Ang mga Pamilya Wala’y Katapusan

Ang pamilya amo ang tig-una nga yunit sang sosyedad kag sang Simbahan. Ang mga miyembro sang Ang Simbahan ni Jesucristo sang mga Santos sa Ulihing mga Adlaw nagapati nga ang mga pamilya sarang nga mangin wala katapusan. Ginapangabudlayan naton nga pabakuron ang aton mga pamilya sa duta. May pagtuo man kita nga mabaton naton ang bugay sang wala katapusan nga pamilya.

Ang Pamilya Iya sang Dios

Ang tanan nga tawo espiritu nga mga anak nga lalaki ukon babayi sang langitnon nga mga ginikanan. Tanan kita parte sang pamilya sang Dios. Tanan kita may diosnon nga kinaiya kag kadangatan. Kon magpangabuhi kita nga matarong, sarang kita makabalik agud magkabuhi upod sa aton Amay nga Langitnon bilang bahin sang Iya pamilya sa wala katubtuban.

Litrato sa kasal iya ni Joseph Kaluba

Wala Katapusan nga mga Pamilya

Kon ang lalaki kag babayi ginkasal sa templo kag ila ginatuman ang ila mga kasugtanan, ang ila kasal magadugay tubtob sa katubtuban. Ining ordinansa sa templo ginatawag nga pagselyo. Ang kabataan nga natawo pagkatapos nga naselyohan ang ila mga ginikanan natawo sa sina nga kasugtanan. Ang kabataan nga nagawo antes maselyohan ang ila mga ginikanan mahimo nga maselyohan sa ila sa templo para mangin pamilya sila sa katubtuban. Ang mga miyembro sang Simbahan nagahikot sang buluhaton sa family history kag templo para maselyo nila ang ila mga pamilya sing ululupod sa tanan nga mga henerasyon. Ang bugay sang wala katapusan nga pamilya nangin posible tungod kay Jesucristo kag sa Iya Pagbayad-Sala.

Pag-asawahay

Ang kasal sa tunga sang lalaki kag babayi gin-ordin sang Dios. Ang ebanghelyo ni Jesucristo nagatudlo sang mga bana kag mga asawa nga mangin tampad sa kada isa kag mangin matinuohon sa ila mga kasugtanan sa pag-asawahay. Dapat sila nga mangin tampad sa hunahuna, pulong, kag buhat. Ang pag-asawahay isa ka patas nga pag-updanay, kag ang mga mag-asawa dapat nga magpaisog, magpasulhay, kag magbuligay sa isa kag isa.

Mga Ginikanan kag Kabataan

Ginsugo sang Dios sanday Adan kag Eva nga magpamata. Ang mga lider sang Simbahan nagatudlo nga ining kasuguan nagapadayon sa gihapon. Ang mga nanay kag tatay nagabuligay sa pagpadako sang ila kabataan sa pagpalangga kag pagkamatarong (tan-awa sa Doktrina kag mga Kasugtanan 68: 25–28). Ang mga kabataan ginatudloan nga tahuron kag tumanon ang ila mga ginikanan (tan-awa sa Exodo 20:12).

Pagtudlo kag Pagtuon

Ang mga ginikanan nagatudlo sa ila kabataan nga palanggaon ang Dios kag tumanon ang Iya mga kasuguan. Ang kabuhi sa pamilya nagahatag sa aton sang mga oportunidad nga mabatyagan ang kalipay kag makatuon sang pagpasensya kag kaalwan. Ining mga kinaiya nagabulig sa aton nga mangin mas pareho sa Dios kag nagahanda sa aton nga magkabuhi nga malipayon bilang mga pamilya sa wala katubtuban.

Pagpabakod sang mga Pamilya

Kinahanglan sang pagpangabudlay, dedikasyon, kag pasensya para magtukod sang madinalag-on nga pamilya. Ang mga prinsipyo sang ebanghelyo pareho sang pagtuo, pangamuyo, pagpatawad, pagpalangga, trabaho, kag mapuslanon nga kalingawan makabulig sa aton nga masalapoan ang kalipay sa pagsinalayo sang pamilya. Sarang man kita makabaton sang personal nga rebelasyon para mahibal-an kon paano pabakuron ang aton mga pamilya.

Christ’s Image [Imahe ni Cristo], ni Heinrich Hofmann

Ang mga Bugay Ara para sa Tanan

Indi tanan may oportunidad nga mangin bahin sang isa ka sulundon nga pamilya diri sa duta. Pero ang Dios nagpromisa nga ang tanan nga nagatuman sang Iya mga kasuguan makabaton sang tanan nga mga bugay sang wala katapusan nga pamilya. Makasalig kita sa Iya kag magtuo sa Iya tiyempo.

© 2023 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, January 2023. Language. 18904 861