Хүүхэд, өсвөр үеийнхэнд зориулсан эх сурвалж

Хүүтэйгээ хамт судраас уншиж буй эцэг эх

Эцэг эхчүүд хүүхдүүддээ Есүс Христийн болон Түүний сайн мэдээний талаар заах үндсэн үүрэгтэй. Есүс Христийн Хожмын Үеийн Гэгээнтнүүдийн Сүмд эцэг эхчүүдийн хүчин чармайлтад туслах байгууллага, хөтөлбөр зэрэг олон эх сурвалж бий. Эцэг эхчүүд, Сүмийн удирдагчид, найз нөхөд хамтдаа бүх хүүхэд, өсвөр үеийнхнийг Христэд ирэхэд нь тусалж чадна.

Гэрэл зургийг Бэн Жонсон

Хүүхдийн хэсэг

Хүүхдийн хэсэг нь 18 сартайгаас 11 хүртэлх насны хүүхдүүдэд зориулагдсан Сүмийн байгууллага юм. Хүүхдийн хэсэгт хүүхдүүд Есүс Христийн болон Түүний сайн мэдээний талаар хичээл, дуу хөгжим, үйл ажиллагаагаар дамжуулан суралцдаг. Хүүхдийн хэсэг нь тэднийг гэсэн Бурханы хайрыг мэдрэхэд хүүхдүүдэд тусалж чадна.

Аароны санваарын чуулга ба Залуу эмэгтэйчүүдийн ангиуд

12 нас хүрэх жилийнхээ 1-р сараас эхлэн хүүхдүүд Хүүхдийн хэсгээс Аароны санваарын чуулга (хөвгүүд) болон Залуу эмэгтэйчүүдийн анги (охид) руу шилждэг. Өсвөр үеийнхэн чуулгад болон ангидаа шилжин орсныхоо дараа гэрчлэлээ хүчирхэгжүүлэх, бусдад үйлчлэх зэрэг зүйлсийг үргэлжлүүлэн хийдэг.

Хүүхэд, өсвөр үеийнхний хөтөлбөр

Өсвөр насанд нь Есүс Христийн “мэргэн ухаан, бие хаа өссөөр байсан агаад Бурханы хийгээд хүмүүсийн таалал Түүнд байлаа” (Лук 2:52). Хүүхэд, өсвөр үеийнхэнд зориулсан хөтөлбөр нь Сүмийн залуу гишүүдэд Христийн үлгэр жишээг дагахад тусалдаг. Тэд суралцсанаар сүнслэг болон нийгэм, бие махбод, оюун санааны зэрэг амьдралын бүхий л тал дээр өсөж хөгждөг.

Сүмийн сэтгүүл

Найз сэтгүүл бол хүүхдүүдэд зориулсан Сүмийн сэтгүүл. Өсвөр үеийнхний бат бөх байдлын төлөө бол өсвөр үеийнхэнд зориулсан сэтгүүл. Эдгээр сэтгүүл нь дотроо түүх, сургаал болон хүүхэд, өсвөр үеийнхэнд зориулан тусгайлан бэлтгэсэн үйл ажиллагаануудыг багтаадаг.

Өсвөр үеийнхний бат бөх байдлын төлөө удирдамж

Өсвөр үеийнхний бат бөх байдлын төлөө: Сонгоход туслах хөтөч нь өсвөр үеийнхэнд сайн мэдээний үнэний талаар заадаг. Энэ нь тэдэнд Есүс Христийг дагахад туслах сонголтуудыг хэрхэн хийх талаар заадаг. Түүнчлэн энэ нь сайн мэдээгээр хэрхэн амьдрах талаар өсвөр үеийнхэнд тулгарч болох асуултын хариултыг багтаадаг.

Gospel Library

Gospel Library нь видео, дуу хөгжим, судрын түүх, үйл ажиллагаа зэрэг цахим эх сурвалжуудыг багтаасан. Үүнд мөн эцэг эх, удирдагчдад сайн мэдээний зарчмуудыг заахад туслах эх сурвалжууд багтдаг. Эдгээр эх сурвалжийг ChurchofJesusChrist.org дээрх Gospel Library, Gospel Library аппликэйшнаас үзэх боломжтой.

ӨҮБББТ чуулганууд

Өсвөр үеийнхэн 14 нас хүрэх жилээсээ эхлэн Өсвөр үеийнхний бат бөх байдлын төлөө (ӨҮБББТ) чуулганд оролцох урилга хүлээн авдаг. Үйл ажиллагаанууд нь өсвөр үеийнхэнд сүнслэг болон нийгэм, бие махбод, оюун санааны хувьд өсөж хөгжихөд мөн Есүс Христэд итгэх итгэлээ хүчирхэгжүүлэхэд нь туслахад чиглэдэг.