເສົ້າໄດ້ຕອບຮັບດ້ວຍການກະຈັດກະຈາຍຊາວອິດສະຣາເອນໄປໄກໆ ແລະ ທຸກທີ່ທຸກບ່ອນ.11
ເຖິງຢ່າງໃດກໍຕາມ, ພຣະອົງໄດ້ກະຈັດກະຈາຍພວກເຂົາດ້ວຍຄຳສັນຍາວ່າ ໃນມື້ໜຶ່ງຊາວອິດສະຣາເອນຈະຖືກເຕົ້າໂຮມຄືນອີກເຂົ້າໃນຝູງຂອງພຣະອົງ.
ເຜົ່າຂອງຢູດາໄດ້ຮັບໂອກາດໃຫ້ກະກຽມໂລກສຳລັບການສະເດັດມາຄັ້ງທຳອິດຂອງພຣະຜູ້ເປັນເຈົ້າ. ຈາກເຜົ່ານັ້ນ, ນາງມາຣີໄດ້ຖືກເອີ້ນໃຫ້ເປັນມານດາຂອງພຣະບຸດຂອງພຣະເຈົ້າ.
ເຜົ່າຂອງໂຢເຊັບ, ຜ່ານທາງເຜົ່າຂອງເພິ່ນ ແລະ ລູກຊາຍຂອງນາງອາເສນາດ, ເອຟະຣາອີມ ແລະ ມານາເຊ (ເບິ່ງ ປະຖົມມະການ 41:50–52; 46:20), ໄດ້ຮັບໜ້າທີ່ຮັບຜິດຊອບໃຫ້ນຳພາການເຕົ້າໂຮມອິດສະຣາເອນ, ເພື່ອກະກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ.
ໃນຄວາມສຳພັນທີ່ຕະຫລອດກາລະນານ hesed, ມັນເປັນເລື່ອງປົກກະຕິທີ່ພຣະເຈົ້າຢາກເຕົ້າໂຮມອິດສະຣາເອນ. ພຣະອົງເປັນພຣະບິດາເທິງສະຫວັນຂອງເຮົາ! ພຣະອົງຢາກໃຫ້ລູກໆແຕ່ລະຄົນຂອງພຣະອົງ—ຢູ່ທັງສອງຟາກມ່ານ—ໄດ້ຍິນຂ່າວສານຂອງການຟື້ນຟູພຣະກິດຕິຄຸນຂອງພຣະເຢຊູຄຣິດ.
ເສັ້ນທາງແຫ່ງຄວາມຮັກ
ເສັ້ນທາງແຫ່ງພັນທະສັນຍາແມ່ນເສັ້ນທາງແຫ່ງຄວາມຮັກ— hesed ທີ່ໜ້າເຫລືອເຊື່ອນັ້ນ, ຄວາມເຫັນອົກເຫັນໃຈທີ່ຫ່ວງໃຍ ແລະ ການເອື້ອມອອກໄປຫາກັນແລະກັນນັ້ນ. ການຮູ້ສຶກຄວາມຮັກນັ້ນເປັນການປົດປ່ອຍ ແລະ ການຍົກລະດັບ. ຄວາມຊື່ນຊົມອັນຍິ່ງໃຫຍ່ທີ່ສຸດ ທີ່ທ່ານຈະເຄີຍປະສົບຄື ເມື່ອທ່ານເຕັມໄປດ້ວຍຄວາມຮັກທີ່ມີຕໍ່ພຣະເຈົ້າ ແລະ ຕໍ່ລູກໆທຸກຄົນຂອງພຣະອົງ.
ການຮັກພຣະເຈົ້າຫລາຍກວ່າຄົນອື່ນໆ ຫລື ສິ່ງອື່ນໆ ແມ່ນເງື່ອນໄຂທີ່ນຳສັນຕິສຸກ, ຄວາມໝັ້ນໃຈ, ແລະ ຄວາມຊື່ນຊົມທີ່ແທ້ຈິງມາໃຫ້.
ເສັ້ນທາງແຫ່ງພັນທະສັນຍາແມ່ນກ່ຽວກັບຄວາມສຳພັນຂອງເຮົາກັບພຣະເຈົ້າ—ຄວາມສຳພັນ hesed ຂອງເຮົາກັບພຣະອົງ. ເມື່ອເຮົາເຂົ້າໄປໃນພັນທະສັນຍາກັບພຣະເຈົ້າ, ເຮົາໄດ້ເຮັດພັນທະສັນຍາກັບພຣະອົງ ຜູ້ຈະຮັກສາພຣະຄຳຂອງພຣະອົງສະເໝີ. ພຣະອົງຈະເຮັດທຸກສິ່ງທີ່ພຣະອົງສາມາດ, ໂດຍບໍ່ລະເມີດອຳເພີໃຈຂອງເຮົາ, ເພື່ອຊ່ວຍໃຫ້ເຮົາຮັກສາພັນທະສັນຍາຂອງເຮົາໄວ້.
ພຣະຄຳພີມໍມອນເລີ່ມຕົ້ນ ແລະ ຈົບດ້ວຍຂໍ້ອ້າງອີງຕໍ່ພັນທະສັນຍາອັນເປັນນິດນີ້. ຈາກຊື່ຂອງພຣະຄຳພີເຖິງປະຈັກພະຍານມ້ວນທ້າຍຂອງມໍມອນ ແລະ ໂມໂຣໄນ, ພຣະຄຳພີມໍມອນໄດ້ອ້າງເຖິງພັນທະສັນຍາ (ເບິ່ງ ມໍມອນ 5:20; 9:37). ການອອກມາຂອງພຣະຄຳພີມໍມອນ ເປັນເຄື່ອງໝາຍຕໍ່ໂລກວ່າ ພຣະຜູ້ເປັນເຈົ້າໄດ້ເລີ່ມຕົ້ນເຕົ້າໂຮມອິດສະຣາເອນ ແລະ ເຮັດໃຫ້ພັນທະສັນຍາທີ່ພຣະອົງໄດ້ເຮັດໄວ້ກັບອັບຣາຮາມ, ອີຊາກ, ແລະ ຢາໂຄບສຳເລັດຜົນ.12
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ພວກເຮົາໄດ້ຖືກເອີ້ນໃນເວລາທີ່ສຳຄັນນີ້ ໃນປະຫວັດສາດຂອງໂລກ ເພື່ອສິດສອນຊາວໂລກກ່ຽວກັບຄວາມສວຍງາມ ແລະ ພະລັງຂອງພັນທະສັນຍາອັນເປັນນິດ. ພຣະບິດາເທິງສະຫວັນຂອງເຮົາໄວ້ວາງພຣະໄທເຮົາຢ່າງບໍ່ສົງໄສ ໃນການເຮັດວຽກງານອັນຍິ່ງໃຫຍ່ນີ້.
ຂ່າວສານນີ້ກໍໄດ້ມອບໃຫ້ຢູ່ໃນກອງປະຊຸມໃຫຍ່ສາມັນສຳລັບຜູ້ນຳ ໃນວັນທີ 31 ເດືອນມີນາ, 2022.
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, October 2022. Laotian. 18317 331