Molaetsa wa Liahona wa Kgwedi le kgwedi, Mopitlo 2023

Ditshegofatso tsa Boperesiti

Keresete a Tlhoma Baaposetole ba ba Lesome le bobedi, ka Harry Anderson

Tshegofatso ya boperesiti e neelwa ka tlhotlheletso ke motshegetsi wa Boperesiti jwa ga Melekesiteke. Ditshegofatso tsa Boperesiti di dira gore bana botlhe ba Modimo ba ka amogela thata ya Gagwe, phodiso, kgomotso, le kaelo.

Boperesiti

Boperesiti ke thata le taolo ya Modimo. Banna ba ba tshwanelang ba ba tshegetsang Boperesiti jwa ga Melekesiteke ba dira mo leineng la ga Jeso Keresete fa ba neela ditshegofatso tsa boperesiti. Jaaka ba neela ditshegofatso tse, ba sala morago sekao sa Mmoloki sa go segofatsa ba bangwe.

Setshwantsho ka David Winters

Ka fa Ditshegofatso Di Neelwang ka teng

Ditshegofatso tsa Boperesiti di neelwa ka go baya diatla. Motshegetsi wa Boperesiti jwa ga Melekesiteke o baya diatla tsa gagwe mo tlhogong ya motho yo o amogelang tshegofatso. Ke gone a neele tshegofatso jaaka Mowa o kaela. Bao ba ba neelang ditshegofatso le bao ba ba di amogelang ba dira tumelo mo Modimong le go tshepha go rata ga Gagwe le nako.

Go fa Leina le go Segofatsa Bana

Morago ga ngwana a sena go tsholwa, motshegetsi wa boperesiti o mo neela leina le tshegofatso (bona Doctrine and Covenants 20:70). Se gantsi se diragala mo kopanong jwa go itima dijo le bopaki. Ngwana lantlha o neelwa leina. Ke gone motshegetsi wa boperesiti a neele ngwana tshegofatso.

Setshwantsho ka Welden C. Andersen

Ditshegofatso tsa Molwetsi

Batshegetsi ba Boperesiti jwa ga Melekeseteke ba ka neela batho ba ba lwalang ditshegofatso. Mefuta e ya tshegofatso e na le karolo tse pedi: tlotso ka leokwane le go kana tlotso. Lantlha, motshegetsi wa boperesiti o rothisetsa lerothodi la leokwane le le tshwaetsweng, kgotsa le segofaditswe, mo tlhogong ya motho mme a neele thapelo e khutshwane. Ke gone motshegetsi yo mongwe wa boperesiti a kane tlotso mme a neele motho tshegofatso jaaka a kaelwa ke Mowa o o Boitshepo.

Ditshegofatso tsa Kgomotso le Kaelo

Batshegetsi ba Boperesiti jwa ga Melekeseteke ba ka neela ditshegofatso tsa kgomotso le kgakololo go maloko a lelwapa le ba bangwe ba ba di kopang. Rre yo o tshegeditseng Boperesiti jwa ga Melekeseteke o ka naya bana ba gagwe ditshegofatso tsa ga rre. Se se ka thusa bogolo thata fa bana ba lebaganwe ke dikgwetlho tse di tlhaolegileng.

Go lomolola Maloko fa ba Direla mo Dipitsong

Fa maloko a Kereke ba amogela dipitso, ba neelwa tshegofatso fa ba lomololwa go direla. Moeteledipele wa boperesiti o ba segofatsa ka taolo go dira mo pitsong. Moeteledipele wa boperesiti le gone o ba neela tshegofatso go ba thusa mo tirelong ya bone.

Setshwantsho ka Shauna Stephenson

Tshegofatso ya Bopatiriaka

Leloko lengwe le lengwe le le tshwanelang le ka amogela tshegofatso ya bopatiriaka. Tshegofatso e e neela kaelo go motho go tswa kwa go Morena. E ka naya kaelo le kgomotso botshelo jotlhe jwa motho. Le gone e bolelela motho losika la gagwe mo ntlong ya Iseraele. Ke fela mopatiriaka yo o tlhomilweng yo a ka neelang mofuta o wa tshegofatso.

Go tswa mo Dikwalong tse di boitshepo

Jeso Keresete o segofaditse balwetse ka go ba baya diatla (bona Luke 4:40).

Maloko a a direlang mo Kerekeng ba lomololwa ke bao ba ba nang le taolo e e tshwanetseng (bona Doctrine and Covenants 42:11; Mekwalo ya Tumelo 1:5).

Batho ba ba lwalang ba ka kopa ditshegofatso go batshegetsi ba boperesiti (bona Jakobe 5:14; Doctrine and Covenants 42:44).

Mafoko a go a Gakologelwa

Bokopano jwa go itima dijo le Bopaki: Bokopano jwa sakaramente kwa maloko a phuthego a fang bopaki jwa bone. Maloko ba itima dijo—ba sa je le go nwa letsatsi leo—ka gale Sontaga sa ntlha sa kgwedi.

Tlotsa: Go rothisetsa lerothodi la leokwane le le tshwaetsweng jaaka karolo ya tshegofatso ya boperesiti ya molwetsi.

Mopatiriaka: Motshegetsi wa boperesiti yo o tlhomilweng go neela ditshegofatso tsa bopatiriaka go maloko a Kereke mo seteiking sa gagwe.

Batla Mo Gontsi

Fa o na le dipotso ka ditshegofatso tsa boperesiti, o ka bua le bakaulengwe kgotsa bokgaitsadi ba ba go direlang, baeteledipele ba gago ba wate kgotsa lekala, kgotsa baanamisa efangele. Go bona tshedimosetso e e oketsegileng ka go diragatsa ditshegofatso tsa boperesiti, bona kgaolo 18 ya General Handbook: Serving in The Church of Jesus Christ of Latter-day Saints at ChurchofJesusChrist.org.

© 2023 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Liahona wa Kgwedi le kgwedi, Mopitlo 2023. Language. 18905 763