“Resources para kadagiti Agtutubo ken Ubbing,” Liahona, Peb. 2023.
Binulan a Mensahe iti Liahona , Pebrero 2023
Resources para kadagiti Agtutubo ken Ubbing
Adda kangrunaan a pagrebbengan dagiti nagannak a mangisuro kadagiti annakda maipapan ken ni Jesucristo ken ti ebangheliona. Ti Simbaan ni Jesucristo dagiti Santo iti Ud-udina nga Aldaw ket addaan kadagiti organisasion, programa, ken dadduma pay a resources a tumulong kadagiti nagannak iti panagkagumaanda. Sangkamaysa, matulongan dagiti nagannak, lider ti Simbaan, ken gagayyem dagiti amin nga ubbing ken tin-edyer nga umay ken ni Cristo.
Naala a ladawan ni Ben Johnson
Primary
Ti Primary ti organisasion ti Simbaan para kadagiti ubbing nga agtawen iti 18 a bulan agingga iti 11 a tawen. Iti Primary, masursuro dagiti ubbing ti maipapan ken ni Jesucristo ken ti ebangheliona babaen kadagiti leksion, musika, ken aktibidad. Makatulong ti primary kadagiti ubbing a makarikna iti ayat ti Dios para kadakuada.
Dagiti Korum ti Aaronic Priesthood ken Klase ti Young Women
Iti Enero ti tawen nga agtawen dagiti ubbing iti 12, umakarda manipud Primary a mapan kadagiti korum ti Aaronic Priesthood (para kadagiti lallaki) wenno klase ti Young Women (para kadagiti babbalasitang). Kadagiti korum ken klaseda, agtultuloy a papigsaen dagiti agtutubo dagiti pammaneknekda ken agserbi kadagiti dadduma.
Programa dagiti Ubbing ken Agtutubo
Iti kinaagtutubona, ni Jesucristo “dimmakkel iti kinasirib ken kinatayag, ken iti gundaway iti Dios ken iti tao” (Lucas 2:52). Tulongan ti programa dagiti Ubbing ken Agtutubo dagiti agtutubo a miembro ti Simbaan a mangsurot iti pagwadan ni Cristo. Agsursuro ken dumakkelda iti amin a tay-ak ti biagda —iti naespirituan, sosial, pisikal, ken intelektual.
Dagiti Magasin iti Simbaan
Ti magasin iti Simbaan para kadagiti ubbing ket ti Friend a magasin. Para iti Pigsa dagiti Agtutubo ket ti magasin para kadagiti agtutubo Mairaman kadagitoy a magasin dagiti estoria, sursuro, ken aktibidad a naisurat a naipangpangruna para kadagiti ubbing ken tin-edyer.
Para iti Pigsa dagiti Agtutubo Pangiwanwan a Pagbasaan
Para iti Pigsa dagiti Agtutubo: Maysa a Pangiwanwan iti Panagpili ti mangisuro kadagiti agtutubo maipapan kadagiti kinapudno ti ebanghelio. Isurona kadakuada no kasano ti agaramid kadagiti pangngeddeng a makatulong kadakuada a mangsurot ken Jesucristo. Iramanna pay dagiti sungbat kadagiti saludsod a mabalin nga adda kadagiti agtutubo maipapan iti no kasano ti agbiag iti ebanghelio.
Gospel Library
Adu ti digital resources ti Gospel Library, agraman dagiti video, musika, estoria iti nasantuan a kasuratan, ken aktibidad. Iramanna pay dagiti resources a tumulong kadagiti nagannak ken lider a mangisuro kadagiti pagbatayan ti ebanghelio. Masarakan dagitoy a resources iti Gospel Library iti ChurchofJesusChrist.org ken iti Gospel Library app.
Dagiti Komperensia iti FSY
Mangrugi iti tawen nga agtawenda iti 14, maawis dagiti agtutubo a tumabuno kadagiti komperensia ti For the Strength of Youth (FSY). Mairaman kadagitoy a pasken dagiti aktibidad ken klase a makatulong a mangpapigsa iti pammati ken ni Jesucristo ken tumulong kadagiti agtutubo a dumur-as iti naespirituan, sosial, pisikal, ken intelektual.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, February 2023. Language. 18910 864