Ubutumwa Ngarukakwezi bwa Liyahona , Mutarama 2023

Imiryango Ni Ihoraho

Umuryango ni igice cy’ingenzi cya sosiyete n’Itorero. Abanyamuryango b’Itorero rya Yesu Kristo ry’Abera b’Iminsi ya Nyuma bemera ko imiryango ishobora kuba ihoraho. Dukora kugira ngo dukomeze imiryango yacu ku isi. Dufite kandi ukwizera ko dushobora kwakira umugisha w’umuryango uhoraho.

Umuryango w’Imana

Abantu bose ni abahungu n’abakobwa ba roho b’ababyeyi bo mu ijuru. Twese turi igice cy’umuryango w’Imana. Twese dufite kamare y’ubumana n’iy’igeno. Nitubaho mu bukiranutsi, dushobora gusubira kubana na Data wo mu Ijuru nk’igice cy’umuryango We iteka ryose.

Ifoto y’ubukwe yafotowe na Joseph Kaluba

Imiryango Ihoraho

Iyo umugabo n’umugore bashyingiranwe mu ngoro y’imana bakanubahiriza ibihangobyabo, ugushyingiranwa kwabo kuzaramba ubuziraherezo. Uyu mugenzo w’ingoro y’Imana witwa iyomekanywa. Abana bavuka nyuma y’uko ababyeyi babo bomekanyijwe bavukira mu gihango. Abana bavuka mbere y’uko ababyeyi babo bomekanyijwe bashobora komekwa kuri bo mu ngoro y’Imana kugira ngo bashobore kuba umuryango iteka ryose. Abanyamuryango b’Itorero bakora amateka y’umuryango n’umurimo wo mu ngoro y’Imana kugira ngo bashobore komekanya imiryango yabo hamwe mu bisekuru byose. Umugisha w’umuryango uhoraho ushobozwa kubera Yesu Kristo n’Impongano Ye.

Ugushyingiranwa

Ugushyingiranwa hagati y’umugabo n’umugore kwimitswe n’Imana. Inkuru nziza ya Yesu Kristo yigisha abagabo n’abagore kuberana indatenguha n’indahemuka mu bihango by’ugushyingiranwa kwabo. Bakwiye kuba abanyakuri mu bitekerezo, mu mvugo, no mu bikorwa. Ugushyingiranwa ni ubufatanye bungana, kandi abashakanye bakwiye gushyigikira, guhumuriza, no gufashanya.

Ababyeyi n’Abana

Imana yategetse Adamu na Eva kubyara abana. Abayobozi b’Itorero bigishije ko iri tegeko rikiriho. Ababyeyi b’abagore n’aba bagabo bakorera hamwe mu kurera abana babo mu rukundo no mu bukiranutsi (reba Inyigisho n’Ibihango 68:25–28). Abana bigishwa kubaha no kumvira ababyeyi babo (reba Kuva 20:12).

Kwigisha no Kwiga

Ababyeyi bigisha abana babo gukunda Imana no kumvira amategeko Yayo. Ubuzima bw’umuryango buduha inzaho zo kumva umunezero no kwiga ukwihangana n’ukutikunda. Iyi mico idufasha kurushaho guhinduka nk’Imana no kudutegura kubaho mu byishimo nk’imiryango iteka ryose.

Gukomeza Imiryango

Bisaba umurimo, ubwitange n’ukwihangana kugira ngo wubake umuryango ushimishije. Amahame y’Inkuru Nziza nk’ukwizera, isengesho, imbabazi, umurimo n’ukwinezeza mbonezamuco bishobora kudufasha kubona umunezero mu buzima bw’umuryango. Dushobora kandi kwakira icyahishuwe bwite kugira ngo tumenye uko dukomeza imiryango yacu.

Christ’s Image[Ishusho ya Kristo], cyahanzwe na Heinrich Hofmann

Imigisha Iboneka kuri Bose

Ntabwo ari buri wese ugira urwaho rwo kuba ugize umuryango uboneye hano ku isi. Ariko Imana yasezeranyije ko buri wese wubahiriza amategeko Yayo azahabwa imigisha yose y’umuryango uhoraho. Dushobora kumugirira icyizere kandi tukagira ukwizera mu gihe Cye.

Kuva mu Byanditswe Bitagatifu

Ababyeyi bigisha abana babo gukunda no gukorerana (reba Mosaya 4:14–15).

Isengesho rizakomeza imiryango (reba 3 Nefi 18:21).

Abo bomekanyirizwa mu ngoro y’Imana bazakira imigisha ihoraho (reba Inyigisho n’Ibihango 132:19).

Amagambo yo Kwibuka

Kamere y’Ubumana: Ibiranga twarazwe n’Imana nk’abana Bayo ba roho.

Ibihango: Amasezerano tugirana n’Imana. Idusezeranya imigisha.

Yimitswe: yashyizweho, yashinzwe, cyangwa yategetswe. “Kwimika” bishobora na none gusobanura guha ufite ubutambyi ubushobozi mu mwanya w’ubutambyi, nk’umudiyakoni cyangwa umukuru.

Icyahishuwe: Uguhumekwa kuvuye ku Mana ihumekera mu bana Bayo ku isi.

Menya Ibindi Byisumbuyeho

Kugira ngo wige ibyo abahanuzi b’iminsi ya nyuma bigishije ku byerekeye imiryango, ushobora gusoma “Umuryango: Itangazo ku Isi” kuri ChurchofJesusChrist.org cyangwa muri porogaramu y’Isomero ry’Inkuru Nziza. Amaparuwasi n’amashami agira amatsinda y’abana n’ay’ingimbi n’abangavu mu Ishuri ry’ibanze, Urubyiruko rw’Abahungu n’Urubyiruko rw’Abakobwa. Ushobora kuvugisha abo bayobozi n’abavandimwe bafasha ibyerekeye uko bashobora gufasha gukomeza abana bawe.

© 2023 na Intellectual Reserve, Inc. All rights reserved. Cyacapiwe muri Leta Zunze Ubumwe z’Amerika. Ukwemerwa kw’Icyongereza: 6/19. Ukwemerwa k’ubusemuzi: 6/19. Ubusemuzi bwa Monthly Liahona Message, January 2023. Language. 18904 716