“Ngaa Nagabayad Kita sang Ika-pulo,” Liahona, Dis. 2022.
Bulanan nga Mensahe sa Liahona, Disyembre 2022
Ngaa Nagabayad Kita sang Ika-pulo
Ang mga miyembro sang Ang Simbahan ni Jesucristo sang mga Santos sa Ulihing mga Adlaw nagahatag sang ika-napulo nga bahin sang ila kita sa Simbahan. Ginatawag ini nga ika-pulo. Ang kwarta ginagamit sa pagpatuman sang buluhaton sang Simbahan sa bilog nga kalibutan.
Ano ang Ika-pulo?
Isa sang mga kasugoan sang Dios amo ang pagbayad sang ika-pulo, nga amo ang ika-napulo nga bahin sang aton kita, sa Iya Simbahan. Kon magbayad kita sang ika-pulo, ginapakita naton ang aton pagpasalamat sa Dios para sa aton mga bugay. Ginapakita naton nga nagasalig kita sa Ginuo kag handa kita nga tumanon Sia sa tanan nga butang.
Melquisedec—Keeper of the Storehouse [Melquisedec—Tag-amlig sang Balay-talaguan], ni Clark Kelley Price
Mga Panudlo sa Daan nga Katipan
Ang katawhan sang Dios nagbayad sang ika-pulo halin pa sa panahon sang Daan nga Katipan. Halimbawa, si Abraham nagbayad sang ika-pulo (tan-awa sa Genesis 14:18–20). Ang layi sang ika-pulo gintudlo man sang dumaan nga mga propeta, lakip na ni Moises kag Malaquias (tan-awa sa Levitico 27:30–34; Nehemias 10:35–37; Malaquias 3:10).
Ang Pagpanumbalik sang Layi sang Ika-pulo
Sang 1838, ang Propetang si Joseph Smith nagpamangkot sa Ginuo kon paano ang mga miyembro sang Simbahan magbayad sang ika-pulo. Ang sabat sang Ginuo nasulat sa Doktrina kag mga Kasugtanan 119, nga nagasiling nga ang mga miyembro dapat maghatag sang ika-napulo nga bahin sang ila ganansya sa Simbahan (tan-awa sa bersikulo 4). Ang mga lider sang Simbahan nagatudlo nga ang “ganansya” nagakahulugan sang kita.
Litrato ni Jamie Dale Johnson
Paano Magbayad sang Ika-pulo
Mahimo kita magbayad sang ika-pulo paagi sa pagkumpleto sang online donation form nga makita sa donations.ChurchofJesusChrist.org. Ukon mahimo kita magsulat sa pormas nga papel kag ihatag ang kwarta sa miyembro sang bishopric ukon pangulohan sang branch. Ang tanan nga kwarta ginapadala sa Church headquarters, sa diin mapinangamuyuon nga ginadesisyonan sang mga lider sang Simbahan (Unang Pangulohan, Korum sang Dose ka Apostoles, kag Nagapangulo nga Bishopric) kon paano ini gamiton.
Mga Bugay
Ang Ginuo nagpromisa nga ang mga nagabayad sang ika-pulo pagabugayan sa temporal kag sa espiritwal. Ang ika-pulo nagabugay man sa tanan nga mga anak sang Dios sang oportunidad nga magtuon parte sa Iya kag magtubo sa ebanghelyo.
Paano ang mga Pundo sang Ika-pulo Ginagamit
Ang kwarta sa ika-pulo ginagamit sa pagpauswag sang Simbahan sang Ginuo sa bilog nga kalibutan. Nagalakip ini sang pagpatindog sang mga templo kag iban pa nga mga istruktura sang Simbahan, pag-imprinta sang balaan nga mga kasulatan kag iban pa nga materyales, pagpundo sa mga eskwelahan sang Simbahan, kag pagbulig sa family history kag pangmisyonaryo nga mga buluhaton.
Tithing Declaration [Pagdeklarar sang Pagbayad sang Ika-pulo]
Kaisa sa tagsa ka tuig, ang mga miyembro sang Simbahan nagapakigkita sa ila bishop (ukon branch president) agud ipahayag sa iya kon bala nagabayad sila sing bug-os nga ika-pulo.
Ano ang Ginabayaran sang Ika-pulo
Litrato sang Templo sang Oakland California ni Longin Lonczyna Jr.
© 2022 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, December 2022. Hiligaynon. 18318 861