« Te tumu tātou e ’aufau nei i te tuha’a ’ahuru », Liahona, Tītema 2022.
Parau poro’i tā’āva’e nō te Liahona, Tītema 2022
Te tumu tātou e ’aufau nei i te tuha’a ’ahuru
E hōro’a te mau melo o Te ’Ēkālesia a Iesu Mesia i te Feiā Mo’a i te mau Mahana Hope’a nei i te hō’ē i ni’a i te ’ahuru o tā rātou ’āpī i te ’Ēkālesia. E parauhia te reira te tuha’a ’ahuru. E fa’a’ohipahia te moni nō te rave i te ’ohipa a te ’Ēkālesia nā te ao ato’a nei.
E aha te tuha’a ’ahuru ?
Hō’ē o te mau fa’auera’a a te Atua, ’o te ’aufaura’a ïa i te tuha’a ’ahuru, hō’ē i ni’a i te ’ahuru o tā tātou ’āpī, i tāna ’Ēkālesia. ’Ia ’aufau ana’e tātou i te tuha’a ’ahuru, tē fa’a’ite ra ïa tātou i tō tātou māuruuru i te Atua nō tā tātou mau ha’amaita’ira’a. Tē fa’a’ite nei tātou ē, tē ti’aturi nei tātou i te Fatu ’e tē hina’aro nei tātou e ha’apa’o i te mau mea ato’a tāna e parau mai.
Melehizedeka—Te tīa’i nō te fare vaira’a, nā Clark Kelley Price
Ha’api’ira’a i roto i te Faufa’a Tahito
’Ua ’aufau te mau ta’ata o te Atua i te tuha’a ’ahuru mai te tau o te Faufa’a Tahito ra. ’Ei hi’ora’a, ’ua ’aufau ’o Aberahama i te tuha’a ’ahuru (hi’o Genese 14:18–20). ’Ua ha’api’i-ato’a-hia te ture nō te tuha’a ’ahuru e te mau peropheta i tahito ra, mai ia Mose ’e ’o Malaki (’a hi’o Levitiko 27:30–34 ; Nehemia 10:35–37 ; Malaki 3:10).
Te fa’aho’i-fa’ahou-ra’a mai i te ture nō te tuha’a ’ahuru
I te matahiti 1838, ’ua ani te peropheta ra ’o Iosepha Semita i te Fatu e nāhea te mau melo o te ’Ēkālesia ’ia ’aufau i te tuha’a ’ahuru. ’Ua pāpa’ihia te pāhonora’a a te Fatu i roto i Te Ha’api’ira’a Tumu ’e te mau Fafaura’a 119, tē parauhia nei ē, e hōro’a te mau melo hō’ē i ni’a i te ’ahurura’a nō te ’āpī o tā rātou faufa’a, i te ’Ēkālesia (hi’o īrava 4). ’Ua ha’api’i te feiā fa’atere o te ’Ēkālesia ē, te aura’a o teie parau « ’āpī » e mau ’āpī ïa o te faufa’a moni i noa’a mai ia rātou.
Hoho’a nā Jamie Dale Johnson
Nāhea i te ’aufau i te tuha’a ’ahuru
E nehenehe tātou e ’aufau i te tuha’a ’ahuru nā roto i te fa’a’īra’a i te ’api parau hōro’ara’a i ni’a donations.ChurchofJesusChrist.org. ’E ’aore rā e nehenehe tā tātou e fa’a’ī i te hō’ē ’api parau ’e ’ia hōro’a i te moni i te hō’ē melo o te ’episekōpora’a ’e ’aore rā i te peresidenira’a ’āma’a. E hāponohia te mau moni ato’a i te pū fa’atere o te ’Ēkālesia, i reira te feiā fa’atere o te ’Ēkālesia (te Peresidenira’a Mātāmua, te pupu nō te Tino ’Ahuru Ma Piti ’āpōsetolo, ’e te ’Episekōpora’a Fa’atere Rahi) e fa’aoti ai nā roto i te pure e aha tā rātou e fa’a’ohipa ai i te reira.
Ha’amaita’ira’a
’Ua fafau mai te Fatu ē, te feiā e ’aufau i te tuha’a ’ahuru, e ha’amaita’ihia rātou i te pae tino ’e i te pae vārua. E ha’amaita’i ato’a te tuha’a ’ahuru i te mau tamari’i ato’a a te Atua i te rāve’a nō te ha’api’i mai nō ni’a iāna ’e nō te tupu i te rahi i roto i te ’evanelia.
Te mea e fa’a’ohipahia nei te moni tuha’a ’ahuru
E fa’a’ohipahia te moni tuha’a ’ahuru nō te patu i te ’Ēkālesia a te Fatu nā te ao ato’a nei. ’Oia ho’i te patura’a i te mau hiero ’e te tahi atu ā mau fare a te ’Ēkālesia, te nene’ira’a i te mau papa’ira’a mo’a ’e te tahi atu ā mau mātēria, te ’aufaura’a i te mau fare ha’api’ira’a a te ’Ēkālesia, ’e te tauturura’a i te ’ohipa ’ā’amu ’utuāfare ’e te ’ohipa misiōnare.
Te fa’a’itera’a nō te tuha’a ’ahuru
Hō’ē taime i roto i te matahiti, e fārerei te mau melo o te ’Ēkālesia i tō rātou ’episekōpo (’e ’aore rā te peresideni ’āma’a) nō te fa’a’ite iāna ē, e feiā ’aufau ti’a ānei rātou i te tuha’a ’ahuru.
Te mea tā te tuha’a ’ahuru e ’aufau
Hōho’a nō te hiero nō Oakland (California, Marite) nā Longin Lonczyna Jr.
© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, December 2022. Tahitian. 18318 895