“Why We Pay Tithing,” Liahona, Dec. 2022.
ຂ່າວສານປະຈຳເດືອນ Liahona, ເດືອນທັນວາ 2022
ເປັນຫຍັງເຮົາຈຶ່ງຈ່າຍເງິນສ່ວນສິບ
ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍມອບໜຶ່ງສ່ວນສິບຂອງລາຍຮັບຂອງເຂົາເຈົ້າໃຫ້ກັບສາດສະໜາຈັກ. ສິ່ງນີ້ຖືກເອີ້ນວ່າ ສ່ວນສິບ. ຈຳນວນເງິນດັ່ງກ່າວໄດ້ຖືກໃຊ້ເພື່ອດຳເນີນວຽກງານຂອງສາດສະໜາຈັກຕະຫລອດທົ່ວໂລກ.
ສ່ວນສິບແມ່ນຫຍັງ?
ພຣະບັນຍັດຂໍ້ໜຶ່ງຂອງພຣະເຈົ້າຄືການຈ່າຍເງິນສ່ວນສິບ, ຊຶ່ງແມ່ນໜຶ່ງສ່ວນສິບຂອງລາຍຮັບຂອງເຮົາ, ໃຫ້ກັບສາດສະໜາຈັກຂອງພຣະອົງ. ເມື່ອເຮົາຈ່າຍເງິນສ່ວນສິບ, ເຮົາສະແດງຄວາມກະຕັນຍູຂອງເຮົາຕໍ່ພຣະເຈົ້າສຳລັບພອນຕ່າງໆຂອງເຮົາ. ເຮົາສະແດງໃຫ້ເຫັນວ່າເຮົາໄວ້ວາງໃຈໃນພຣະຜູ້ເປັນເຈົ້າ ແລະ ວ່າເຮົາເຕັມໃຈທີ່ຈະເຊື່ອຟັງພຣະອົງໃນທຸກສິ່ງ.
Melchizedek—Keeper of the Storehouse [ເມນຄີເສເດັກ—ຜູ້ຮັກສາສາງເຄື່ອງ], ໂດຍ ຄະລາກ ແຄວລີ ພຣາຍສ໌
ຄຳສອນໃນພຣະຄຳພີເດີມ
ຜູ້ຄົນຂອງພຣະເຈົ້າໄດ້ຈ່າຍສ່ວນສິບຕັ້ງແຕ່ສະໃໝພັນທະສັນຍາເດີມ. ຍົກຕົວຢ່າງ, ອັບຣາຮາມໄດ້ຈ່າຍສ່ວນສິບ (ເບິ່ງ ປະຖົມມະການ 14:18–20). ກົດສ່ວນສິບຍັງໄດ້ຖືກສິດສອນໂດຍສາດສະດາໃນສະໃໝບູຮານ, ລວມທັງໂມເຊ ແລະ ມາລາກີ (ເບິ່ງ ລະບຽບພວກເລວີ 27:30–34; ເນເຫມີຢາ 10:35–37; ມາລາກີ 3:10).
ການຟື້ນຟູກົດສ່ວນສິບ
ໃນປີ 1838, ສາດສະດາໂຈເຊັບ ສະມິດ ໄດ້ທູນຖາມພຣະຜູ້ເປັນເຈົ້າເຖິງວິທີທີ່ສະມາຊິກຂອງສາດສະໜາຈັກຄວນຈ່າຍສ່ວນສິບແນວໃດ. ຄຳຕອບຂອງພຣະຜູ້ເປັນເຈົ້າໄດ້ຖືກບັນທຶກໄວ້ໃນ ຄຳສອນ ແລະ ພັນທະສັນຍາ 119, ຊຶ່ງໄດ້ກ່າວວ່າ ສະມາຊິກຄວນຈ່າຍໜຶ່ງສ່ວນສິບຂອງຜົນປະໂຫຍດທັງໝົດຂອງພວກເຂົາໃຫ້ກັບສາດສະໜາຈັກ (ເບິ່ງ ຂໍ້ທີ 4). ຜູ້ນຳຂອງສາດສະໜາຈັກໄດ້ສິດສອນວ່າ “ຜົນປະໂຫຍດ” ໝາຍເຖິງ ລາຍຮັບ.
ຮູບຖ່າຍ ໂດຍ ເຈມີ ແດວ ຈອນສັນ
ວິທີຈ່າຍເງິນສ່ວນສິບ
ເຮົາສາມາດຈ່າຍເງິນສ່ວນສິບໄດ້ໂດຍການປະກອບໃບຟອມການບໍລິຈາກທາງອອນລາຍທີ່ donations.ChurchofJesusChrist.org. ຫລື ເຮົາສາມາດປະກອບໃບຟອມ ແລະ ມອບເງິນໃຫ້ຄົນໜຶ່ງໃນຝ່າຍອະທິການ ຫລື ຝ່າຍປະທານສາຂາ. ເງິນທັງໝົດແມ່ນຖືກສົ່ງໃຫ້ສຳນັກງານໃຫຍ່ຂອງສາດສະໜາຈັກ, ບ່ອນທີ່ຜູ້ນຳຂອງສາດສະໜາຈັກ (ຝ່າຍປະທານສູງສຸດ, ກຸ່ມອັກຄະສາວົກສິບສອງ, ແລະ ຝ່າຍອະທິການຄວບຄຸມ) ຕັດສິນໃຈດ້ວຍການອະທິຖານວ່າຈະໃຊ້ມັນແນວໃດ.
ພອນຕ່າງໆ
ພຣະຜູ້ເປັນເຈົ້າໄດ້ສັນຍາວ່າ ຜູ້ທີ່ຈ່າຍເງິນສ່ວນສິບຈະໄດ້ຮັບພອນທາງໂລກ ແລະ ທາງວິນຍານ. ເງິນສ່ວນສິບຍັງຊ່ວຍເປັນພອນໃຫ້ກັບລູກໆຂອງພຣະເຈົ້າທຸກຄົນ ດ້ວຍໂອກາດທີ່ຈະຮຽນຮູ້ເຖິງພຣະອົງ ແລະ ເຕີບໂຕໃນພຣະກິດຕິຄຸນ.
ວິທີທີ່ເງິນສ່ວນສິບຖືກນຳໃຊ້
ເງິນສ່ວນສິບແມ່ນໄດ້ຖືກໃຊ້ໃນການສ້າງສາສາດສະໜາຈັກຂອງພຣະຜູ້ເປັນເຈົ້າໃນທົ່ວໂລກ. ໃນນີ້ລວມທັງການສ້າງພຣະວິຫານ ແລະ ໂຄງສ້າງອື່ນໆຂອງສາດສະໜາຈັກ, ການພິມປຶ້ມພຣະຄຳພີ ແລະ ອຸປະກອນຕ່າງໆ, ໃຫ້ທຶນແກ່ໂຮງຮຽນຕ່າງໆຂອງສາດສະໜາຈັກ, ແລະ ຊ່ວຍເຫລືອໃນວຽກງານສືບປະຫວັດຄອບຄົວ ແລະ ວຽກງານເຜີຍແຜ່.
ການແຈ້ງເງິນສ່ວນສິບ
ປີລະຄັ້ງທີ່, ສະມາຊິກຂອງສາດສະໜາຈັກພົບກັບອະທິການ (ຫລື ປະທານສາຂາ) ເພື່ອບອກກັບເພິ່ນວ່າເຂົາເຈົ້າໄດ້ຈ່າຍເງິນສ່ວນສິບເຕັມຫລືບໍ່.
ເງິນສ່ວນສິບໃຊ້ເພື່ອຫຍັງ
ຮູບຖ່າຍຂອງພຣະວິຫານໂອກແລນ ຄາລິຟໍເນຍ ໂດຍ ລອງງິນ ລອນຊີນາ ຜູ້ລູກ
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, December 2022. Laotian. 18318 331