Evri Manis Liahona Mesej, Epril 2023

Fet long Jisas Kraes

Jisas Kraes, i kam long Harry Anderson

Blong gat fet long Jisas Kraes hem i fas prinsipol blong gospel (luk long Ol Toktok blong bilif 1:4). Fet blong yumi i save helpem yumi mekem ol joes we i save lidim yumi gobak long Papa blong yumi long Heven. Yumi save wok blong mekem fet blong yumi i kam strong truaot long laef blong yumi.

?Wanem Nao Hem I Fet?

Fet hem i wan strong bilif o tras long wan samting. Blong gat fet hem i blong gat hop mo bilif long ol samting se oli tru, iven sapos yumi no save luk olgeta o andastanem olgeta fulwan (luk long Hibrus 11:1; Alma 32:21).

Ol ditel long Kraes mo Yangfala Rij Man, i kam long Heinrich Hoffman

Fet we Jisas Kraes I Stap long Medel

Jisas Kraes i mas stap long medel blong fet blong yumi olsem Sevya mo Ridima blong yumi we i save sevem yumi. Blong gat fet long Jisas Kraes i minim blong gat tras long Hem. Hem i minim se yumi mas trastem Hem fulwan—trastem paoa, waes tingting mo lav blong Hem. Hemia i minim tu blong biliv mo folem ol tijing blong Hem.

Mekem Fet blong Yumi I Kam Antap

Fet i wan presen we i kam long God, be yumi mas lukaotem mo wok from blong holemtaet i stap strong. Yumi save mekem fet blong yumi i kam antap taem yumi prea mo stadi skripja mo ol tijing blong ol lata-dei profet. Yumi save mekem fet blong yumi i kam strong taem yumi stap laef long stret mo gud fasin mo kipim ol kavenan blong yumi.

Stap laef tru long Fet

Fet i moa bitim blong bilif nomo. We i tekem aksen folem bilif ia. Yumi soem fet blong yumi long wei we yumi stap laef long hem. Fet long Jisas Kraes i save lidim yumi blong folem eksampol blong Hem we i stret gud evriwan. Fet blong yumi i lidim yumi blong obei ol komanmen, sakem sin blong yumi, mo mekem mo kipim ol kavenan.

Fet I Save Lidim Yumi i go long Ol Merikel

Tru fet i mekem ol merikel, we i tekem ol visen, ol drim, ol hiling, mo ol narafala presen we oli kam long God. Ol skripja oli gat fulap stori blong ol pipol we oli kasem merikel we i kam long Lod from fet blong olgeta long Hem. Luk long “Merikel” long Gaed long Ol Skripja blong luk ol narafala eksampol.

Fet I Save Givim Pis

Blong gat fet long God mo long plan ia blong sevem man bae i save givim paoa long yumi long taem blong ol jalenj blong yumi. Fet i save givim yumi paoa blong wokbaot i go fored mo fesem ol hadtaem wetem strong paoa long tingting. Iven sapos yu no sua abaot fiuja blong yu, fet blong yumi long Sevya i save givim pis long yumi.

Fet long Jisas Kraes I Lidim Yumi blong Kasem Laef we I No Save Finis

Taem yumi praktisim fet long Kraes, bae i lidim yumi blong kasem laef we i no save finis. Kraes i mekem rere wei blong yumi blong kasem laef we i no save finis. Taem yumi stap laef folem fet we yumi gat long Hem, yumi save kasem fogivnes from ol sin blong yumi mo bae yumi gobak stap wetem God bakegen.

I kam long Ol Skripja

Yumi gat fet taem yumi harem toktok blong God (luk Rom 10:17).

Fet we i no gat wok i go wetem, i samting we i ded (luk long Jemes 2:17–18).

Lod bae i mekem evri samting blong yumi sapos yumi gat fet (luk long 1 Nifae 7:12).

Ol Toktok blong Tingbaot

Kavenan: wan tabu promes we yu mekem wetem God. Yumi mekem kavenan long taem blong ol odinens olsem baptaes mo tempol endaomen.

Merikel: wan naesfala samting we i hapen tru long paoa blong God. Yumi luk ol merikel from se yumi gat fet long Lod.

Plan ia blong sevem man: plan blong God blong helpem ol pikinini blong Hem blong winim sin mo ded mo blong gobak stap wetem Hem. Fet long Jisas Kraes hem i impoten long plan ia from tru long Atonmen blong Hem bae yumi save sef.

Faenemaot Moa

Sapos yu gat sam kwestin abaot fet, yu save toktok long ol givhan brata o sista blong yu, wod o branj lida blong yu, o ol misinari. Yu save faenem tu ol tijing mo ol narafala risos abaot fet long ChurchofJesusChrist.org/study?lang=bis o, insaed long Gospel Laebri ap.

© 2023 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Monthly Liahona Message, April 2023. Language. 19006 852