Agnanayon Dagiti Pamilia

Ti pamilia ti kangrunaan a yunit ti kagimongan ken ti Simbaan. Mamati dagiti miembro ti Ti Simbaan ni Jesucristo dagiti Santo iti Ud-udina nga Aldaw a mabalin nga agnanayon dagiti pamilia. Agtrabahotayo a mangpapigsa kadagiti pamiliatayo iti daga. Addaantayo pay iti pammati a makaawattayo iti bendision ti agnanayon a pamilia.

Ti Pamilia ti Dios

Amin a tao ket espiritu nga annak a lallaki wenno babbai dagiti nailangitan a nagannak. Pasettayo amin ti pamilia ti Dios. Addaantayo amin iti nadiosan a kinatao ken pagtungpalan. No agbiagtayo a nalinteg, makapagsublitayo a makipagnaed iti Nailangitan nga Amatayo kas paset ti pamiliana iti agnanayon.

Ladawan ti kallaysa ni Joseph Kaluba

Dagiti Agnanayon a Pamilia

No mailantip ti maysa a lalaki ken maysa a babai iti templo ken tungpalenda dagiti katulaganda, agpautto ti panagasawada iti agnanayon. Maawagan daytoy anga ordinansa iti templo iti pannakailantip. Dagiti annak a mayanak kalpasan a mailantip dagiti dadakkelda ket nayanak iti dayta a katulagan. Dagiti annak a mayanak sakbay a mailantip dagiti dadakkelda ket mabalin a mailantip kadakuada iti templo tapno makapagbalinda a pamilia iti agnanayon. Aramiden dagiti miembro ti Simbaan ti aramid iti family history ken templo tapno mabalinda nga ilantip a sangkamaysa dagiti pamiliada babaen kadagiti amin a kaputotan. Maaramid a posible ti bendision ti agnanayon a pamilia gapu ken ni Jesucristo ken ti Pannubbotna.

Kallaysa

Ti kallaysa ti maysa a lalaki ken maysa a babai ket inordenan ti Dios. Isuro ti ebanghelio ni Jesucristo dagiti assawa a lallaki ken babbai nga agbalin a napudno iti tunggal maysa ken napudno kadagiti katulaganda iti panagasawa. Nasken nga agbalinda a pudno iti panunot, sao, ken aramid. Ti panagasawa ket agpada a panagkadua, ket nasken nga agpinnaregta, aglinniwliwa, ken agtinnulong iti tunggal maysa.

Dagiti Nagannak ken Annak

Binilin ti Dios da Adan ken Eva a maaddaanda iti annak. Insuro dagiti lider ti simbaan a maipatpatungpal pay laeng daytoy a bilin. Agtitinnulong dagiti inna ken amma a mangpadakkel kadagiti annakda iti ayat ken kinalinteg (kitaen iti Doktrina ken Katulagan 68:25–28). Masursuruan dagiti annak a mangdayaw ken agtulnog kadagiti nagannakda (kitaen iti Exodo 20:12).

Panangisuro ken Panagsursuro

Isuro dagiti nagannak dagiti annakda nga agayat iti Dios ken agtulnog kadagiti bilinna. Ti biag ti pamilia ti mangted kadatayo kadagiti gundaway a makarikna iti rag-o ken makasursuro iti kinaanus ken kinamanagparabur. Dagitoy a kababalin ti tumulong kadatayo nga agbalin nga ad-adda a kas iti Dios ken mangisagana kadatayo nga agbiag a naragsak kas pamilia iti agnanayon.

Panangpapigsa kadagiti Pamilia

Kasapulan ti aramid, kinapasnek, ken kinaanus tapno makaparnuay iti naballigian a pamilia. Dagiti pagbatayan ti ebanghelio a kas iti pammati, kararag, pammakawan, ayat, trabaho, ken makapasalun-at a pagraragsakan ket makatulong kadatayo a mangsapul iti rag-o iti biag ti pamilia. Makaawattayo pay iti paltiing tapno maammuan no kasano ti mangpapigsa kadagiti pamiliatayo.

Ladawan ni Cristo, ni Heinrich Hofmann

Sidadaan a Magun-od ti Amin dagiti Bendision

Saan nga amin ti addaan iti gundaway nga agbalin a paset ti maysa a nasayaat a pamilia ditoy daga. Ngem inkari ti Dios a tunggal maysa a mangtungpal kadagiti bilinna ket umawatto iti amin a bendision ti agnanayon a pamilia. Makapagtalektayo Kenkuana ken maaddaan iti pammati iti panawenna.

© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, January 2023. Language. 18904 864