“Ol Risos blong Ol Yut mo Ol Pikinini,” Liahona, Feb. 2023.
Evri manis Liahona Mesej, Febwari 2023
Ol Risos blong Ol Yut mo Ol Pikinini
Ol papa mo mama oli gat fasfala responsabiliti ia blong tijim ol pikinini blong olgeta abaot Jisas Kraes mo gospel blong Hem. Jos Ia blong Jisas Kraes blong Ol Lata-dei Sent i gat ol oganaesesen, ol program, mo ol nara risos blong helpem ol papa mo mama long ol efot blong olgeta. Tugeta, ol papa mo mama, ol Jos lida, mo ol fren oli save helpem evri pikinini mo ol yut blong kam long Kraes.
Foto i stap kam long Ben Johnson
Praemeri
Praemeri hem i Jos oganaesesen ia blong ol pikinini stat long 18 manis kasem 11 yia. Long Praemeri, ol pikinini oli lanem abaot Jisas Kraes mo gospel blong Hem tru long ol lesen, miusik, mo ol aktiviti. Praemeri i save helpem ol pikinini blong oli filim lav ia blong God we Hem i gat long olgeta.
Ol Aronik Prishud Kworom mo Ol Yang Woman Klas
Long stat blong Jenuware long yia we bae ol pikinini oli gat 12 yia, oli muv aot long Praemeri i go long ol Kworom blong Aronik Prishud (blong ol boe) o ol klas blong Yang Woman (blong ol gel). Long ol kworom mo ol klas blong olgeta, yut i gohed blong mekem i kam strong ol testemoni blong olgeta mo givim seves long ol narawan.
Program blong Ol Pikinini mo Ol Yut
Long yut blong Hem, Jisas Kraes i gro long “bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem” (Luk 2:52). Ol pikinini mo Ol Yut program oli helpem ol yang memba blong Jos blong folem eksampol blong Kraes. Olgeta oli lan mo gro long evri eria long laef blong olgeta—long saed blong spirit, long saed blong sosol laef, long saed blong bodi, mo long saed blong waes.
Ol Magasin blong Jos
Jos magasin blong ol pikinini hem i Fren magasin. Blong Ol Yut Oli Kam Strong hem i magasin blong ol yut. Ol magasin ia insaed i gat, ol stori, ol tijing, mo ol aktiviti we oli raetem speseli blong ol pikinini mo ol yut.
Blong Ol Yut Oli Kam Strong Gaedbuk
Blong Ol Yut Oli Kam Strong: Wan Gaed blong Stap Mekem Ol Joes i tijim ol yut abaot ol tru tok blong gospel. Hem i tijim olgeta olsem wanem blong mekem ol desisen we bae i helpem olgeta blong folem Jisas Kraes. Hem i gat insaed ol ansa blong ol kwestin we oli yut oli gat abaot olsem wanem blong laef folem gospel.
Gospel Laebri
Gospel Laebri i gat plante risos long dijitol, hemia ol vidio, miusik, ol skripja stori, mo ol aktiviti. I gat tu ol risos blong helpem ol papa mo mama mo ol lida blong tijim ol gospel prinsipol. Ol risos ia oli faenem insaed long Gospel Laebri long ChurchofJesusChrist.org mo long Gospel Laebri ap.
Ol BYS Konfrens
Long stat blong yia taem oli kasem 14 yia, ol yut oli save go long ol konfrens blong, Blong Ol Yut Oli Kam Strong (BYS). Ol konfrens ia oli gat ol aktiviti mo ol klas we oli help blong mekem fet i kam strong long Jisas Kraes mo helpem ol yut oli gro long saed blong spirit, long saed blong sosol laef, long saed blong bodi, mo long saed blong waes.
© 2023 long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Evri Manis Liahona Mesej, Febwari 2023. Language. 18910 852