“కుటుంబములు శాశ్వతమైనవి,” లియహోనా, 2023 జనవరి.
లియహోనా నెలవారీ సందేశము, 2023 జనవరి
కుటుంబములు శాశ్వతమైనవి
కుటుంబము, సమాజం మరియు సంఘము యొక్క ప్రధాన విభాగము. యేసు క్రీస్తు యొక్క కడవరి దిన పరిశుద్ధుల సంఘ సభ్యులు కుటుంబములు శాశ్వతం కాగలవని నమ్ముతారు. మనము భూమిపై మన కుటుంబాలను బలోపేతం చేయడానికి పని చేస్తాము. మనము నిత్య కుటుంబం యొక్క ఆశీర్వాదాన్ని పొందగలమనే విశ్వాసం కూడా మనకు ఉంది.
దేవుని కుటుంబం
జనులందరు పరలోక తండ్రి యొక్క ఆత్మీయ కుమారులు లేదా కుమార్తెలైయున్నారు. మనమందరము దేవుని కుటుంబంలో భాగమైయున్నాము. మనందరికీ దైవిక స్వభావం మరియు విధి ఉంది. మనం నీతిమంతులుగా జీవించినట్లయితే, మన పరలోక తండ్రితో ఎప్పటికీ ఆయన కుటుంబంలో భాగంగా జీవించడానికి మనం తిరిగి వెళ్ళగలము.
నిత్య కుటుంబాలు
ఒక స్త్రీ మరియు పురుషుడు దేవాలయంలో వివాహం చేసుకుని, వారి నిబంధనలను పాటించినప్పుడు, వారి వివాహం శాశ్వతంగా ఉంటుంది. ఈ దేవాలయ విధిని ముద్రణ అని అంటారు. తల్లిదండ్రులు ముద్ర వేయబడిన తర్వాత పుట్టిన పిల్లలు ఆ నిబంధనలో పుడతారు. తల్లిదండ్రులు ముద్ర వేయబడడానికి ముందు జన్మించిన పిల్లలు దేవాలయములో వారితో కలిపి ముద్రవేయబడగలరు, తద్వారా వారు శాశ్వతంగా కుటుంబంగా ఉండగలరు. సంఘ సభ్యులు కుటుంబ చరిత్ర మరియు దేవాలయ కార్యమును చేస్తారు, తద్వారా వారు తమ కుటుంబాలను అన్ని తరాలతో కలిపి ఉంచగలరు. యేసు క్రీస్తు మరియు ఆయన ప్రాయశ్చిత్తం కారణంగా శాశ్వతమైన కుటుంబం యొక్క ఆశీర్వాదం సాధ్యమైంది.
వివాహము
స్త్రీ పురుషుల మధ్య వివాహం దేవునిచేత నియమించబడింది. భర్తలు మరియు భార్యలు ఒకరిపట్ల ఒకరు విశ్వాసంగా ఉండాలని మరియు వారి వివాహ నిబంధనలలో విశ్వాసపాత్రంగా ఉండాలని యేసు క్రీస్తు సువార్త బోధిస్తుంది. వారు ఆలోచనలో, మాటలో మరియు క్రియలో స్వచ్ఛంగా ఉండాలి. వివాహం అనేది సమాన భాగస్వామ్యం, జీవిత భాగస్వాములు ఒకరినొకరు ప్రోత్సహించుకోవాలి, ఓదార్చాలి మరియు ఒకరికొకరు సహాయం చేసుకోవాలి.
తల్లిదండ్రులు మరియు పిల్లలు
పిల్లలను కనమని దేవుడు ఆదాము మరియు హవ్వలను ఆజ్ఞాపించారు. ఈ ఆజ్ఞ ఇప్పటికీ అమలులో ఉందని సంఘ నాయకులు బోధించారు. తల్లులు మరియు తండ్రులు తమ పిల్లలను ప్రేమగా మరియు నీతిమంతులుగా పెంచడానికి కలిసి పని చేస్తారు (సిద్ధాంతము మరియు నిబంధనలు 68:25–28 చూడండి). పిల్లలు, తమ తండ్రిని, తల్లిని సన్మానించాలని మరియు వారి మాటవినాలని బోధించబడ్డారు (నిర్గమకాండము 20:12 చూడండి).
బోధించుట మరియు నేర్చుకొనుట
తల్లిదండ్రులు, తమ పిల్లలకు దేవుణ్ణి ప్రేమించాలని మరియు ఆయన ఆజ్ఞలను పాటించాలని బోధిస్తారు. కుటుంబ జీవితం ఆనందాన్ని అనుభవించడానికి, సహనం మరియు నిస్వార్థతను నేర్చుకోవడానికి అవకాశాలను ఇస్తుంది. ఈ లక్షణాలు మరింతగా దేవుడిలా మారడానికి మనకు సహాయపడతాయి మరియు కుటుంబాలుగా ఎప్పటికీ సంతోషంగా జీవించడానికి మనల్ని సిద్ధపరుస్తాయి.
కుటుంబాలను బలోపేతం చేయడం
జయప్రదమైన కుటుంబాన్ని నిర్మించడానికి పని, అంకితభావం మరియు సహనం అవసరం. విశ్వాసము, ప్రార్థన, క్షమాపణ, ప్రేమ, పని మరియు ఆరోగ్యకరమైన వినోదం వంటి సువార్త సూత్రాలు కుటుంబ జీవితంలో ఆనందాన్ని కనుగొనడంలో మనకు సహాయపడగలవు. మన కుటుంబాలను ఎలా బలపరచుకోవాలో తెలుసుకోవడానికి మనం వ్యక్తిగత బయల్పాటును కూడా పొందగలము.
Christ’s Image [క్రీస్తు యొక్క చిత్రము], హీన్రిచ్ హాఫ్మన్ చేత
ఆశీస్సులు అందరికీ అందుబాటులో ఉంటాయి
ప్రతీ ఒక్కరికి భూమిపై ఆదర్శ కుటుంబంలో భాగమయ్యే అవకాశం లేదు. కానీ దేవుడు తన ఆజ్ఞలను పాటించే ప్రతీఒక్కరూ శాశ్వతమైన కుటుంబం యొక్క అన్ని ఆశీర్వాదాలను పొందుతారని వాగ్దానం చేశారు. మనము ఆయనపై నమ్మకం ఉంచవచ్చు మరియు ఆయన సమయపాలనపై విశ్వాసం ఉంచవచ్చు.
© 2023 by Intellectual Reserve, Inc. All rights reserved. అ.సం.రా.లో ముద్రించబడినది. ఆంగ్ల ఆమోదము: 6/19. అనువాద ఆమోదము: 6/19. Monthly Liahona Message, January 2023 యొక్క అనువాదము. Language. 18904 421