Malapa Kea Bosafeleng

Lelapa ke lekala la motheo la sechaba le Kereke. Litho tsa Kereke ea Jesu Kreste ea Bahalaleli ba Mehla ea Kajeno li lumela hore malapa e ka ba a bosafeleng. Re sebeletsa ho matlafatsa malapa a rona lefatśeng. Re boetse re na le tumelo hore re ka amohela lihlohonolofatso tsa malapa a ka hosafeleng.

Lelapa la Molimo

Batho bohle ke bara le barali ba se-moea ba batsoali ba leholimong. Bohle re karolo ea lalapa la Molimo. Bohle re na le semelo sa bomolimo le pheletso. Ha re phela ka ho loka, re ka khutlela ho phela le Ntat´a rona ea Maholimong re le karolo ea lelapa la hae ka hosafeleng.

Senepe sa Lenyalo ka Joseph Kaluba

Malapa a Bosafeleng

Ha monna le mosali ba nyalane tempeleng ´me ba boloka lilekanetsa bona, lenyalo la bona e tla ba la ka ho sa feleng. Tśebeletso ena ea tempele e bitsoa tiiso. Bana ba hlahang kamor´a hore batsoali ba tiisoe ba hlahela kahar´a selekane seo. Bana ba hlahang pele batsoali ba tiisoa ba ka tiisoa ho bona tempeleng hore e be lelapa ka ho sa feleng. Litho tsa kereke li etsa nalane ea lelapa le mosebetsi oa tempele hore malapa a bona a tiisoe hammoho ho isa melokong eohle. Hlohonolofatso ea lelapa la bosafeleng e etsahala ka lebaka la Jesu Kreste le Topollo ea Hae.

Lenyalo

Lenyalo pakeng tsa monna le mosali le hlotsoe ke Molimo. Evangeli ea Jesu Kreste e ruta banna le basali ho tśepahallana lilekaneng tsa bona tsa lenyalo. Ba lokela ho ba le ′nete menahanong, mantsoeng, le liketsong. Lenyalo ke kopanelo e lekanang, balekane ba lokela ho khothatsana, ho tśelisana, le ho thusana.

Batsoali le Bana

Molimo o laetse Adama le Eva ho ba le bana. Baetapele ba Kereke ba rutile hore taelo ena e ntse e le tśebetsong. Bo-mme le bo-ntate ba sebetsa ′moho ho holisa bana ba bona ka lerato le ka ho loka (bona Lithuto Tsa Tumelo le Lilekane 68:25–28). Bana ba rutoa ho hlompha le ho mamela batsoali ba bona (sheba Exods 20:12).

Ho Ruta le Ho Ithuta

Batsoali ba ruta bana ba bona ho rata Molimo le ho mamela litaelo tsa hae. Bophelo ba lelapa bo re fa monyetla oa ho utloa thabo le ho ithuta mamello le ho se ichebe borona. Makhabane ana a re thusa ho ba joaloka Molimo le ho re lokisetsa ho phela ka thabo re le malapa ka ho safeleng.

Ho Matlafatsa Malapa

Ke mosebetsi, boitelo, le mamello ho aha lelapa le atlehileng. Metheo ea Evangeli joaloka tumelo, thapelo, tśoarelo, lerato, mosebetsi le monyaka li ka re thusa ho fumana thabo bophelong ba lelapa. Re ka amohela hape tśenolelo ea botho ho tseba kamoo re ka matlafatsang malapa a rona ka teng.

Setśoantśo sa Kreste, ka Heinrich Hofmann

Lihlohonolofatso Li Teng Ho Bohle

Ha se bohle ba nang le monyetla oa ho ba karolo ea lelapa le lokelang mona lefatśeng. Empa Molimo o tśepisitse hore e mong le e mong ea bolokang litaelo tsa hae o tla amohela lihlohonolofatso tsohle tsa lelapa la bosafeleng. Re ka mo tśepa ´me ra ba le tumelo ho nako ea hae.