Bulanan nga Mensahe sa Liahona, Abril 2023

Pagtuo kay Jesucristo

Jesucristo, ni Harry Anderson

Ang pag-angkon sang pagtuo kay Jesucristo amo ang una nga prinsipyo sang ebanghelyo (tan-awa sa Mga Artikulo sang Pagtuo 1:4). Ang aton pagtuo magabulig sa aton himo sang mga pagpili nga magadala sa aton pabalik sa aton Amay nga Langitnon. Pwede naton tinguhaan nga pabakuron ang aton pagtuo sa bug-os naton nga kabuhi.

Ano ang Pagtuo?

Ang pagtuo amo ang mabaskog nga pagpati ukon pagsalig sa isa ka butang. Ang pag-angkon sang pagtuo nagalakip sang paglaum kag pagpati sa mga butang nga matuod, bisan nga indi naton ini makita ukon maintiendihan sang lubos (tan-awa sa Mga Hebreo 11:1; Alma 32:21).

Detalye halin sa from Christ and the Rich Young Ruler [Si Cristo kag ang Manggaranon nga Lamharon nga Manugdumala], ni Heinrich Hofmann

Pagtuo nga Nasentro kay Jesucristo

Para magpadulong sa kaluwasan, ang aton pagtuo kinahanglan nga masentro kay Jesucrsto bilang aton Manluluwas kag Manunubos. Ang pag-angkon sang pagtuo kay Cristo nagakahulugan sang pag-angkon sang kompiyansa sa Iya. Nagakahulugan ini sang pagsandig sing lubos sa Iya—nga nagasalig sa Iya gahum, kaalam, kag gugma. Nagalakip man ini sang pagpati kag pagsunod sa Iya mga pinanudlo.

Pagdugang sang Aton Pagtuo

Ang pagtuo isa ka regalo halin sa Dios, apang kinahanglan naton ini pangitaon kag tinguhaan nga magpabilin nga mabaskog. Pwwede naton padakuon ang aton pagtuo paagi sa pagpangamuyo kag pagtuon sang balaan nga mga kasulatan kag sa mga panundlo sang mga propeta sa ulihing mga adlaw. Ginapabakod man naton ang aton pagtuo kon nagapangabuhi kita sing matarong kag ginatipigan ang aton mga kasugtanan.

Pagpangabuhi paagi sa Pagtuo

Ang pagtuo labaw pa sangsa pagpati lamang. Ini nagalakip sang pagbuhat suno sa sinang pagpati. Ginapakita naton ang aton pagtuo sa kon paano kita nagapangabuhi. Ang pagtuo kay Jesucristo nagatulod sa aton nga sundon ang Iya perpekto nga halimbawa. Ang aton pagtuo nagaduso sa aton nga magtuman sang mga kasugoan, maghinulsol sang aton mga sala kag maghimo kag magtipig sang mga kasugtanan.

Ang Pagtuo Pwede nga Magdala sang mga Milagro

Ang matuodtuod nga pagtuo nagadala sang mga milagro, nga mahimo maglakip sang mga panan-awan, mga damgo, mga pagpang-ayo, kag iban pa nga mga regalo halin sa Dios. Ang balaan nga mga kasulatan nagaunod sang madamo nga istorya sang mga tawo nga nakabaton sang mga milagro halin sa Ginuo tungod sang ila pagtuo sa Iya. Tan-awa sa “Miracle” sa Guide to the Scriptures para sa pila ka halimbawa.

Ang Pagtuo Pwede nga Magdala sang Paghidaet

Ang pag-angkon sang pagtuo sa Dios kag sa Iya plano sang kaluwasan makapabakod sa aton sa tion sang aton mga kabudlayan. Ang pagtuo makahatag sa aton sang kusog nga mag-abante kag atubangon ang aton mga kabudlayan nga may kaisog. Bisan pa nga kon ang palaabuton daw wala sing kaseguruhan, ang aton pagtuo sa Manluluwas pwede maghatag sa aton sang paghidaet.

Ang Pagtuo kay Jesucristo Nagadala sa Aton sa Kaluwasan

Ang paggamit sang aton pagtuo kay Cristo magadala sa aton kaluwasan. Si Cristo naghanda sang alagyan para sa aton mabaton ang kabuhi nga wala katapusan. Kon magkabuhi kita paagi sa pagtuo sa Iya, sarang kita mapatawad sang aton mga sala kag makabalik sa pagkabuhi liwat upod sa Dios.

Halin sa Balaan nga mga Kasulatan

Ang pagtuo nagaabot paagi sa pagpamati sang pulong sang Dios (tan-awa sa Mga Taga-Roma 10:17).

Ang pagtuo kon wala binuhatan patay (tan-awa sa Santiago 2:17–18).

Mahimo sang Ginuo ang tanan nga butang para sa aton kon may pagtuo kita (tan-awa sa 1 Nefi 7:12).

Mga Dapat Tandaan

Kasugtanan: isa ka sagrado nga promisa nga ginahimo naton upod sa Dios. Nagahimo kita sang mga kasugtanan sa tion sang mga ordinansa pareho sang bunyag kag sang endowment sa templo.

Milagro: isa ka pinasahi nga hitabo nga gintuga paagi sa gahum sang Dios. Makakita kita sang mga milagro tungod sang aton pagtuo sa Ginuo.

Plano sang kaluwasan: plano sang Dios para buligan ang Iya mga kabataan para madaog ang sala kag kamatayon kag makabalik sa Iya. Ang pagtuo kay Jesucristo importante sa sining plano tungod paagi lamang sa Iya Pagbayad-Sala nga kita maluwas.

Hibaloa sing Dugang

Kon may mga pamangkot ka parte sa pagtuo, pwede mo istoryahon ang imo mga ministering brother ukon sister, mga lider sang imo ward ukon branch, ukon ang mga misyonero. Makakita ka man sang mga panudlo kag iban pa nga mga balasahon sa ChurchofJesusChrist.org ukon sa Librarya sang Ebanghelyo nga app.

© 2023 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, April 2023.Language.17466 861