Molaetsa wa Liahona wa Kgwedi le kgwedi, Sedimonthole 2022

Ke eng Re Ntsha tsa Bolesome

Maloko a Kereke ya ga Jeso Keresete ya Baitshepi ba Malatsi a Bofelo ba neela bongwe mo lesomeng jwa tuelo ya bone go Kereke. Se se bidiwa tsa bolesome. Madi a dirisiwa go tsweledisa tiro ya Kereke go ralala lefatshe.

Tsa bolesome ke eng?

Nngwe ya ditaelo tsa Modimo ke go ntsha tsa bolesome, mo e leng bongwe mo lesomeng la tuelo ya rona, go Kereke ya Gagwe. Fa re ntsha tsa bolesome, re supa malebogo go Modimo a ditshegofatso tsa rona. Re supa gore re tshepa Morena le gore re rata go Mo obamela mo dilong tsotlhe.

Melekiseteke—Motlhokomedi wa Ntlo ya polokelo, ka Clark Kelley Price

Dithuto tsa Kgolagano e Kgologolo

Batho ba Modimo ba ntshitse tsa bolesome e sa le ka dinako tsa Kgolagano e Kgologolo. Sekai, Aberahame o ntshitse tsa bolesome (bona Genesise 14:18–20). Molao wa tsa bolesome o ne le gone wa rutwa ke baporofeti ba bogologolo, go akaretsa Moshe le Malaki (bona Lefitiko 27:30–34; Nehemia 10:35–37; Malaki 3:10).

Tsosoloso ya Molao wa tsa Bolesome

Ka 1838, Moporofeti Joseph Smith o ne a botsa Morena gore maloko a Kereke ba ka duela tsa bolesome jang. Karabo ya Morena e gatisitswe mo Dithuto le Dikgolagano 119, e e leng gore maloko a tshwanetse go neela bongwe mo lesomemg la dikoketso tsa bone go Kereke (bona temana 4). Baeteledipele ba Kereke ba rutile gore “koketso”e raya tuelo.

Setshwantsho ka Jamie Dale Johnson

Ka fa go Ntshiwang tsa Bolesome ka teng

Re ka ntsha tsa bolesome ka go tlatsa foromo ya mpho mo maranyaneng kwa donations.ChurchofJesusChrist.org. Kgotsa re ka tlatsa foromo ya pampiri mme ra neela madi go leloko la bobishopo kgotsa boporesidente jwa lekala. Madi otlhe a romelwa kwa ntlo kgolo ya Kereke, kwa baeteledipele ba Kereke (Boporesidente jwa Ntlha, Khoramo ya Baaposetole ba ba Lesome le Bobedi, le Bobishopo ba ba Okametseng) ba tsayang ditshwetso ka thapelo ka fa a ka dirisiwang ka teng.

Ditshegofatso

Morena o solofeditse gore bao ba ba ntshang tsa bolesome ba tlaa segofala ka lobaka lono fela le semowa. Tsa bolesome le gone di segofatsa bana botlhe ba Modimo ka monyetla wa go ithuta ka ga Gagwe le go gola mo efangeleng.

Ka fa Madi a Tsa bolesome a Dirisiwang ka teng

Madi a tsa bolesome a dirisiwa go aga Kereke ya Morena go ralala lefatshe lotlhe. Se se akaretsa go aga ditempele le dikago tse dingwe tsa Kereke, go gatisa dikwalo tse di boitshepo le didirisiwa tse dingwe, go duelela dikwele tsa Kereke, le go thusa ka ditso tsa lelwapa le tiro ya boanamisa efangele.

Kitsiso ya tsa bolesome

Gangwe mo ngwageng, Maloko a Kereke ba kopana le bishopo (kgotsa poresidente wa lekala) go mmolelela gore ke bantshi ba tsa bolesome ka botlalo.

Go tswa mo Dikwalong tse di boitshepo

Boporesidente jwa Ntlha, Khoramo ya Baaposetole ba ba Lesome le Bobedi, le Bobishopo ba ba Okametseng ba tsayang ditshwetso ka thapelo ka fa madi a tsa bolesome a ka dirisiwang ka teng (bona Dithuto le Dikgolagano 120).

Morena o solofeditse gore o tlaa bula “dikgoro tsa legodimo” fa re ntsha tsa bolesome tsa rona (bona Malaki 3:10).

Re tlaa bolokwa kwa Go tleng ga Bobedi ga Mmoloki fa re ntsha tsa bolesome (bona Dithuto le Dikgolagano 64:23).

Tsa Bolesome e Duelela Eng

Setshwantsho sa Oakland California Temple ka Longin Lonczyna Jr.

Batla Mo Gontsi

Fa o na le dipotso ka ga tsa bolesome, o ka bua le modiredi wa mokaulengwe kgotsa kgaitsadi, wate ya gago kgotsa baeteledipele ba lekala, kgotsa baanamisa efangele.

© 2022 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Liahona wa Kgwedi le kgwedi, Sedimonthole 2022. Setswana. 18318 763