“Ang Wala Katubtuban nga Kasugtanan,” Liahona, Okt. 2022.
Bulanan nga Mensahe sa Liahona, Oktubre 2022
Ang Wala Katubtuban nga Kasugtanan
Ang tanan nga naghimo sang kasugtanan upod sa Dios makabaton sang espesyal nga gugma kag kaluoy.
The Lord Jesus Christ [Ang Ginuong Jesucristo], ni Del Parson
Sa sining kalibutan nga nahalitan kag ginatunga sang mga giyera kag hinuring-huring parte sa mga giyera, ang kakinahanglan sang kamatuoran, kasanag, kag puro nga gugma ni Jesucristo mas dako pa gid. Ang ebanghelyo ni Cristo mahimayaon, kag ginbugayan kita nga matun-an naton ini kag magpangabuhi suno sa mga pagsulundan sini. Nagakalipay kita sa aton mga oportunidad para ipaambit ini—sa pagpamatuod parte sa mga kamatuoran sini kon diin man kita.
Pirme ako nagahambal parte sa importansya sang kasugtanan ni Abraham kag sang pagtipon sang Israel. Kon batunon naton ang ebanghelyo kag mabunyagan, ginadala naton sa aton mga kaugalingon ang sagrado nga ngalan ni Jesucristo. Ang bunyag amo ang pwertahan nga nagapadulong sa ululupod nga pagkamanunubli sang tanan nga promisa nga ginhatag sadto sang Ginuo kay Abraham, Isaac, Jacob, kag sa ila kaliwatan.1
“Ang bag-o kag wala katubtuban nga kasugtanan”2 (Doktrina kag mga Kasugtanan 132:6) kag ang kasugtanan ni Abraham palareho—duha ka paagi sang paglarawan sang kasugtanan nga ginhimo sang Dios upod sa mortal nga mga lalaki kag mga babayi sa lainlain nga panahon.
Ang paglaragway nga wala katubtuban nagakahulugan nga ang ining kasugtanan ara na antes pa mapasad ang kalibutan! Ang plano nga ginplastar sa Dako nga Konseho sa Langit nagalakip sang masubo nga kamatuoran nga kita tanan mahilayo sa presensya sang Dios. Pero, nagpromisa ang Dios nga magahatag Sia sang Manluluwas nga magadaog sang mga konsikwensya sang Pagkahulog. Siling sang Dios kay Adan pagkatapos sang iya bunyag:
“Kag ikaw miyembro suno sa paagi niya nga wala sing ginsuguran sang mga adlaw ukon katapusan sang mga tinuig, halin sa bug-os nga wala’y katapusan tubtob sa bug-os nga wala’y katapusan.
“Tan-awa, nagaisa ka sa akon, anak ka sang Dios; kag sa amo, ang tanan mahimo mangin akon mga anak” (Moises 6:67–68).
Ginbaton nanday Adan kag Eva ang ordinansa sang bunyag kag ginsugdan ang proseso nga mangin isa upod sa Dios. Nagsulod sila sa dalan sang kasugtanan.
Kon ikaw kag ako nagasulod sa sinang dalanon, may bag-o kita nga pamaagi sa kabuhi. Gani nagahimo kita sang relasyon upod sa Dios nga nagatugot sa Iya nga bugayan kag bag-uhon kita. Ang dalan sang kasugtanan nagagiya sa aton pabalik sa Iya. Kon tugotan naton ang Dios nga magpangibabaw sa aton mga kabuhi, inang kasugtanan magadala sa aton palapit kag mas palapit pa gid sa Iya. Ang tanan nga mga kasugtanan gintuyo nga mangin permanente. Nagapahamtang ini sang mga kaangtanan nga wala katapusan.
Espesyal nga Gugma kag Kaluoy
Sa tion nga maghimo kita sang kasugtanan kaupod sa Dios, ginabayaan naton ang pagka-neutral sa katubtuban. Indi pagtalikdan sang Dios ang Iya relasyon sa mga naghimo sining kaangtanan upod sa Iya. Ang matuod, ang tanan nga naghimo sang kasugtanan upod sa Dios makabaton sang espesyal nga gugma kag kaluoy. Sa Hebreo nga lenggwahe, ina nga gugma sa kasugtanan ginatawag nga hesed (חֶסֶד).3
Ang hesed wala sang eksakto gid nga tinaga sa Ingles. Siguro binudlayan ang mga naglubad sang King James Version sang Biblia kon paano badbaron ang hesed sa Ingles. Masami nila nga ginapili ang “makatilingala nga gugma.” Nakuha sini ang kalabanan pero indi ang tanan nga kahulugan sang hesed. May iban nga mga paglubad nga ginhatag, pareho sang “kaluoy” kag “kaayo.” Ang hesed pinasahi nga termino nga nagalaragway sang relasyon sa kasugtanan kon sa diin ang magtimbang nga bahin mainunungon kag tampad sa kada isa.
Ang selestiyal nga pag-asawahay amo sina nga kaangtanan sa kasugtanan. Ang bana kag asawa nagapakighisugot upod sa Dios kag sa kada isa nga mangin mainunungon kag tampad sa isa kag isa.
Ang hesed isa ka espesyal nga gugma kag kaluoy nga nabatyagan sang Dios para sa kag ginapalab-ot sa ila nga mga naghimo sang kasugtanan upod sa Iya. Kag ginabalusan naton sang hesed para sa Iya.
Sa tion nga ikaw kag ako naghimo sang kasugtanan upod sa Dios, ang aton relasyon upod sa Iya mangin mas malapit sangsa antes sang aton kasugtanan. Karon nahigot na kita sa isa kag isa.
Litrato iya ni Jerry L. Garns
Tungod ang Dios may hesed sa mga nakighisugot upod sa Iya, palanggaon Niya sila. Padayon Sia nga magatrabaho upod sa ila kag hatagan sila sang mga oportunidad sa pagbag-o. Pagapatawaron Niya sila kon maghinulsol sila. Kag kon magtalang sila, buligan Niya sila nga makabalik sa ila alagyan pabalik sa Iya.
Sa tion nga ikaw kag ako maghimo sang kasugtanan upod sa Dios, ang aton relasyon upod sa Iya mangin mas malapit sangsa antes sang aton kasugtanan. Karon nahigot na kita sa isa kag isa. Tungod sang aton kasugtanan upod sa Dios, indi Sia magkataka sa Iya pagpaninguha nga buligan kita, kag indi naton maubos ang Iya maluluy-on nga pasensya para sa aton. Ang kada isa sa aton may espesyal nga lugar sa tagipusuon sang Dios. Dako ang Iya ginapaabot para sa aton.
Nahibal-an ninyo ang makasaysayan nga deklarasyon nga ginhatag sang Ginuo kay Propetang Joseph Smith. Nag-abot ini paagi sa rebelasyon. Ang Ginuo nagsiling kay Joseph, “Ining promisa inyo man bangod halin kamo kay Abraham, kag ginhimo ang promisa kay Abraham” (Doktrina kag mga Kasugtanan 132:31).
Gani, ining wala katubtuban nga kasugtanan ginpanumbalik bilang kabahin sang dako nga Pagpanumbalik sang ebanghelyo sa kabug-osan sini. Hunahunaa ina! Ang kasugtanan sang pag-asawahay nga ginhimo sa templo direkta nga naangot sa sinang kasugtanan kay Abraham. Sa templo ang mag-asawa ginapakilala sa tanan nga mga bugay nga ginreserba para sa tampad nga kaliwatan ni Abraham, Isaac, kag Jacob.
Pareho kay Adan, ikaw kag ako personal nga nagsulod sa dalan sang kasugtanan sa tion sang bunyag. Dayon mas lubos kita nga nagasulod sa sini sa templo. Ang mga bugay sang kasugtanan kay Abraham ginahatag sa balaan nga mga templo. Ining mga bugay nagatugot sa aton, sa tion sang pagkabanhaw, nga “[magpanubli] sang mga trono, mga ginharian, [mga gahum], mga pamunoan, [kag] mga ginsakpan, sa aton ‘pang-kahitaasan kag himaya sa tanan nga butang’ [Doktrina kag mga Kasugtanan 132:19].”4
Sa panghingapos nga teksyo sang Daan nga Katipan, mabasa naton ang promisa ni Malaquias nga si Elias “[magaliso sang] tagipusuon sang mga ginikanan sa mga anak, kag sang tagipusuon sang mga anak sa ila ginikanan” (Malaquias 4:6). Sa dumaan nga Israel, ang kasubong nga pagtumod sa mga amay dapat kuntani magalakip kanday tatay Abraham, Isaac, kag Jacob. Ginklaro ining promisa kon basahon naton ang lain nga bersyon sining bersikulo nga ginsambit ni Moroni kay Propetang Joseph Smith: “Itanom niya [Elias] sa mga tagipusuon sang mga anak ang mga promisa nga ginhimo sa mga amay, kag ang mga tagipusuon sang mga anak magaliso sa ila mga amay” (Joseph Smith—Kasaysayan 1:39). Atong mga amay sigurado nga nagalakip kanday Abraham, Isaac, kag Jacob. (Tan-awa sa Doktrina kag mga Kasugtanan 27:9–10.)
Atong mga naghimo sang sagrado nga mga kasugtanan kag nagatuman sang mga ini ginapromisahan sang kabuhi nga wala katapusan kag pangkahitaasan. Si Jesucristo amo ang tagpasalig sinang mga kasugtanan.
Detalye halin sa Christ and the Rich Young Ruler [Si Cristo kag ang Manggaranon nga Manugdumala nga Pamatan-on], ni Heinrich Hofmann
Si Jesucristo: Ang Sentro sang Kasugtanan
Ang nagabayad-sala nga sakripisyo sang Manluluwas nagatugot sa Amay nga tumanon ang mga promisa nga Iya ginhimo sa Iya mga anak. Bangud si Jesucristo amo “ang dalan, kag ang kamatuoran”, nagakahulugan ini nga “wala’y nagaabot sa Amay, kundi paagi sa [Iya]” (Juan 14:6). Ang katumanan sang kasugtanan kay Abraham matigayon tungod sa Pagbayad-Sala sang aton Manluluwas, ang Ginuong Jesucristo. Si Jesucristo amo ang sentro sang kasugtanan kay Abraham.
Ang Daan nga Katipan indi lamang balaan nga kasulatan; libro man ini sang kasaysayan. Madumduman ninyo ang pagbasa parte sa pag-asawahay ni Sarai kag Abram. Tungod wala sila sang bata, ginhatag ni Sarai ang iya bulig nga si Hagar, para mangin asawa man ni Abram, suno sa direksyon sang Ginuo. Nagbata si Hagar kay Ismael.5 Palangga ni Abram si Ismael, pero indi sia ang anak kon sa diin magaagi ang kasugtanan. (Tan-awa sa Genesis 11:29–30; 16:1, 3, 11; Doktrina kag mga Kasugtanan 132:34.)
Bilang bugay sang Dios, kag bilang sabat sa pagtuo ni Sarai,6 nagbusong sia sa iya katigulangon para nga ang kasugtanan magaagi sa iya anak nga si Isaac (tan-awa sa Genesis 17:19). Natawo sia sa sulod sang kasugtanan.
Ginhatagan sang Dios sanday Sarai kag Abram sang bag-o nga mga ngalan—Sara kag Abraham (tan-awa sa Genesis 17:5, 15). Ang paghatag sinang bago nga mga ngalan tanda sang pagsugod sang bag-o nga kabuhi kag bag-o nga kapalaran para sa sining pamilya.
Pareho nga palangga ni Abraham si Ismael kag Isaac. Siling sang Dios kay Abraham nga si Ismael pagapadamuon kag mangin isa ka dako nga nasyon (tan-awa sa Genesis 17:20). Sa amo man nga tion, ginklaro sang Dios nga ang wala katubtuban nga kasugtanan igapasad paagi kay Isaac (tan-awa sa Genesis 17:19).
Ang tanan nga magabaton sang ebanghelyo mangin kabahin sang kaliwatan ni Abraham. Sa Mga Taga-Galacia mabasa naton:
“Kay ang [kadamuon] sa inyo nga [ginbunyagan] kay Cristo nagsuklob kay Cristo.
“… Kamo tanan isa kay Cristo Jesus.
“Kag kon kamo iya ni Cristo, niyan kaliwat kamo ni Abraham, mga manunubli suno sa saad” (Mga Taga-Galacia 3:27–29).
Gani, sarang kita nga mangin manunubli sang kasugtanan paagi sa pagkatawo ukon sa pag-adoptar.
Sa tion nga maghimo kita sang kasugtanan kaupod sa Dios, ginabayaan naton ang pagka-neutral sa katubtuban. Indi pagtalikdan sang Dios ang Iya relasyon sa mga naghimo sining kaangtanan upod sa Iya.
Si Isaac kag ang bata ni Rebeka nga si Jacob natawo sa sulod sang kasugtanan. Dugang pa, kabubut-on niya nga ginpili nga magsulod [sa kasugtanan]. Sa nahibal-an na ninyo, ang ngalan ni Jacob gin-islan sang Israel (tan-awa sa Genesis 32:28), nga ang buot silingon “tugoti ang Dios nga magpangibabaw” ukon “ang isa nga nagpangibabaw upod sa Dios.”7
Sa Exodo mabasa naton nga “nadumduman sang Dios ang iya kasugtanan kay Abraham, kay Isaac kag kay Jacob” (Exodo 2:24). Siling sang Dios sa mga anak sang Israel, “Kon magtuman kamo sa akon kag maghimo sang akon kasugtanan, mangin [pinasahi nga manggad] ko kamo” (Exodo 19:5).
Ang dinalan nga “pinasahi nga manggad” ginlubad halin sa Hebreo segullah, nga buot silingon gin-aliali nga pagkabutang—isa ka “manggad.”8
Ang libro nga Deuteronomio nagasaysay sang importansya sang kasugtanan. Ang mga apostoles sa Bag-ong Katipan nakahibalo parte sining kasugtanan. Matapos nga ginpaayo ni Pedro ang tawo nga lupog sa hagdanan sang templo, gintudloan niya ang mga nagatan-aw parte kay Jesus. Siling ni Pedro, “Ang Dios ni Abraham, ni Isaac kag ni Jacob, ang Dios sang aton mga katigulangan nagpasidungog sa iya [Anak] nga si Jesus” (Mga Binuhatan 3:13).
Gintakop ni Pedro ang iya mensahe paagi sa pagsiling sa iya mga tumalambong, “Kamo amo ang mga anak sang mga [propeta], kag sang [kasugtanan] nga ginhimo sang Dios sa inyo mga ginikanan, nga nagasiling kay Abraham, ‘Kag sa imo kaliwat pakamaayuhon ang tanan nga panimalay sa duta” (Mga Binuhatan 3:25). Gin-athag ni Pedro sa ila nga parte sang misyon ni Cristo amo ang pagtuman sang kasugtanan sang Dios.
Ang Ginuo naghatag sang pareho nga wali sa katawhan sang dumaan nga Amerika. Didto, ginsugid sang nabanhaw nga Cristo kon sin-o gid sila. Siling niya:
“Mga anak kamo sang mga [propeta]; kag iya kamo sang panimalay sang Israel; kag nalakip kamo sang kasugtanan nga ginhimo sang Amay upod sa inyo mga katigulangan, nga nagasiling kay Abraham: Kag sa imo kaliwat ang tanan nga mga kaliwatan sang duta pagapakamaayuhon.
“Ang Amay nga nagbangon sa akon sa inyo sing una, kag nagpadala sa akon sa pagpakamaayo sa inyo sa pagliso sang tagsa-tagsa sa inyo gikan sa [inyo] mga kalautan; kag ini sanglit mga anak kamo sang kasugtanan” (3 Nefi 20:25–26).
Nakita bala ninyo ang buot silingon sini? Atong mga nagatuman sang ila mga kasugtanan upod sa Dios mangin sahi sang mga kalag nga makabato-sa-sala! Atong mga nagatuman sang ila mga kasugtanan makaangkon sang kusog para mapakigbatuan ang unay nga impluwensya sang kalibutan.
Atong mga nagatuman sang ila mga kasugtanan upod sa Dios mangin sahi sang mga kalag nga makabato-sa-sala! Atong mga nagatuman sang ila mga kasugtanan makaangkon sang kusog para mapakigbatuan ang unay nga impluwensya sang kalibutan.
Pang-misyonaryo nga Buluhaton: Pagpaambit sang Kasugtanan
Ang Ginuo nagsugo nga ipalapta naton ang ebanghelyo kag ipaambit ang kasugtanan. Amo ina nga may mga misyonero kita. Gusto Niya nga ang tagsa Niya ka kabataan makaangkon sang oportunidad nga pilion ang ebanghelyo sang Manluluwas kag maglakat sa dalan sang kasugtanan. Gusto sang Dios nga iangot ang tanan nga katawhan sa kasugtanan nga Iya sadto ginhimo upod kay Abraham.
Gani ang pang-misyonaryo nga buluhaton isa ka kinahanglanon nga bahin sang dako nga pagtipon sang Israel. Ang ina nga pagtipon ang pinakaimportante nga butang nga nagakatabo sa kalibutan sa karon nga panahon. Wala na sang mapaanggid sa kadakuon sini. Wala na sang mapaanggid sa importansya sini. Ang mga misyonero sang Ginuo—ang Iya mga disipulo—nagahikot sa pinakadako nga hangkat, sa pinakadako nga kawsa, sa pinakadako nga buluhaton sa duta sa karon.
Pero may dugang pa diri—nga mas dako pa gid. May dako nga kakinahanglan nga ipalapta ang ebanghelyo sa mga tawo sa pihak nga kinabuhi. Gusto sang Dios nga ang tanan, sa magtimbang nga bahin sang belo, makabaton sang mga bugay sang Iya kasugtanan. Ang dalan sang kasugtanan bukas para sa tanan. Ginapangabay namon sa tanan nga maglakat sa sinang dalan upod sa amon. Wala na sang iban pa nga buluhaton nga nagasakop sang tanan. Kay “ang Ginuo maluluy-on sa tanan nga, sa kabunayag sang ila mga tagipusuon, magapanawag sa iya balaan nga ngalan” (Helaman 3:27).
Tungod ginpanumbalik ang Melchizedek Priesthood, ang mga babayi kag lalaki nga nagatuman sang kasugtanan makabaton sang “tanan nga espirituhanon nga mga bugay” sang ebanghelyo (Doktrina kag mga Kasugtanan 107:18; emphasis gindugang).
Sa pagdedikar sang Templo sang Kirtland sang 1836 sa idalom sang direksyon sang Ginuo, nagpakita si Elias (Elijah). Ang iya tuyo? “Agud lisuon … ang mga anak sa mga amay” (Doktrina kag mga Kasugtanan 110:15). Nagpakita man si Elias. Ang iya tuyo? Para [itugyan] ang dispensasyon sang ebanghelyo ni Abraham nga nagasiling: Paagi sa amon kag sa amon kaliwat pagapakamaayohon ang tanan nga henerasyon nga magasunod pa sa amon” (Doktrina kag mga Kasugtanan 110:12). Gani, ang Agalon naghatag kanday Joseph Smith kag Oliver Cowdery sang awtoridad sa priesthood kag sang kinamatarong sa pagpaalinton sang pinasahi nga mga bugay sang kasugtanan kay Abraham sa iban.9
Sa Simbahan, nagapanglakaton kita sa dalan sang kasugtanan nga kita lang kag bilang kabilugan. Kon sa pag-asawahay kag mga pamilya may pinasahi nga gapalapad nga kaangtanan nga nagatuga sang espesyal nga pagpalangga, amo man sa bag-o nga kaangtanan nga matuga kon ibugkos naton ang aton mga kaugalingon paagi sa kasugtanan paibabaw sa aton Dios!
Mahimo nga amo ini ang buot silingon ni Nefi sang magsiling sia nga ang Dios “nagahigugma sa ila nga nagabaton sa Iya nga mangin ila Dios” (1 Nefi 17:40). Amo gid ini kon ngaa, bilang bahin sang kasugtanan, ang espesyal nga kaluoy kag gugma—ukon hesed—mabaton sang tanan nga nagasulod sa sining permanente kag suod nga kaangtanan upod sa Dios, bisan “tubtob sa linibo nga mga kaliwatan” (Deuteronomio 7:9).
Ang paghimo sang kasugtanan upod sa Dios nagaliwat sang aton relasyon upod sa Iya sa katubtuban. Ginabugayan kita sini sang dugang nga gugma kag kaluoy.10 May epekto ini sa kon sin-o kita karon kag kon paano kita buligan sang Dios nga mangin sin-o kita sa palaabuton. Ginapromisahan kita nga, kita man, sarang nga mangin “pinasahi nga manggad” para sa Iya (Salmo 135:4).
Mga Promisa kag mga Pribelihiyo
Atong mga naghimo sang sagrado nga mga kasugtanan kag nagatuman sini ginapromisahan sang kabuhi nga wala katapusan kag pangkahitaasan, “ang pinakadako sa tanan nga bugay sang Dios” (Doktrina kag mga Kasugtanan 14:7). Si Jesucristo amo ang tagpasalig sinang mga kasugtanan (tan-awa sa Mga Hebreo 7:22; 8:6). Ang mga nagatuman sang kasugtanan nga nagapalangga sa Dios kag nagatugot sa Iya nga magpangibabaw sa tanan nga iban pa nga mga butang sa ila mga kabuhi nagahimo sa Iya nga pinakamabaskog nga impluwensya sa ila mga kabuhi.
Sa aton nga panahon may pribelihiyo kita sa pagbaton sang mga bugay sang patriarka kag sa paghibalo sang aton koneksyon sa dumaan nga mga patriarka. Ina nga mga bugay nagahatag man sang panan-awon kon ano ang nagahulat sa aton.
Tungod sang aton kasugtanan upod sa Dios, indi Sia magkataka sa Iya pagpaninguha nga buligan kita, kag indi naton maubos ang Iya maluluy-on nga pasensya para sa aton.
Lovest Thou Me More Than These [Ginahigugma Mo Bala Ako Sing Labi Pa Sini sa Ila]? ni David Lindsley
Ang aton hilikuton bilang Israel sang kasugtanan amo nga siguruhon nga ang tagsa ka miyembro sang Simbahan makarealisar sang kalipay kag mga pribelihiyo nga kaupod sang paghimo sang kasugtanan sa Dios. Isa ini ka panawagan nga paisugon ang tagsa ka nagatuman-sang-kasugtanan nga lalaki kag babayi, bata nga lalaki kag bata nga babayi, sa pagpaambit sang ebanghelyo sa ila nga ara sa sulod sang ila impluwensya. Isa man ini ka panawagan nga suportahan kag paisugon ang aton mga misyonero, nga ginpadala nga may panulin nga magbunyag kag magbulig sa pagtipon sang Israel, para ululupod kita nga mangin katawhan sang Dios kag Sia mangin aton Dios (tan-awa sa Doktrina kag mga Kasugtanan 42:9).
Ang tagsa ka lalaki kag tagsa ka babayi nga nagapartisipar sa mga ordinansa sang priesthood kag nagahimo kag nagatipig sang mga kasugtanan upod sa Dios may direkta nga pagpakig-angot sa gahum sang Dios. Ginadala naton ang ngalan sang Ginuo sa aton kaugalingon bilang mga indibidwal. Ginadala man naton ang Iya ngalan bilang katawhan. Ang katutom sa paggamit sang husto nga ngalan sang Ang Simbahan ni Jesucristo sang mga Santos sa Ulihing mga Adlaw isa ka importante nga paagi nga ginadala naton bilang katawhan ang Iya ngalan. Matuod gid, ang tagsa ka maayo nga binuhatan sang Ang Simbahan ni Jesucristo sang mga Santos sa Ulihing mga Adlaw kag sang mga miyembro sini isa ka pagpakita sang hesed sang Ginuo.
Ngaa ginlapta ang Israel? Tungod ginlapas sang katawhan ang mga kasuguan kag ginbato ang mga propeta. Ang mapinalanggaon pero nagakalisod nga Amay nagsabat paagi sa paglapta sang Israel sa bilog nga kalibutan.11
Ugaling, ginlapta Niya sila upod ang promisa nga sa pila ka adlaw ang Israel pagatipunon liwat pabalik sa Iya sabak.
Ang tribo ni Juda ginhatagan sang responsibilidad sa paghanda sang kalibutan para sa una nga pagkari sang Ginuo. Halin sa sina nga tribo, gintawag si Maria para mangin iloy sang Anak sang Dios.
Ang tribo ni Jose, paagi sa mga anak niya kag ni Asenat nga sanday Efraim kag Manases (tan-awa sa Genesis 41:50–52; 46:20), ginhatagan sang responsibilidad sa pagpanguna sa pagtipon sang Israel, sa paghanda sang kalibutan para sa Ikaduha nga Pagkari sang Ginuo.
Sa sining wala paglubad nga hesed nga kaangtanan, natural lamang nga gusto sang Dios nga tipunon ang Israel. Sia ang aton Amay nga Langitnon! Gusto Niya nga ang tagsa Niya ka anak—sa magtimbang nga parte sang kabuhi—makabati sang mensahe sang ginpanumbalik nga ebanghelyo ni Jesucristo.
Ang Banas sang Gugma
Ang dalan sang kasugtanan isa ka banas sang gugma—inang indi matupungan nga hesed, inang maluluy-ong nga pag-ulikid kag paglab-ot sa kada isa. Ang pagbatyag sinang gugma makaulumpaw kag makainspirar. Ang pinakadako nga kalipay nga inyo maeksperiyensyahan amo ang kon kamo mapuno sang gugma para sa Dios kag para sa tanan Niya nga kabataan.
Ang pagpalangga sa Dios nga labaw pa sa kon kay sin-o ukon sa ano nga butang amo ang kondisyon nga nagadala sang tunay nga kalinong, kaumpawan, pagsalig, kag kalipay.
Ang dalan sang kasugtanan nagakahulugan sang relasyon upod sa Dios—ang aton hesed nga kaangtanan upod sa Iya. Kon magsulod kita sa kasugtanan upod sa Dios, nagapakighisugot kita sa Iya nga nagatuman pirme sang Iya ginahambal. Himuon Niya ang tanan Niya nga masarangan, nga wala nagalaksam sang aton kahilwayan sa pagpili, para buligan kita nga tumanon ang aton ginpromisa.
Ang Libro ni Mormon nagasugod kag nagatapos nga nagatumod sa sining wala katubtuban nga kasugtanan. Halin sa tig-ulo nga pahina sini pakadto sa panghingapos nga mga testimonya nanday Mormon kag Moroni, ang Libro ni Mormon nagatumod sang kasugtanan (tan-awa sa Mormon 5:20; 9:37). “Ang paggwa sang Libro ni Mormon isa ka timaan sa bilog nga kalibutan nga ang Ginuo nagsugod na sa pagpanipon sang Israel kag pagtuman sang mga kasugtanan nga Iya ginhimo kanday Abraham, Isaac, kag Jacob”12
Pinalangga kong mga kauturan, gintawag kita sa sining kritikal nga tion sa kasaysayan sang duta para tudloan ang kalibutan nahanungod sa katahum kag gahum sang wala katubtuban nga kasugtanan. Ang aton Amay nga Langitnon nagasalig sa aton sing lubos nga himuon ining dako nga buluhaton.
Ining mensahe ginhatag man sa miting sang mga lider sa pangkabilogan nga komperensya sang Marso 31, 2022.
© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, October 2022. Hiligaynon. 18317 861