Porous ren Liahona Iteiten Maram, March 2023

Efeioch seni Pristut

Kraist a epinono ekkewe Engon me Ruemon Apostel

Kraist a epinono ekkewe Engon me Ruemon Apostel, seni Harry Anderson

Ew efeioch seni pristut a kawor seni mokutukutun memef seni emon mi wor an Melchizedek Pristut. Efeioch seni pristut a fori an epwe tufich ren meinisin noun Kot kewe semirit ar repwe angei An manamman, chikar sefan, kinamwe, me emwen.

Ewe Pristut

Ewe pristut ewe manamanen Kot me mumuta an Kot. Ekkewe mwan mi nimenimoch mi wor ar ewe Melchizedek Pristut ra mokutukut non iten Jises Kraist nupwen ra awora efeioch seni pristut. Nupwen ra awora ekkei efeioch, ra apiru an ewe Chon Amanau minen apiru ne efeiochu ekkoch.

Ekkewe pau ra iseta won mokur

Sasing seni David Winters

Ifa Ussun Ekkewe Efeioch Ra Kawor

Efeioch seni pristut ra kawor ren wata pau won mokur. Emon mi wor an Melchizedek Pristut a wata pau won mokuren ewe aramas epwe angei ewe efeioch. Mwirin a ngeni ew efeioch nupwen ewe Ngun a emweni. Ekkewe ra awora ekkewe efeioch me ekkewe ra angeir ra omokutu ar nuku non Kot me epinukunuk non An mochen me fansoun.

Eita me Efeiochu Semirit

Mwirin an emon semirit a uputiw, emon mi wor an pristut a ngeni ewe semirit ew it me ew efeioch (nengeni Doctrine and Covenants 20:70). Ei a kan fis non atun mwichen Echikefen me kapasen pwarata. Ewe semirit epwe akkom angei ew it. Mwirin ewe mi wor an pristut a awora ew efeioch ngeni ewe semirit.

at mi samau a angei ew efeioch seni pristut

Sasing seni Welden C. Andersen

Effeioch ren ewe mi samau

Ewe mi wor an Melchizedek Pristut a tongeni ngeni ekkewe aramas mi samau ekkewe efeioch. Ei sokkun efeioch a wor ruu kinikinin: epiti ngeni oil me epinono ewe kepit. Ewin, emon mi wor ren ewe pristut a echieta ew chi ewe oil a fen efeioch, ika efeiochuno, won mokuren ewe aramas me awora ew mochomochen iotek. Mwirin pwan emon mi wor ren ewe pristut a epinono ewe kepit me ngeni ewe aramas ew efeioch ussun mi emwen seni ewe Ngun mi Fel.

Efeiochun Kinamwein ewe Samol me Aurour

Ekkewe mi wor ar Melchizedek Pristut ra tongeni awora efeiochun kinamwein ewe Samol me aurour ngeni chon ewe famini me ekkoch ra tingorer. Emon sam a wor an ewe Melchizedek Pristut a tongeni awora an sam efeioch ngeni noun kewe semirit. Ekkei meni repwe fokkun aninisoch nupwen ekkewe semirit ra mesengeni ekkewe sosot.

Ewisa Chon Mwichefen ar Repwe Angang non Wis

Nupwen chon Mwichefen ra angei wiser, ra angei efeioch nupwen ra angei wiser ar repwe aninis. Emon sou emwenin pristut a efeiochur fiti mumuta ar repwe mokutukut non ewe wis. Ewe sou emwenin pristut a pwan awora ew efeioch an epwe anisir non ar angang.

fefin a aneani an efeioch seni petriark

Sasing seni Shauna Stephenson

Efeioch seni Petriark

Meinisin chon Mwichefen mi nimenimoch ra tongeni angei ew efeioch seni petriark. Ei efeioch a awora kapasen emwen ren emon me emon seni ewe Samon. A tongeni awora emwen me kinamwe non unusen manauen ei aramas. A pwan afata tetenin mwirimwirin ewe aramas non ewe imwen Israel. Ewe chok emon petriark a epinipinino a tongeni awora ei sokkun efeioch.

Seni ekkewe Pukefel

Jises Kraist a efeiochu ekkewe mi sammau ren an a iseta poun wor (nengeni Luke 4:40).

Ekkewe chon aninis non Mwichefel ra tongeni angei wiser seni ekkewe a wor rer ewe mumuta (nengeni Doctrine and Covenants 42:11; Nongonongun Achifoua 1:5).

Aramas ion mi semwen ra tongeni tingorei ekkewe mi wor ar pristut ar repw efeiochur (nengeni James 5:14; Doctrine and Covenants 42:44).

Kapas kopwe Chechemeni

Mwichen Echikefen me kapasen pwarata: Ew mwichen sakramen ikewe chon ewe mwich ra apasata ar kapasen pwarata. Chon Mwichefen ra echikefen—resap mongo me un non ena ran—a kan fis aewin Raninifen ren ewe maram.

Epiti: Aean ewe oil mi pin a ew kinikinin ew efeioch seni pristut fan iten kewe mi samau.

Petriark: Emon mi wor an pristut mi epinipin an epwe awora efeioch seni petriark ngeni chon Mwichefen me non an ewe steik.

Kutta Pwan Ekkoch

Ika a wor ami kapaseis ussun ewe efeioch seni pristut, ouwa tongeni kapas ngeni ekkewe brother ika sister noumi chon iamwir, noumi sou emwenin wart me pranch, ika ekkewe misineri. Ren pwan soposopun porousan ussun ekkewe efeiochun pristut, nengeni chapter 18 of General Handbook: Serving in The Church of Jesus Christ of Latter-day Saints at ChurchofJesusChrist.org.

© 2023 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Poraus ren Liahona Iteiten Maram, March 2023. Language. 18905 901