iTukutuku Vakavula ni Liaona, Feperueri 2023

iVurevure me baleti ira na iTabagone kei na Gonelalai

Sa nodra itavi taumada na itubutubu mera vakavulici ira na luvedra me baleti Jisu Karisito kei na Nona kosipeli. Era sa tu ena Lotu i Jisu Karisito ni Yalododonu Edaidai na isoqosoqo, parokaramu, kei na ivurevure tale eso me vukei ira na itubutubu ena nodra sasaga. Sa rawa nira cakacaka vata na itubutubu, iliuliu ni Lotu, kei na itokani me vukei ira kece na gonelalai kei na itabagone mera lako mai vei Karisito.

iTaba mai vei Ben Johnson

Na Lalai

Na Lalai e sa dua na isoqosoqo ena Lotu me baleti ira na gonelalai mai na vula 18 kina yabaki 11. Ena Lalai, era vulica kina na gone me baleti Jisu Karisito kei na Nona kosipeli mai na lesoni, sere ivakatagi, kei na itaviqaravi eso. Na Lalai e rawa ni vukei ira na gone mera vakila na loloma ni Kalou ena vukudra.

Kuoramu ni Matabete i Eroni kei na Kalasi ni Goneyalewa

Ena Janueri ni yabaki era na yabaki 12 kina na gone, era sa na toki mai na Lalai kina kuoramu ni Matabete i Eroni (me baleti ira na tagane) se kalasi ni Goneyalewa (me baleti ira na yalewa). Ena nodra kuoramu kei na kalasi oqori, era na tomana tikoga kina na itabagone na vaqaqacotaki ni nodra ivakadinadina kei na qaravi ira na tani.

Parokaramu ni Gonelalai kei na iTabagone

Ena Nona gauna vakaitabagone, a sa tubu cake o Jisu Karisito “ena vuku kei na yagona talega, a sa vinakati koya vakalevu cake tikoga na Kalou kei ira talega na tamata” (Luke 2:52). Na parokaramu ni Gonelalai kei na iTabagone e vukei ira na lewe ni Lotu gone me ra muria na ivakaraitaki i Karisito. Era vuli ka tubu cake ena veitiki kece ni nodra bula—vakayalo, vaka veimaliwai, vakayago, kei na vakasama.

Mekasini ni Lotu

Na mekasini ni Lotu me baleti ira na gone sai koya na iTokani. Me iSakisaki ni Tabagone sai koya na mekasini me baleti ira na itabagone. Na mekasini oqo era tu kina na italanoa, ivakavuvuli, kei na itaviqaravi ka volai vakatabakidua me baleti ira na gone kei na itabagone.

Me iSakisaki ni iTabagone a iVoladusidusi

Me iSakisaki ni iTabagone: Dua na iDusidusi ni Caka Digidigi e vakavulici ira na itabagone me baleta na dina eso vakosipeli. E vakavulica vei ira na sala me ra vakatulewa kina ka na vukei ira mera muri Jisu Karisito. E oka talega kina na isau ni nodra vakatataro na itabagone me baleta na sala me ra bulataka kina na kosipeli.

Valenivola ni Kosipeli

Na Valenivola ni Kosipeli e tiko kina e vuqa na ivurevure vakalivaliva, oka kina na vidio, sere ivakatagi, italanoa ni ivolanikalou, kei na itaviqaravi. E oka talega kina na ivurevure me vukei ira na itubutubu kei na iliuliu mera vakavulica na ivakavuvuli eso ni kosipeli. Na ivurevure eso oqo era sa kunei ena Valenivola ni Kosipeli ena ChurchofJesusChrist.org kei na Gospel Library app.

Koniferedi ni MST

Me tekivu ena yabaki era yabaki 14 kina, era sa sureti na itabagone mera dau tiko ena koniferedi ni Me iSakisaki ni iTabagone (MST). Na soqo oqo e oka kina na itaviqaravi kei na kalasi eso ena vukea na vaqaqacotaki ni vakabauti Jisu Karisito ka vukei ira na itabagone mera tubu vakayalo, vaka veimaliwai, vakayago, kei na vakasama.

Mai na iVolanikalou

Era na vakila na gone na vakacegu nida vakavulici ira me baleta na Kalou (raica na Aisea 54:13; 3 Nifai 22:13).

Sa nodra itavi na itubutubu me ra vakavulici ira na luvedra mera kila na kosipeli (raica na Vunau kei na Veiyalayalati 68:25).

Era sa vakaroti na itubutubu me ra vakavulici ira na luvedra “ena rarama kei na dina” (Vunau kei na Veiyalayalati 93:40).

iVurevure Vakalivaliva baleti ira na Gonelalai

iTalanoa mai na ivolanikalou (scripturestories.ChurchofJesusChrist.org): Vakaraica na tabana ni rokarokataki, vidio, kei na italanoa vakaivolanikalou e volai me baleti ira na gonelalai.

Vidio (ChurchofJesusChrist.org/children/videos): Sarava na vidio ena vukudra ka baleti ira na gone.

Nodra ikumuni na gone ena Valenivola ni Kosipeli: Ena app kei na ChurchofJesusChrist.org, nai kumuni ni Valenivola ni Kosipeli ena ruku ni “Children” e tiko kina na sere ivakatagi, vidio, italanoa, kei na itaviqaravi tale eso.

Vakaraica Eso Tale

Kevaka e tiko na nomu vakatataro ena vuku ni ivurevure ni Lotu eso me baleti ira na gonelalai kei na itabagone, e rawa nio veitalanoa kei ira nomu dauveiqaravi turaga se marama, nomu iliuliu ni tabanalevu se tabana, se o ira na daukaulotu. E rawa talega ni o kunea e vuqa na ivurevure ena ChurchofJesusChrist.org.

© 2023 mai vei Intellectual Reserve, Inc. Dodonu kece e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. iVakadewa ni Monthly Liahona Message, February 2023. Language. 18910 000