“Ti Agnanayon a Katulagan,” Liahona, Okt. 2022.
Binulan a Mensahe ti Liahona , Oktubre 2022
Ti Katulagan iti Panagbuniag
Amin dagidiay nakitulag iti Dios ket makagun-od iti naisangsangayan a kita ti ayat ken asi.
Ni Apo Jesucristo, ni Del Parson
Iti daytoy lubong a nadadael gapu kadagiti gubat ken damdamag ti gubgubat, dakdakkel ngem idi ti panagkasapulan iti kinapudno, lawag, ken ti natarnaw nga ayat ni Jesu-Cristo. Nadayag ti ebanghelio ni Cristo, ket naparaburantayo a mangadal iti daytoy ken agbiag a maitunos kadagiti pammilinna. Agrag-otayo kadagiti gundawaytayo a mangibinglay iti dayta—tapno paneknekan dagiti kinapudnona sadino man ti ayantayo.
Masansan a nagsaoak maipapan iti kinapateg ti katulagan ni Abraham ken ti panaguummong ti Israel. No arakupentayo ti ebanghelio ken mabuniagan, awatentayo iti bagbagitayo ti sagrado a nagan ni Jesucristo. Ti panagbuniag ti ruangan nga agturong iti panagbalintayo a makipagtawid iti amin a kari nga inted ti Apo idi un-unana kada Abraham, Isaac, Jacob, ken ti kaputotanda.1
“Ti baro ken agnanayon a katulagan”2 (Doktrina ken Katulagan 132:6) ken ti katulagan ni Abraham ket kangrunaanna nga agpadpada—dua a wagas ti panangibalikas iti katulagan nga inaramid ti Dios kadagiti mortal a lallaki ken babbai iti nagduduma a panawen.
Ti balikas nga agnanayon ipasimudaagna nga adda daytoy a katulagan sakbay pay ti pannakabangon ti lubong! Ti plano a naikabil iti Dakkel a Konseho idiay Langit ket nairaman ti makapaupay a pannakabigbig a maisinatayo amin iti sidong ti Dios. Nupay kasta, inkari ti Dios a mangipaay iti maysa a Mangisalakan a mangparmek kadagiti pagbanagan ti Pannakatnag. Imbaga ti Dios ken ni Adan kalpasan ti pannakabautisarna:
“Adda kenka ti alagadenna nga awan ti aldaw a namunganayanna wenno tawen a paggibusanna, manipud iti kinaagnanayon agingga iti kinaagnanayon.
“Adtoy, maysaka kaniak, ti anak ti Dios; ket kastoy nga agbalin koma ti amin nga annakko” (Moises 6:67–68).
Inawat da Adan ken Eva ti ordinansa ti panagbuniag ket rinugianda ti proseso ti panagbalin a maymaysa iti Dios. Simrekda iti dana ti katulagan.
No sumrektayo met iti dayta a dana, addaantayo iti baro a wagas ti panagbiag. Mangparnuaytayo ngarud iti relasion iti Dios a mangipalubos Kenkuana a mangbendision ken mangbalbaliw kadatayo. Ti dana ti katulagan ti mangiturong kadatayo nga agsubli Kenkuana. No bay-antayo nga agballigi ti Dios iti biagtayo, dayta a katulagan ti mangiturongto kadatayo nga umas-asideg ken umas-asideg Kenkuana. Nairanta a mangibegkes ti amin a katulagan. Mangparnuayda iti relasion nga addaan kadagiti agnanayon a singgalut.
Maysa a Naisangsangayan nga Ayat ken Asi
Apaman a makitulagtayo iti Dios, awanen ti sasaadentayo nga agbalin a neutral iti agnanayon. Saanto a baybay-an ti Dios ti relasionna kadagidiay nangbukel iti kasta a begkes Kenkuana. Kinapudnona, amin dagidiay nakitulag iti Dios ket makagun-od iti naisangsangayan a kita ti ayat ken asi. Iti pagsasao a Hebreo, maawagan dayta natulagan nga ayat iti hesed (חֶסֶד).3
Awan ti umdas a kapadana tihesed iti Ingles. Nalabit a nagkagumaan dagiti agipatpatarus iti King James Version ti Biblila no kasano a mausar ti hesed iti Ingles. Masansan a pilienda ti “manangngaasi nga ayat.” Makaay-ayo unay daytoy ngem saan amin a kaipapanan ti hesed. Naipatarus met ti dadduma a patarus, kas iti “asi” ken “kinaimbag.” Ti hesed ket naidumduma a termino a mangiladawan iti relasion ti katulagan a sadiay agpada a sigurado nga agbalin a napudno ken matalek dagiti dagiti agpada a partido iti tunggal maysa.
Ti celestial a kallaysa ti kasta a natulagan a relasion. Makitulag dagiti agassawa iti Dios ken iti tunggal maysa nga agbalin a napudno ken matalek iti tunggal maysa.
Ti hesed ket maysa a naisangsangayan a kita ti ayat ken asi a marikna ti Dios ken agpatingga kadagiti nakatulag Kenkuana. Ket agsubadtayo iti hesed para Kenkuana.
Apaman a nakaaramidtayo iti katulagan iti Dios, agbalin a nasingsinged nga amang ti relasiontayo Kenkuana ngem sakbay ti katulagantayo. Itan naibegkestayo a sangkamaysa.
Ladawan ni Jerry L. Garns
Gapu ta ti Dios hesed para kadagiti nakitulag Kenkuana, ayatennanto ida. Ituloynanto ti makipatrabaho kadakuada ken idiayana kadakuada dagiti gundaway nga agbalbaliw. Pakawanennanto ida no agbabawida. Ken no mayaw-awanda, tulongannanto ida a mangsapul iti dalanda nga agsubli Kenkuana.
Apaman a nakaaramidtayo iti katulagan iti Dios, agbalin a nasingsinged nga amang ti relasiontayo Kenkuana ngem sakbay ti katulagantayo. Itan naibegkestayo a sangkamaysa. Gapu iti katulagantayo iti Dios, saanto a pulos a mabannog kadagiti panagreggetna a tumulong kadatayo, ken pulos a dinanto maibus ti naasi nga anusna kadatayo. Tunggal maysa kadatayo addaan iti naisangsangayan a lugar iti puso ti Dios. Nangato dagiti namnamana para kadatayo.
Ammoyo ti napnuan pakasaritaan a panangipakdaar ti Apo ken ni Propeta Joseph Smith. Dimteng daytoy babaen iti paltiing. Kinuna ti Apo ken ni Joseph, “Kukuam pay daytoy a kari, gapu ta nagtaudka ken ni Abraham, ket naited ti kari ken ni Abraham” (Doktrina ken Katulagan 132:31).
Babaen iti dayta, naisubli daytoy agnanayon a katulagan kas paset ti naindaklan a Pannakaisubli ti ebanghelio iti pakabuklanna. Panunotenyo! Ti katulagan iti kallaysa a naaramid iti templo ket direkta a naibegkes iti katulagan ni Abraham. Iti templo mayam-ammo ti agassawa iti amin a bendision a nailatang para iti napudno a kaputotan da Abraham, Isaac, ken Jacob.
Kas ken ni Adan, personal a simrerktayo iti dana ti katulagan iti panagbuniag. Kalpasanna sumrektayo iti daytoy a naan-anay iti templo. “Maitalek kadagiti nasantuan a templo dagiti bendision ti katulagan ti Abraham. Dagitoy a bendision ti mangpalugod kadatayo, iti panagungar tapno “agtawid iti trono, pagarian, bileg, masakupan, ken, pagturayan, iti ‘pannakaitan-ok ken pannakaigloriatayo iti amin a banag’ [Doktrina ken Katulagan 132:19].”4
Iti pangserra a teksto ti Daan a Tulag, mabasatayo ti kari ni Malakias a ni Elias ket “isublinanto ti puso dagiti amma kadagiti annak, ken ti puso dagiti annak kadagiti ammada” (Malakias 4:6). Iti nagkauna nga Israel, ti kasta a panangtukoy kadagiti amma ket iramanna koma dagiti amma a da Abraham, Isaac, ken Jacob. Naipalawag daytoy a kari no basaentayo ti sabali a bersion daytoy a bersikulo nga inadaw ni Moroni ken ni Propeta Joseph Smith: “Imulananto [ni Elias] iti puspuso dagiti ubbing ti karkari a naaramid kadagiti amma, ket maisublinto ti puspuso dagiti ubbing kadagiti ammada” (Joseph Smith—Pakasaritaan 1:39). Awan duadua a mairaman kadagita nga amma da Abraham, Isaac, ken Jacob. (Kitaen iti Doktrina ken Katulagan 27:9–10.)
Dagidiay mangaramid kadagiti sagrado a katulagan ken mangtungpal kadagitoy ket naikarian iti agnanayon a biag ken pannakaitan-ok. Ni Jesucristo ti mangipanamnama kadagita a katulagan.
Detalye manipud iti Ni Cristo ken ti Nabaknang nga Agtutubo nga Agturay, ni Heinrich Hofmann
Jesucristo: Ti Sentro ti Katulagan
Ti pangsubbot a sakripisio ti Mangisalakan ti nangpabalin iti Ama a mangtungpal kadagiti karina nga inaramidna kadagiti annakna. Gapu ta ni Jesucristo isu “ti dalan, ti kinapudno, ken ti biag: nga awan ti umay iti Ama, no di babaen [Kenkuana]” (Juan 14:6). Agbalin a maaramid ti pannakatungpal ti katulagan ni Abraham gapu iti Pannubbot ti Mangisalakantayo, ni Apo Jesucristo. Adda ni Jesucristo iti sentro ti katulagan ni Abraham.
Ti Daan a Tulag saan laeng a libro ti nasantuan a kasuratan; maysa pay daytoy a libro ti pakasaritaan. Malagipmo ti panangbasam ti maipapan iti panagasawa da Sarai ken Abram. Gapu ta awan anakda, inted ni Sarai ti adipenna a ni Agar, tapno agbalin met nga asawa ni Abram, maitunos iti panangiwanwan ti Apo. Inyanak ni Agar ni Ismael.5 Ay-ayaten ni Abram ni Ismael, ngem saan nga isu ti agbalin nga ubing a pakaipasaan ti katulagan. (Kitaen iti Genesis 11:29–30; 16:1, 3, 11; Doktrina ken Katulagan 132:34.)
Kas maysa a bendision manipud iti Dios, ken kas sungbat iti pammati ni Sarai,6 nagsikog kadagiti nataengan a tawenna tapno maipasa ti katulagan babaen iti anakna a lalaki, ni Isaac (kitaen iti Genesis 17:19). Nayanak isuna iti katulagan.
Inikkan ti Dios da Sarai ken Abram iti baro a nagan—Sara ken Abraham (kitaen iti Genesis 17:5, 15). Ti pannakaited dagita a baro a nagan ti nangtanda iti panangrugi ti baro a biag ken baro a gasat daytoy a pamilia.
Agpada nga ay-ayaten ni Abraham da Ismael ken Isaac. Imbaga ti Dios ken ni Abraham nga umadunto ni Ismael ket agbalinto a dakkel a nasion (kitaen iti Genesis 17:20). Naigiddato iti dayta, nalawag nga imbaga ti Dios a maipasdekto ti agnanayon a katulagan babaen ken Isaac (kitaen iti Genesis 17:19).
Amin nga umawat iti ebanghelio ket agbalin a paset ti kapuonan ni Abraham. Iti Taga Galacia mabasatayo:
“Ta adu kadatayo a nabuniagan ken Cristo ti nangikawes ken Cristo.
“… Maymaysakayo amin ken Cristo Jesus.
“Ket no taonakayo ni Cristo, dakayo ngarud ti kaputotan ni Abraham, ken agtawid a maibatay iti kari” (Taga Galacia 3:27–29).
Gapuna, mabalintayo ti agbalin nga agtawid iti katulagan babaen man ti pannakayanak wenno babaen ti panangampon.
Apaman a makitulagtayo iti Dios, awanen ti sasaadentayo nga agbalin a neutral iti agnanayon. Saanto a baybay-an ti Dios ti relasionna kadagidiay nangbukel iti kasta a begkes Kenkuana.
Naipaasngay iti katulagan ni Jacob nga anak da Isaac ken Rebecca. Kas mainayon, pinilina ti sumrek iti bukodna a pagayatan. Kas ammoyo, nabaliwan ti nagan ni Jacob iti Israel ( Genesis 32:28), kayatna a sawen “bay-an nga agballigi ti Dios” wenno “maysa nga agballigi iti Dios.”7
Iti Exodo mabasatayo a “linagip ti Dios ti katulaganna ken ni Abraham, ken ni Isaac, ken ni Jacob” (Exodo 2:24). Imbaga ti Dios kadagiti annak ti Israel, “No umannugotkayo a napaypayso iti saok ket salimetmetanyo ti tulagko, iti kasta dakayonto ti ipangpangrunak” (Exodo 19:5).
Ti ragup ti balikas nga “ipangpangruna” ket naipatarus manipud iti Hebreo a segullah, kayatna a sawen ti nangato ti pategna a sanikua—maysa a “gameng.”8
Salaysayen ti libro ti Deuteronomio ti kinapateg ti katulagan. Ammo dagiti apostol ti Baro a Tulag daytoy a katulagan. Kalpasan a pinaimbag ni Pedro ti maysa a pilay a lalaki iti agdan ti templo, insurona dagiti agbuybuya maipapan ken ni Jesus. Kinuna ni Pedro, “Ti Dios da Abraham, ken Isaac, ken Jacob, ti Dios dagiti ammatayo, inikkanna ti dayag ti Anakna a Jesus” (Dagiti Aramid 3:13).
Inggibus ni Pedro ti mensahena babaen ti panangibagana kadagiti agbuybuya kenkuana, “adtoy, dakayo ti annak dagiti propeta; ket addakayo iti balay ti Israel; ket addakayo iti katulagan nga inaramid ti Ama kadagiti ammayo, a kinunana ken ni Abraham: Dagitinto bukelmo ti pakaparaburan dagiti amin nga agkakabagian iti daga (Dagiti Aramid 3:25). Inlawlawag daytoy ni Pedro kadakuada a paset ti mision ni Cristo ti mangipatungpal iti katulagan ti Dios.
Nangted manen ti Apo iti isu met a sermon kadagiti tao ti nagkauna nga Israel. Idiay, imbaga ti nagungar a Cristo kadagiti tao no asinoda a talaga. Kinunana:
Ket adtoy, dakayo ti annak dagiti propeta; ket addakayo iti balay ti Israel; ket addakayo iti katulagan nga inaramid ti Ama kadagiti ammayo, a kinunana ken ni Abraham: Dagitinto bukelmo ti pakaparaburan dagiti amin nga agkakabagian iti daga.
“Immun-unaak a tinudingan ti Ama ngem kadakayo, ken imbaonnak a mangbendision kadakayo tapno mayaonkayo kadagiti basolyo; ket daytoy gapu ta annaknakayo iti katulagan” (3 Nephi 20:25–26).
Makitam kadi ti kinapateg daytoy? Dagidiay mangsalimetmet kadagiti katulaganda iti Dios agbalindanto a kita dagiti kararua a naandur iti basol! Dagidiay mangsalimetmet kadagiti katulaganda maaddaandanto iti pigsa a mangsaranget iti kanayon nga impluensia ti lubong.
Dagidiay mangsalimetmet kadagiti katulaganda iti Dios agbalindanto a kita dagiti kararua a naandur iti basol! Dagidiay mangsalimetmet kadagiti katulaganda maaddaandanto iti pigsa a mangsaranget iti kanayon nga impluensia ti lubong.
Aramid ti Misionario: Pananggibinglay iti Katulagan
Imbilin ti Apo nga iwarastayo ti ebanghelio ken ibinglaytayo ti katulagan. Dayta ti gapuna nga addaantayo kadagiti misionarrio. Kayatna a maaddaan ti tunggal maysa kadagiti annakna iti gundaway a mangpili iti ebanghelio ti Mangisalakan ken mangirugi iti dana ti katulagan. ayat ti Dios nga ikonekta ti amin a tao iti katulagan nga inaramidna idi un-unana ken ni Abraham.
Gapuna, ti aramid ti misionario ket napateg a paset ti dakkel a panaguummong ti Israel. Dayta a panagguummong ti kapatgan a banag a maar-aramid iti daga iti agdama. Awan ti sabali pay a maidilig iti kadakkelna. Awan ti sabali pay a maidilig iti kinapategna. Dagiti misionario ti Apo—dagiti disipulona—ket makiramraman iti kadakkelan a karit, ti kadakkelan a gapuanan, ti kadakkelan a trabaho ditoy daga ita.
Ngem adda pay—napatpateg pay. Adda dakkel a panagkasapulan a mangisaknap iti ebanghelio kadagiti tao iti sabali a bangir ti belo. Kayat ti Dios a ti tunggal maysa, iti agsumbangir ti belo, nga agsagrap kadagiti bendision ti katulaganna. Silulukat ti dana ti katulagan para iti amin. Ipakpakaasimi iti amin a makipagna kadakami iti dayta a dana. Awan ti sabali nga aramid a mangiraman iti amin nga agpada a sibibiag ken natay. Gapu ta “manangngaasi ti Apo iti amin nga, iti kinapudno ti puspusoda, umawag iti nasantuan a naganna” (Helaman 3:27).
Gapu ta naisublin ti Kinasaserdote a Melchizedek, magun-od dagiti babbai ken lallaki nga agtungtungpal iti katulagan ti “amin a naespirituan a bendision” ti ebanghelio (Doktrina ken Katulagan 107:18; nainayon ti panangyunay-unay).
Iti pannakaidaton ti Templo ti Kirtland idi 1836, babaen ti panangiturong ti Apo, nagparang ni Elijah. Ti panggepna? “Tapno mangisubli … kadagiti ubbing iti ammada” (Doktrina ken Katulagan 110:15). Nagparang met ni Elias. Ti panggepna? Tapno maikumit kada Joseph Smith ken Oliver Cowdery “ti dispensasion ti ebanghelio ni Abraham, a kinunana a babaen kadakami nasken a mabendisionanto amin a kaputotan a sumarsaruno kadakami” (Doktrina ken Katulagan 110:12). Gapuna, inted ti Maestro kada Joseph Smith ken Oliver Cowdery ti turay ti priesthood ken ti karbengan a mangidanon iti dadduma kadagiti naidumduma a bendision ti katulagan ni Abraham.9
Iti Simbaan, agdaliasattayo iti dana ti katulagan agpadpada a saggaysa ken sangkamaysa. Kas met laeng iti panagpada kadagiti kallaysa ken pamilia iti lateral a begkes a mangparnuay iti naisangsangayan nga ayat, kasta met ti baro a relasion a mabukel no ibegkestayo ti bagitayo babaen iti katulagan a bertikal iti Diostayo!
Mabalin a daytoy ti kayat a sawen ni Nephi idi kinunana a ti Dios “ ayatenna dagiti agtarigagay kenkuana nga agbalin a Diosda” (1 Nephi 17:40). Daytoy ti gapuna no apay, kas paset ti katulagan, ti naisangsangayan nga asi ken ayat—wenno hesed—ket sidadaan a magun-odan ti amin a sumrek iti daytoy nabegkesan ken nasinged a relasion iti Dios, uray “iti rinibu a kaputotan” (Deuteronomio 7:9).
Ti panagaramid iti katulagan iti Dios ket mangbalbaliw iti relasiontayo Kenkuana iti agnanayon. Daytoy ti mangparabur kadatayo iti nayon a pagrukodan ti ayat ken asi.10 Apektuanna ti kinasiasinotayo ken no kasano a tulongannatayo ti Dios nga agbalin a no ania ti pakapagbalinantayo. Naikari kadatayo a datayo, met, makapagbalintayo a “naisangsangayan a gameng” Kenkuana (Salmo 135:4).
Dagiti Kari ken Pribilehio
Dagidiay mangaramid kadagiti sagrado a katulagan ken mangtungpal kadagitoy ket naikarian iti agnanayon a biag ken pannakaitan-ok, “ti kaindaklan ti amin kadagiti sagut ti Dios” (Doktrina ken Katulagan 14:7). Ni Jesucristo ti mangipanamnama kadagita a katulagan (kitaen iti Hebreo 7:22; 8:6). . Dagiti mangsalimetmet iti katulagan nga agayat iti Dios ken mangpalubos Kenkuana nga agballigi iti amin a dadduma pay a banag iti biagda ket mangaramid Kenkuana a kabibilgan nga impluensia iti biagda.
iti aldawtayo naparaburantayo nga umawat kadagiti bendision ti patriarka ken maammuantayo ti koneksiontayo kadagiti nagkauna a patriarka. Dagita a bendision ti mangipaay pay iti panangtaldiap iti no ania ti mapasamak iti masanguanan.
Gapu iti katulagantayo iti Dios, saanto a pulos a mabannog kadagiti panagreggetna a tumulong kadatayo, ken pulos a dinanto maibus ti naasi nga anusna kadatayo.
Ad-adda ti Panagayatmo Kaniak Ngem Dagitoy? ni David Lindsley
Pagrebbengantayo kas natulagan nga Israel ti mangpennek a maamiris ti tunggal miembro ti Simbaan ti rag-o ken pribilehio a mainaig iti panagaramid kadagiti katulagan iti Dios. Maysa daytoy nga awag a mangparegta iti tunggal lalaki ken babai a mangsalimetmet iti katulagan, ubing a lalaki ken babai, a mangibinglay iti ebanghelio kadagidiay umay iti uneg ti sakup ti impluensiada. Maysa pay daytoy nga awag a mangsuporta ken mangparegta kadagiti misionariotayo, a naibaon nga addaan kadagiti pangiturong a mangbuniag ken tumulong a mangummong iti Israel, tapno sangsangkamaysatayo nga agbalin a tattao ti Dios ken Isu ti agbalinto a Diostayo (kitaen iti Doktrina ken Katulagan 42:9).
Tunggal lalaki ken tunggal babai a makiraman kadagiti ordinansa ti priesthood ken mangsalimetmet kadagiti katulagan iti Dios ket addaan iti direkta a pannakagun-od iti bileg ti Dios. Awatentayo ti nagan ti Apo iti bagbagitayo kas indibidual. Awatentayo pay ti naganna kas tao. Ti panagbalin a napasnek maipapan iti panangusar iti umno a nagan ti Ti Simbaan ni Jesucristo dagiti Santo iti Ud-udina nga Aldaw ket maysa a napateg a wagas a datayo kas tao ket awatentayo ti naganna kadatayo. Pudno, tunggal naparabur nga aramid ti Ti Simbaan ni Jesucristo dagiti Santo iti Ud-udina nga Aldaw ken dagiti miembrona ket maysa a pakaipeksaan iti hesedti Dios.
Apay a nawarawara ti Israel? Agsipud ta sinalungasing dagiti tao dagiti bilin ken binatoda dagiti propeta. Simmungbat ti maysa a naayat ngem agladladingit nga Ama babaen ti panangiwarasna iti Israel iti adayo ken nasaknap.11
Nupay kasta, inwarawarana ida nga addaan iti kari nga addanto aldaw a maummong manen ti Israel iti ikubna.
Naikkan ti tribu ti Juda iti pagrebbengan a mangisagana iti lubong para iti umuna a yaay ti Apo. Manipud iti dayta a tribu, naawagan ni Maria nga agbalin nga ina ti Anak ti Dios.
Ti tribu ni Jose, babaen kadagiti annakna ken ni Asenat, da Efraim ken Manases (kitaen iti Genesis 41:50–52; 46:20), ket naikkan iti pagrebbengan a mangidaulo iti panaguummong ti Israel, a mangisagana iti lubong para iti Maikadua a Yaay ti Apo.
Iti kasta a di agkupas a relasion a hesed , gagangay laeng a kayat ti Dios nga ummongen ti Israel. Isu ti Nailangitan nga Amatayo! Kayatna a mangngeg ti tunggal maysa kadagiti annakna—iti agsumbangir ti belo—ti mensahe ti naisubli nga ebanghelio ni Jesucristo.
Maysa a Dana ti Ayat
Ti dana ti katulagan ket maysa a dana ti ayat—dayta nakapapati a hesed, dayta naasi a panangaywan ken panangtulong iti tunggal maysa. Ti pannakarikna a ti ayat ket mangwayawaya ken makapabileg. Ti kadakkelan a rag-o a mapasaramto ket no mapnoka iti ayat para iti Dios ken para iti amin nga annakna.
Ti panagayat iti Dios nga ad-adda ngem iti asino man wenno ania man a banag ket ti kasasaad a mangyeg iti pudno a talna, liwliwa, panagtalek, ken rag-o.
Ti dana ti katulagan ket maipapan amin iti relasiontayo iti Dios—ti relasiontayo a hesed Kenkuana. No sumrektayo iti katulagan iti Dios, nakitulagtayo a kanayon Kenkuana a mangtungpal iti saona. Aramidennanto ti amin a kabaelanna, a saan a dina ikankano ti kinawayatayo nga agpili, tapno matulongannatayo a mangtungpal iti katulagantayo.
Mangrugi ken maigibus ti Libro ni Mormon iti panangtukoy iti daytoy agnanayon a katulagan. Manipud iti panid ti paulona agingga kadagiti pangserra a pammaneknek da Mormon ken Moroni, ti Libro ni Mormon ket mangtukoy iti katulagan (kitaen iti Mormon 5:20; 9:37). “Ti idadateng ti Libro ni Mormon ti pagilasinan iti sibubukel a lubong a rinugianen ti Apo ti mangummong iti Israel ken mangtungpal kadagiti katulagan nga inaramidna kada Abraham, Isaac, ken Jacob.”12
Patpatgek a kakabsatko, naawagantayo iti daytoy napateg a panawen iti pakasaritaan ti daga a mangisuro iti lubong maipapan iti kinapintas ken bileg ti agnanayon a katulagan. Agtalek kadatayo ti Nailangitan nga Amatayo a naipasimudaag nga aramidentayo daytoy naindaklan nga aramid.
Naited pay daytoy a mensahe iti miting iti panangidaulo iti sapasap a komperensia idi Marso 31, 2022.
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, October 2022. Ilokano. 18317 864